«بۇقارالىق اقپارات قۇرالدارى تۋرالى» قازاقستان رەسپۋبليكاسىنىڭ زاڭىندا باق-تىڭ اۋىزشا جانە جازباشا سۇراۋ سالۋلارى بويىنشا ولارعا اقپارات بەرۋ پروتسەسى رەتتەلەدى; باق-پەن جۇمىستى جۇزەگە اسىرۋ جونىندەگى ۋاكىلەتتى تۇلعالاردىڭ نەمەسە بولىمشەلەردىڭ مارتەبەسى مەن فۋنكتسيالارى العاش رەت زاڭنامالىق تۇرعىدان ايقىندالادى.
«زاڭ جوباسىن دايىنداۋ بارىسىندا جان-جاقتى تالداۋ جۇرگىزە وتىرىپ, وسى ماسەلەلەردىڭ بارلىعىن قامتىدىق. قۇجات ءبىر جىلدىڭ ىشىندە قوعامدا اشىق تالقىلاندى. مينيسترلىك وعان بارىنشا مۇمكىندىك جاسادى. پارلامەنتتىڭ, قوعامدىق بىرلەستىكتەر مەن جۋرناليستەر ۇيىمدارىنىڭ وكىلدەرىمەن ارنايى جۇمىس توبىن قۇردىق. بۇدان بولەك, بىرنەشە رەت رەسپۋبليكالىق, سونداي-اق وڭىرلىك دەڭگەيدەگى تالقىلاۋلار ءوتتى. سونىمەن قاتار ازاماتتار ينتەرنەتتە دە قىزۋ تالقىلاپ, ۇسىنىستار جولدادى. جوبانى جەتىلدىرۋ بارىسىندا بارلىق ۇسىنىستار مەن پىكىرلەر ەسكەرىلدى. قورىتا ايتقاندا, زاڭ جوباسىندا 16 زاڭعا جانە 6 كودەكسكە 280-نەن استام وزگەرىستەر مەن تولىقتىرۋلار ەنگىزۋ قاراستىرىلىپ وتىر», - دەدى سەناتتىڭ جالپى وتىرىسىندا قر اقپارات جانە كوممۋنيكاتسيالار ءمينيسترى داۋرەن اباەۆ.
وسى ورايدا مينيستر جوبادا قاراپايىم ازاماتتاردىڭ اقپارات سالاسىنداعى قۇقىقتارىن قامتاماسىز ەتەتىن بىرقاتار نورمالار ۇسىنىلىپ وتىرعانىن اتاپ ءوتتى. سولاردىڭ ءبىرى تۇلعا مەن رەداكتسيا اراسىنداعى دالەلسىز اقپاراتقا قاتىستى داۋ-دامايدى سوتقا دەيىن شەشۋ تارتىبىنە قاتىستى. «قازىر اقپاراتتىڭ تارالۋ جىلدامدىعى بۇرىن-سوڭدى بولماعان دەڭگەيگە جەتتى. ءبىر عانا جالعان دەرەك ساناۋلى ۋاقىتتا ادامعا وراسان نۇقسان كەلتىرە الادى. سوندىقتان دا ءبىز ازاماتتاردى وسىنداي جاعدايدان قورعاي وتىرىپ, سونىمەن قاتار ماسەلەنى سوتقا دەيىن رەتتەۋ جولىن ۇسىنىپ وتىرمىز. ارينە, بۇل رەتتە زاڭدا باق-تىڭ تەرىسكە شىعارۋدان باس تارتىپ, ازاماتتىڭ سوتقا جۇگىنۋىن كۇتۋ ساقتالادى», - دەپ ءتۇسىندىردى مينيستر.
تاعى ءبىر قاراستىرىلىپ وتىرعان ماسەلە - ءcۋبتيتردى جانە سۋردواۋدارمانى قولدانۋ ارقىلى مۇمكىندىگى شەكتەۋلى جانداردىڭ اقپاراتقا قولجەتىمدىلىگىن قامتاماسىز ەتۋگە بايلانىستى. «اقپارات قۇرالدارىندا ازاماتتاردى رۇقساتىنسىز ولاردىڭ سۋرەتىن قولدانۋعا ارنالعان تالاپتار تىزبەسى بەكىتىلدى. مىسالى, ەندىگى جەردە قانداي دا ءبىر تۇلعا مادەني-كوپشىلىك, سپورتتىق جانە باسقا دا شارالارعا ءارى جۇرت الدىندا ءسوز سويلەۋگە قاتىسسا, جۋرناليستەر ونىڭ سۋرەتىن رۇقسات سۇراماي-اق جاريالاي الادى. بالالاردى زياندى اقپاراتتان قورعاۋدى قامتاماسىز ەتۋگە باعىتتالعان نورمالار دا قاراستىرىلىپ وتىر. اتاپ ايتقاندا, جالپى ءبىلىم بەرەتىن مەكتەپتەردە وقۋشىلاردى «تازارتىلعان ينتەرنەت كونتەنتىمەن» قامتاماسىز ەتۋ تالابى كوزدەلۋدە», - دەيدى مينيستر. بۇعان قوسا, كۇش كورسەتۋ, جابىرلەۋ سالدارىنان زارداپ شەككەن بالا تۋرالى جەكە مالىمەتتەر مەن ونىڭ سۋرەتىن بالانىڭ ءوزىنىڭ نەمەسە ونىڭ زاڭدى وكىلدەرىنىڭ كەلىسىمىنسىز قولدانۋدى شەكتەۋ ءتارىزدى وزگەرىستەر ۇسىنىلىپ وتىر. مۇنىمەن قوسا, باق-تىڭ قىزمەتىنە قولداۋ كورسەتۋ ماقساتىندا بىرقاتار وزگەرتۋلەر ەنگىزىلمەك. ماسەلەن, قولدانىستاعى زاڭدا بولماشى زاڭبۇزۋشىلىق ءۇشىن اقپارات قۇرالىنىڭ تيراجىن تاركىلەۋدەن باستاپ, قىزمەتىن توقتاتۋعا دەيىنگى بىرقاتار قاتاۋ شارالار قاراستىرىلعان بولاتىن. جاڭا جوبادا وسىنداي اكىمشىلىك جازالاردى جەڭىلدەتەتىن نەمەسە الىپ تاستايتىن نورمالار قامتىلدى. باسپا باق ءۇشىن تاعى ءبىر جەڭىلدىك - گازەتتىڭ نەمەسە جۋرنالدىڭ وكىلەتتى ورگانعا وتكىزىلەتىن مىندەتتى داناسىن ەندى ەلەكتروندى تۇردە تاپسىرۋعا رۇقسات بەرىلمەك. «تۇتاستاي العاندا, زاڭ جوباسى اقپارات, بايلانىس جانە اقپاراتتاندىرۋ سۋبەكتىلەرى ءۇشىن وڭتايلى جاعداي جاساپ, ولاردىڭ ودان ءارى قارقىندى دامۋىنا باعىتتالىپ وتىر» -دەپ تۇيىندەدى ءسوزىن ۆەدومستۆو باسشىسى.
