ءبارى دە تاريفكە بايلانىستى

«قازاقستان تەمىر جولى» ۇك» اق باسشىلىعىنىڭ قاتىسۋىمەن تابيعي مونوپوليالاردى رەتتەۋ اگەنتتىگىندە ۇلتتىق تاسىمالداۋ­شىنىڭ قىزمەتى, 2008-2011 جىل­دارداعى وندىرىستىك-قارجىلىق كور­سەتكىشتەر جانە 2012 جىلعا ار­نالعان ءتاريفتى بەكىتۋ جونىندەگى تاپسىرىس بويىنشا تۇتىنۋ­شى­لار مەن مۇددەلى مەكەمەلەر ال­دىندا قوعامدىق تىڭداۋ وتكىزىلدى. وسىندا ايتىلعانداي, تەمىر جولدىڭ تابيعي مونوپوليالىق قىز­مەت تۇرىنە ماگيسترالدىق جە­لىنىڭ قىزمەتى, كىرمە جولدار, ەلەكتر جانە جىلۋ قۋاتتارىن ءبو­لۋ جانە تاراتۋ قىزمەتتەرى كىرەدى. سونىمەن بىرگە ول 2012 جىلعى جەلتوقساننىڭ 1-ىنەن باستاپ تەمىر جولداعى ماگيسترالدىق جەلى­نىڭ قىزمەتىن 10 پايىزعا, جالپى, تەمىر جول ءتاريفىن 15 پايىزعا كوتەرۋ جوسپارلانىپ وتىرعانىن دا تىلگە تيەك ەتتى. 2012 جىلعا ارنالعان باعدار­لا­مادا جولدىڭ جو­عارعى قاباتىن جاڭعىرتۋ, قۇرىلىس, ينفراقۇرى­لىم­دى جاڭعىرتۋ مەن قايتا جاراقتاندىرۋ, پويىز قوز­عالىسى قاۋىپسىزدىگىن كوتەرۋ, دوستىق ستان­ساسىن ودان ءارى دامىتۋ سىندى وزگە دە شارالار قاراستىرىلادى. كومپانيا ماگيسترالدىق جەلى­نىڭ ءتاريفىن كوتەرۋ ارقىلى 600 شاقىرىم جولدى جوندەۋ, 2699 جۇك ۆاگوندارىن, 134 لوكوموتيۆ الۋ, قوستاناي – جەلەزورۋدنىي تەمىر جول تەلىمىنىڭ 46 شاقىرى­مىن ەلەكترلەندىرۋگە مۇمكىندىك الماق. «قازاقستان تەمىر جولى» اق 2008-2011 جىل­دارى ءتاريفتى ءوسىرۋ جانە قارجى تارتۋ ارقىلى 2050 شاقىرىم جولعا كۇردەلى جوندەۋ جۇرگىزىپ, 12109 جۇك ۆا­گونى, 134 لوكوموتيۆ ساتىپ العان. 47 لوكوموتيۆ قايتا جاڭ­عىر­تىلعان. ماگيس­ترالدىق جەلى نىساندارى جاڭعىرتىلىپ, دوس­تىق ستانساسى دامىتىلعان. 2012 جىلى كومپانيا قىزمەت كورسەتۋ اياسىن كەڭەيتە تۇسپەك. ونىڭ ىشىندە جۇك اينالىمى 2012 جىلى 221 145 ميلليون توننا شاقىرىم مەترگە جەتكىزىلىپ, 2011 جىلعى كورسەتكىشتەن 2,5 پايىزعا جو­عارى بولادى دەپ كۇتىلۋدە. ءابدىراحمان قىدىربەك.