سەنات توراعاسى كوپجىلعى ناتيجەلى ەڭبەگى مەن ەكى ەل اراسىنداعى دوستىق قاتىناستاردى نىعايتۋعا قوسقان قوماقتى ۇلەسى ءۇشىن رەسەي ەلشىسىنە العىس ايتتى. ق.توقاەۆ ەكىجاقتى ستراتەگيالىق ارىپتەستىكتىڭ ءتيىمدى سيپاتىن جانە ءبىزدىڭ ەلىمىزدىڭ قالىپتاسقان دوستىق بايلانىستاردى ودان ءارى تەرەڭدەتۋدى جاقتايتىنىن اتاپ ءوتتى. سەنات باسشىسىنىڭ ايتۋىنشا, قازاقستان مەن رەسەيدىڭ قاتىناستارى حالىقارالىق ساياساتتاعى ماڭىزى زور ماسەلە بولىپ تابىلادى ءارى تمد كەڭىستىگىندە ستراتەگيالىق ءرول اتقارادى.
جۇزدەسۋشىلەر قازاقستان مەن رەسەيدىڭ پارلامەنتارالىق ءوزارا ءىس-قيمىلىنىڭ قارقىنى ارتا تۇسكەنىن ايتا كەلىپ, دەپۋتاتتاردىڭ ەكىجاقتى جانە كوپجاقتى سيپاتتاعى كەزدەسۋلەرى مەن بايلانىستارى جيىلەگەنىن اتاپ ءوتتى.
ەكى ەلدىڭ مەملەكەت باسشىلارى نەگىزىن قالاعان ىنتىماقتاستىق اياسىنداعى ساۋدا-ەكونوميكالىق, ايماقارالىق جانە شەكارا ماڭىنداعى بايلانىستار ماسەلەلەرى تالقىلاندى. «پرەزيدەنت ن.نازارباەۆ ۇسىنعان ەۋرازيالىق ەكونوميكالىق وداق يدەياسى كەيىنگى كەزدەردە ەلەۋلى ناتيجە بەرە باستاعانى سەزىلە باستادى. ساۋدا ۇلعايدى, ىقپالداستىق بايلانىستار نىعايا ءتۇستى», - دەدى رەسەيلىك ەلشى.
جۇزدەسۋشىلەر قازاقستاننىڭ الداعى ۋاقىتتاعى بۇۇ قاۋىپسىزدىك كەڭەسىنە توراعالىق ەتۋىنە بايلانىستى شارالارعا نازار اۋداردى. ەلشى رەسەي فەدەراتسياسى ءبىزدىڭ ەلىمىزدىڭ باستامالارىن قولداۋعا ءازىر ەكەنىن راستادى جانە قازىرگى زامانداعى قاعيدالىق ماسەلەلەر بويىنشا استانانىڭ ۇستانىمدارى ءۇشىن ريزاشىلىعىن ءبىلدىردى.
كەزدەسۋ سوڭىندا ق.توقاەۆ م.بوچارنيكوۆكە قازاقستان رەسپۋبليكاسى پارلامەنتى سەناتىنىڭ قۇرمەت گراموتاسىن تابىس ەتتى.
