كەلىسىمگە 2017 جىلعى 18 ساۋىردە استانا قالاسىندا قول قويىلدى.
كەلىسىمنىڭ باستى ماقساتى قازاقستان رەسپۋبليكاسى مەن تۇرىكمەنستان اراسىنداعى شەگەندەلگەن مەملەكەتتىك شەكارا سىزىعىن حالىقارالىق-قۇقىقتىق بەكىتۋ بولىپ تابىلادى.
كەلىسىمگە سايكەس قازاقستان رەسپۋبليكاسى, تۇرىكمەنستان جانە وزبەكستان رەسپۋبليكاسى مەملەكەتتىك شەكارالارىنىڭ ءتۇيىسۋ نۇكتەسى مەملەكەتتىك شەكارانىڭ باستاپقى نۇكتەسى بولىپ تابىلادى. شەگەندەلگەن مەملەكەتتىك شەكارا سىزىعىنىڭ سوڭعى نۇكتەسى – كاسپي تەڭىزى جاعالاۋىندا ورنالاسقان №162 شەكارالىق نۇكتە بولىپ تابىلادى.
مەملەكەتتىك شەكارا سىزىعى مەن بۇكىل شەكارالىق بەلگىلەردىڭ ورنالاسقان جەرى قازاقستان رەسپۋبليكاسى مەن تۇرىكمەنستان اراسىنداعى مەملەكەتتىك شەكارا كارتاسىنىڭ 41 پاراعىنا تۇسىرىلگەن, ول كەلىسىمنىڭ اجىراماس بولىگى بولىپ تابىلادى.
وسى كەلىسىمدى راتيفيكاتسيالاۋ مەملەكەتتىك اۋماقتى جانە ۇلتتىق ەگەمەندىكتىڭ كەڭىستىك شەكتەرىن بەلگىلەۋگە, قازاقستان رەسپۋبليكاسىنىڭ مەملەكەتتىك شەكاراسىن حالىقارالىق-قۇقىقتىق رەسىمدەۋ پروتسەسىن اياقتاۋعا جانە تۇرىكمەنستانمەن اۋماقتىق داۋلاردىڭ تۋىنداۋىنىڭ ىقتيمال العىشارتتارىن جويۋعا مۇمكىندىك بەرەدى.
سونداي-اق كوميتەت وتىرىسىندا «قازاقستان رەسپۋبليكاسى مەن تۇرىكمەنستان اراسىنداعى ستراتەگيالىق ارىپتەستىك تۋرالى شارتتى راتيفيكاتسيالاۋ تۋرالى» زاڭ جوباسى قارالدى.
2017 جىلعى 18 ساۋىردە استانادا قول قويىلعان شارتتا حالىقارالىق ۇيىمدار شەڭبەرىندە ىنتىماقتاستىق پەن قارىم-قاتىناستاردىڭ كەڭەيۋى, ءوزارا مۇددەلىلىك تۋعىزاتىن ماسەلەلەر بويىنشا ءوز ۇستانىمدارىن كەلىسۋ ءۇشىن كونسۋلتاتسيالار جۇرگىزۋ كوزدەلەدى.
شارتتىڭ ەرەجەلەرىنە سايكەس تاراپتار حالىقارالىق تەرروريزمگە جانە ءدىني ەكسترەميزمگە, سونداي-اق جاڭا قاۋىپتەر مەن قاۋىپسىزدىك سىن-قاتەرلەرىنىڭ وزگە دە كورىنىستەرىنە قارسى كۇرەستە ىنتىماقتاستىقتى كەڭەيتەدى جانە تەرەڭدەتەدى. ەنەرگەتيكا جۇيەلەرىن باسقارۋ, سۋ رەسۋرستارى, تەمىرجول كولىگى, ماشينا جاساۋ, ينفورماتيكا جانە بايلانىس سالالارىنداعى ىنتىماقتاستىقتى دامىتۋعا ەرەكشە كوڭىل بولەدى; ارال تەڭىزىنىڭ ەكولوگيالىق جۇيەسىن قالپىنا كەلتىرۋ ىسىندە كۇش-جىگەردى بىرىكتىرەدى جانە ۇيلەستىرەدى, وسى سالاداعى حالىقارالىق جانە وڭىرلىك باعدارلامالاردى ازىرلەۋ مەن ىسكە اسىرۋدا ءوزارا ارەكەت ەتەدى; ەكى مەملەكەتتىڭ ترانزيتتىك-كولىكتىك الەۋەتىن دامىتۋعا, حالىقارالىق ترانزيتتىك تەلەكوممۋنيكاتسيالىق مارشرۋتتاردى جاساۋعا جانە دامىتۋعا جاردەمدەسەدى.
شارتتى راتيفيكاتسيالاۋ ساياسات, ەكونوميكا, مادەنيەت, ۇلتتىق قاۋىپسىزدىك, ساۋدا, قورشاعان ورتا, ترانزيتتىك كولىك, ءبىلىم بەرۋ جانە سپورت سالالارىنداعى ەكى مەملەكەتتىڭ اراسىنداعى ىنتىماقتاستىقتى دامىتۋعا ىقپال ەتەدى.
زاڭ جوبالارى پالاتانىڭ قاراۋىنا جىبەرىلدى.
