زالدىڭ ورتا شەنىنە ىلىنگەن پەيزاجدار توپتاماسى تاياۋدا تۋعان دۇنيەلەر. ساۋلەتتى لاندشافت پەن ءبىر بوياۋدىڭ قۇبىلعان نەشەمە ءوڭى ءبىر مەزەتتە جاعانى ۇرعان تەڭىز تولقىنىنداي تۇرلەنە تۇسەدى. «بۇلتتار مەن تاۋلار» ديپتيحىنەن, ء«دوڭ ۇستىندە», «سكيف ەلدى مەكەندەرى» سەرياسىنان امەريكالىق اتاقتى سۋرەتشى روتكونىڭ ابستراكتىلى بوياۋلارىمەن ۇندەستىگى بايقالاتىنداي. ال لەيلا وبراز جاساۋدا قايسارلىق پەن ەرىك-جىگەردى, ۋاقىت پەن ولشەمدى زاڭعار بيىكتەن, ماڭگى الاسارمايتىن اسپاننان ىزدەيدى.
لەيلانىڭ تەرەڭدىككە تۇنعان الەم تۋرالى پايىمىنىڭ كىشكەنتاي بولشەگى, اسىرەسە «كوگىلدىردىڭ تۇستەرى», «قۇلاننىڭ ءتۇرلى تۇستەرى» اتتى توپتاماسىنان انىق كورىنەدى.
«بۇل تۋىندىلار سوڭعى 2-3 جىل كولەمىندە دۇنيەگە كەلگەن. كورمەنىڭ نەگىزگى وزەگى قازاقستاننىڭ مادەنيەتىمەن, تامىرلى تاريحىمەن استاسىپ جاتىر. قۇلان وتە ءبىر قىزىق جانۋار, تۇرقى شاعىن كەلگەن وسى ءبىر دالا تاعىسىنا كەيبىرى ءشۇبا كەلتىرىپ جاتادى. مەنى تاڭعالدىراتىنى, بۇل جانۋاردى قولعا ۇيرەتە المايسىڭ. دەگەنمەن ولار تابيعات اياسىندا ءبىر-بىرىمەن قوعامداسا, جۇپتاسىپ ءومىر سۇرەدى. مەن ءۇشىن قۇلان – بوستاندىق سيمۆولى, ازاتتىقتىڭ كورىنىسى», دەيدى سۋرەتشى.
لەيلا ماحات كاسىبي سۋرەتشى عانا ەمەس, بەينەلەۋ ونەرى جانە سىزۋ ماماندىعى بويىنشا فيلوسوفيا دوكتورى, قازاق ۇلتتىق ونەر ۋنيۆەرسيتەتىندەگى «كوركەم سۋرەت جانە ءمۇسىن» كافەدراسىنىڭ دوتسەنتى, تالىمگەر. سۋرەتشى قولتاڭباسى شەتەلدىك ونەرتانۋشىلارعا دا كەڭىنەن تانىلعان. اتاپ ايتقاندا, تۇركيا مادەنيەت مينيسترلىگىنىڭ بەينەلەۋ ونەرى مۋزەيىندە, مولدوۆا مەملەكەتتىك بەينەلەۋ ونەرى مۋزەيىندە, گەرمانيانىڭ ميۋنحەن قالاسىنداعى «ارت 21», بەرليندەگى «ساراي» گالەرەياسىندا, سونداي-اق جاپونيا, اۋستريا, قىتاي حالىق رەسپۋبليكاسى, بەلگيا, ءۇندىستان سىندى ەلدەردەگى ونەر ورتالىعىندا شىعارماشىلىق توپتامالارى ورنالاسقان.
ايا ءومىرتاي,
«ەگەمەن قازاقستان»
سۋرەتتەردى تۇسىرگەن
ورىنباي بالمۇرات,
«ەگەمەن قازاقستان»
