قازاقستان رەسپۋبليكاسىنىڭ مەملەكەتتىك كۇزەت قىزمەتىنە مەملەكەت باسشىسىنىڭ, كۇزەتىلەتىن ادامدار مەن وبەكتىلەردىڭ قاۋىپسىزدىگىن قامتاماسىز ەتۋ, مەملەكەتتىك ەتالونداردى كۇزەتۋ جانە مەملەكەتتىك-حاتتامالىق ءىس-شارالارعا قاتىسۋ جونىندەگى ماڭىزدى جانە جاۋاپتى ميسسيا جۇكتەلگەن.
ەلىمىزدىڭ بارلىق وڭىرلەرىنەن اسكەري قىزمەت اتقارۋ جانە وتان الدىنداعى كونستيتۋتسيالىق بورىشىن وتەۋ ءۇشىن جاڭادان قابىلدانعان 295 سارباز الماتىداعى 0111 اسكەري بولىمىندە سالتاناتتى تۇردە اسكەري انت قابىلدادى. بۇل اكت ەرەكشە اسكەري جورالعى سانالىپ, اسكەري قىزمەتشىلەردىڭ بويىنداعى پاتريوتيزم, وتانعا جانە پرەزيدەنتكە ادال بولۋ, سونداي-اق قازاقستان رەسپۋبليكاسى مەملەكەتتىك كۇزەت قىزمەتىنىڭ قاتارىندا ادال قىزمەت اتقارۋ سياقتى قاسيەتتەرگە تاربيەلەيدى.
– كۇزگى اسكەرگە شاقىرۋ ناۋقانى كەزىندە قىزمەتتىڭ وفيتسەرلەرى اسكەري قىزمەتكە 2500-دەن ارتىق ۇمىتكەردى زەرتتەپ-زەردەلەدى, ءبىر ورىنعا 8-9 ادامنان كەلدى. اسكەرگە شاقىرۋ ناتيجەسى بويىنشا قىزمەت قاتارىنا شاقىرىلعان جاس ساربازداردىڭ ساپالىق سيپاتتاماسى جوعارعى دەڭگەيدە ەكەنىن كورۋگە بولادى. كوپتەگەن اسكەري قىزمەتشىلەردىڭ جوعارى جانە ورتا-ارنايى ءبىلىمى, سونداي-اق سپورتتىق جەتىستىكتەرى بار. قىزمەت ۇمىتكەرلەرىنە قاتاڭ تالاپتار قويىلدى. ەڭ باستىسى مىقتى دەنساۋلىق, بىلىمىمەن قاتار بەت-الپەتىنىڭ سىمباتتىلىعى بولۋى شارت.
ماسەلەن, بويى 180 سانتيمەتردەن 190 سانتيمەترگە دەيىن, بويى مەن سالماعىنىڭ قالىپتىلىعى, ورتا (تولىق) ءبىلىمىنىڭ بولۋى وقۋ جانە جۇمىس ورىندارىنان بەرىلگەن جاقسى مىنەزدەمەلەرى ەسكەرىلدى. ۇمىتكەردىڭ مورالدىق-ىسكەرلىك قاسيەتتەرىنە جانە دەنە شىنىقتىرۋ دايىندىعىنا ەرەكشە نازار اۋدارىلدى. اسكەري قىزمەت ءۇشىن ىرىكتەلىپ الىنعان ۇمىتكەرلەر قر ۇقك ورگاندارىنان ارنايى تەكسەرۋدەن وتەدى. ساربازدار ءبىر اي بويى جاس جاۋىنگەر كۋرسىنان ءوتتى جانە بۇگىن وتە قىسقا مەرزىمدە العان ماشىق-داعدىسىن كورسەتتى, – دەيدى مەملەكەتتىك كۇزەت قىزمەتى «باتىر» پرەزيدەنتتىك پولكىنىڭ مايورى قايرات تارين.
ساربازداردىڭ اسكەري انت قابىلداۋ راسىمىنە الماتى قالاسى اكىمدىگىنىڭ وكىلدەرى, قوعام قايراتكەرلەرى, مەملەكەتتىك كۇزەت قىزمەتىنىڭ ارداگەرلەرى, جاس ساربازداردىڭ اتا-انالارى مەن تۋىستارى قاتىستى. مەملەكەتتىك كۇزەت قىزمەتىنىڭ اسكەري قىزمەتشىلەرى وزدەرىنىڭ شەبەرلىكتەرىن, كاسىپقويلىعى مەن ءىس-قيمىلدارىنىڭ ۇيلەسىمدىگىن كورسەتىپ, جيىلعانداردى ءتانتى ەتتى. سونداي-اق پرەزيدەنتتىك ۇرمەلى اسپاپتار وركەسترى مەن قۇرمەت قاراۋىل روتاسى پلاتس-كونتسەرتتىڭ (دەفيلە) جاڭا باعدارلاماسىن كورەرمەن نازارىنا ۇسىندى.
وتان الدىندا انت قابىلداعان ساربازدار الداعى ۋاقىتتا مەملەكەتتىك كۇزەت قىزمەتىنىڭ اسكەري بولىمدەرى بويىنشا تاراتىلىپ, اسكەري مەرزىم ارالىعىندا جۇكتەلگەن اسا جاۋاپتى مىندەتتەردى اتقارۋعا كىرىسەتىن بولادى.
ارمان وكتيابر,
«ەگەمەن قازاقستان»
الماتى
