سىرتقى ساياساتى ۇلتتىق قاۋىپسىزدىكتى نىعايتۋ, ايماقتىق جانە حالىقارالىق تۇراقتىلىقتى قامتاماسىز ەتۋ سىندى ماڭىزدى ستراتەگيالىق باسىمدىقتارعا نەگىزدەلگەن قازاقستان الەمدىك ارەناداعى ءوز مىندەتتەمەلەرىن جۇزەگە اسىرۋدا بۇۇ, ەقىۇ, شىۇ, يىۇ جانە ۇقشۇ سەكىلدى بەدەلدى ۇيىمدارمەن بىرلەسە جۇمىس ىستەۋدە. سونداي-اق حالىقارالىق جانە ايماقتىق بىرلەستىكتەرگە توراعالىق ەتۋدە تاجىريبەسى مول قازاقستان جاھاندىق سىن-قاتەرلەردىڭ الدىن-الۋعا قاتىستى وڭ باستامالاردىڭ كۇن تارتىبىنە شىعارىلۋىنا مۇرىندىق بولىپ ءجۇر. ەلىمىزدىڭ وسى ىسپەتتەس الەمدىك اۋقىمداعى ءىس-قيمىل ۇدەرىسى 2018 جىلى قاڭتاردا بۇۇ قاۋىپسىزدىك كەڭەسىنە توراعالىق ەتەتىندىگىمەن جاڭا سيپاتقا يە بولادى دەپ كۇتىلۋدە ءارى بۇل باعىتتاعى, ياعني حالىقارالىق قاۋىپسىزدىكتى نىعايتۋعا بايلانىستى شارالاردىڭ وڭتايلى جۇزەگە اسۋىنا قازاقستاننىڭ ۇقشۇ-عا الداعى ۋاقىتتا جەتەكشىلىك جاساۋى دا زور ىقپالىن تيگىزەتىنىنە سەنىم بىلدىرىلۋدە.
تاشكەنت قالاسىندا 1992 جىلعى 15 مامىردا قول قويىلعان ۇجىمدىق قاۋىپسىزدىك تۋرالى شارتتىڭ نەگىزىندە 2002 جىلى, دالىرەگى وسىدان 15 جىل بۇرىن شارتقا قاتىسۋشى ەلدەر ۇقشۇ-نى بىرلەستىك رەتىندە قۇرۋ جونىندە شەشىم قابىلداعان بولاتىن. بۇگىندە ۇقشۇ الەمدىك قوعامداستىقتان وڭ باعاسىن الىپ, بەدەلدى ۇيىمدار قاتارىنان وزىندىك ورنىن تاپقان. ونىڭ مۇنداي دەڭگەيگە كوتەرىلۋىنە قازاقستان پرەزيدەنتى نۇرسۇلتان نازارباەۆتىڭ تاراپىنان ەنگىزىلگەن ۇسىنىستاردىڭ وڭ اسەرىن تيگىزگەنىن ەرەكشە اتاپ كورسەتۋىمىز كەرەك.
بۇگىندە ۇقشۇ ەلىمىزگە شەتەلدىك قارۋ-جاراقتاردى, اسكەري تەحنيكالاردى جەڭىلدىكپەن ساتىپ الۋعا جول اشۋدا. بۇل – ەل قارجىسىن ۇنەمدەي وتىرىپ, اسكەري كۇشتەرىمىزدى, قۇقىق قورعاۋ ورگاندارىن سوڭعى ۇلگىدەگى قارۋ-جاراقتارمەن جانە تەحنيكامەن جابدىقتاۋعا بەرىلگەن وڭتايلى مۇمكىندىك. اسىرەسە, ۇقشۇ شەڭبەرىندە كوپجىلدىق اسكەري-ەكونوميكالىق ىنتىماقتاستىق باعدارلاماسى بەكىتىلگەنىن, سونىڭ ناتيجەسىندە قارۋ-جاراقتار مەن اسكەري تەحنيكا سالاسىندا قىزمەت كورسەتۋگە ارنالعان ورتالىقتاردىڭ جۇيەسىن قۇرۋ ىسكە اسىرىلىپ جاتقانىن ەرەكشە اتاپ وتكەن ءجون. اتالعان جاعدايات وتاندىق اسكەري ونەركاسىپتىڭ الەۋەتىن ارتتىرۋعا, ەلىمىزدىڭ اسكەري قىزمەتشىلەرىن رەسەي مەن بەلارۋستىڭ اسكەري جوعارى وقۋ ورىندارىندا اقىسىز نەمەسە جەڭىلدىكپەن وقىتۋعا, سونداي-اق ارمەنيا, قىرعىزستان مەن تاجىكستاننىڭ اسكەريلەرىنىڭ ەلىمىزگە كەلىپ وقۋىنا مۇمكىندىكتەر بەرەدى.
