قورىتىندى ەسەپ 4-1. ەلوردا ۇجىمىنىڭ جەڭىسكە جەتۋى جانكۇيەرلەرگە ارمان بولىپ قالدى. ەكى كۇن بۇرىن چەليابىدە «تراكتور» «بارىستى» تاس-تالقان ەتىپ جەڭدى. ەندى, مىنە, تسسكا حوككەيشىلەرىمىزگە ەش مۇمكىندىك قالدىرمادى. بۇل ارمياشىلاردىڭ قاتارىنان 11 جەڭىسى ال ءبىزدىڭ جەڭىسسىز سەرياسىنا ەتىمىز ۇيرەنىپ قالدى.
بۇل ويىندا ايدىن يەلەرى قۇرامىنان كونستانتين وكۋلوۆ, ماكسيم شالۋنوۆ, ۆالەري نيچۋشكين, سەرگەي شۋماكوۆتار گول سوقسا, «بارىس» قورعاۋشىسى الەكسەي ماكليۋكوۆ مەرگەندىگىمەن كوزگە ءتۇستى.
وسىلايشا, «بارىس» سوڭعى ون ويىننىڭ توعىزىندا جەڭىلىسكە ۇشىراپ, ەۆگەني كورەشكوۆتىڭ شاكىرتتەرى 60 ۇپايمەن شىعىس كونفەرەنتسياسىندا سەگىزىنشى ورىنعا تۇراقتادى.
كەلەسى كەزدەسۋىن ەلوردانىڭ كومانداسى 18 جەلتوقسان كۇنى براتيسلاۆادا باتىس كونفەرەنتسياسىندا سوڭعى ورىنداردىڭ بىرىندە كەلە جاتقان جەرگىلىكتى «سلوۆان» كومانداسىمەن وتكىزەدى.
ەركەبۇلان جومارت
«ەگەمەن قازاقستان»