ۇيىم اياسىندا بىتىمگەرشىلىك كۇشتەردى, قۇقىق قورعاۋ ورگاندارىن, سونداي-اق تجم ورگاندارىنىڭ ارنايى ماقساتتاعى بولىمشەلەرىن قامتيتىن ۇجىمدىق قاۋىپسىزدىك جۇيەسى جۇمىس ىستەپ تۇر. اتالعان بولىمشەلەر ءتۇرلى جاتتىعۋ شارالارىنا قاتىسىپ, وزدەرىنىڭ دەڭگەيىن كوتەرۋدە.
قازىرگى تاڭدا ۇقشۇ حالىقارالىق تەرروريزم مەن ءدىني ەكسترەميزمگە قارسى كۇرەسكە ءجىتى كوڭىل اۋدارىپ وتىر. قازاقستان تاراپىنىڭ بەلسەندى ءىس-قيمىلىنىڭ ناتيجەسىندە حالىقارالىق تەرروريزمگە قارسى كۇرەسكە قاتىستى ءىس-شارالاردىڭ تىزبەسى قابىلدانىپ, تەرروريستىك دەپ تانىلعان ۇيىمداردىڭ ءتىزىمى بەكىتىلدى. سونىمەن قاتار ۇقشۇ-نىڭ ەسىرتكىگە قارسى ستراتەگياسى ناقتىلاندى.
نەگىزىندە, ۇقشۇ شەڭبەرىندە وتكىزىلەتىن ءاربىر شارا ەلىمىزدىڭ قاۋىپسىزدىگىن نىعايتۋعا, ايماقتىق تۇراقتىلىقتى قامتاماسىز ەتۋگە زور اسەرىن تيگىزۋدە. الداعى ۋاقىتتا وسى باعىتتاعى جۇمىستار قارقىن الاتىنى مينسكىدە ۇيىمداستىرىلعان مەرەيتويلىق سەسسيادا ايقىندالا ءتۇستى. وسى ورايدا پرەزيدەنت ن.ءا.نازارباەۆ اتاپ كورسەتكەن باسىم باعىتتاردىڭ ماڭىزى زور. تاراتا ايتار بولساق, ەلباسى قازاقستاننىڭ ۇقشۇ-عا توراعالىق جاسايتىن كەزەڭدە ۇيىمعا مۇشە ەلدەردىڭ اسكەري سالاداعى ءوزارا ءىس-قيمىل اۋقىمىن ۇلعايتۋ, تاجىريبەلىك اسكەري-تەحنيكالىق ىنتىماقتاستىقتى نىعايتۋ, بىرلەستىكتىڭ لاڭكەستىككە قارسى كۇرەستىڭ جاھاندىق جۇيەسىن قالىپتاستىرۋعا اتسالىسۋىن قامتاماسىز ەتۋ, مۇشە مەملەكەتتەردىڭ كيبەرقاۋىپسىزدىگىنە تونگەن قاۋىپتەرگە قارسى جۇمىلا ارەكەت ەتۋ, زاڭسىز ەسىرتكى اينالىمىنا قارسى كۇرەستى كۇشەيتۋ سىندى باعىتتارعا باسا ءمان بەرىلەتىنىن ناقتى كورسەتىپ بەردى.
ەندى, الداعى ۋاقىتتا وزەكتى ماسەلەلەر قامتىلعان وسى باسىمدىقتار ۇقشۇ شەڭبەرىندە باسشىلىققا الىنىپ, جۇيەلى جۇمىستار جۇرگىزىلەتىن بولادى.
ايتا كەتەيىك, ۇقشۇ ۇجىمدىق قاۋىپسىزدىك كەڭەسىنىڭ كەزەكتى سەسسياسى 2018 جىلدىڭ ەكىنشى جارتىجىلدىعىندا استانادا وتپەك.
