ماحاببات قۇدىرەتى

ەلورداداعى «ارسەنال 3د» كينوتەاترىندا شاكەن ايمانوۆ اتىنداعى «قازاقفيلم» اق پەن «كەنتاۆر پروداكشن» جشس بىرلەسە شىعارعان رەجيسسەر تالعات تەمەنوۆتىڭ «مەنىڭ كۇنالى پەرىشتەم» ءفيلمىنىڭ تۇساۋكەسەرى ءوتتى. ءفيلمنىڭ نەگىزگى يدەياسى – ماحابباتقا ادالدىق پەن ار تازا­لىعىنا ۇندەۋ. قازىرگى كۇننىڭ اششى شىندىعى وندا كوپشىلىككە تۇسىنىكتى ۇعىممەن باياندالادى. تەاتر جانە كينو الەمىندە ءوزىنىڭ بىرەگەي تۋىندىلارىمەن حالىق­تىڭ سۇيىسپەنشىلىگىنە بولەنگەن تالعات تەمەنوۆ مۇندا دا ءوزىن تولعانتار باستى ماسەلەنى ال­دىڭعى ورىنعا شىعارعان. بۇل – ماحابباتتىڭ الدىندا جاس تا, جاسامىس تا دارمەنسىز, ونىڭ ءۇستى­نەن ەشنارسە ۇستەمدىك قۇرىپ كەتە المايدى دەگەن وي. بولماسا اسحات باباەۆيچ (مۇرات احمانوۆ) سياقتى سۇلۋلىق پەن كىرشىكسىز سەزىمدى دۇنيەنىڭ كۇشىمەن ۋىسىمنان شىعارماي ۇستايمىن دەۋشىلەر مىنا قوعامدا جەتىپ ارتىلادى. ەگەر ءومىر سوندايلار­دىڭ ولشەپ-پىشكەن سىزىعىمەن ءوربيتىن بولسا, وندا ادامي قۇن­دىلىقتار الدەقاشان جەر بەتىنەن جويىلىپ كەتپەي مە؟ باستى كەيىپكەردىڭ اتى-ءجونى جايدان-جاي ايشا ابروەۆا (قۇرالاي اناربەكوۆا) دەپ اتالماسا كە­رەك-ءتى. وسىنىڭ استارىندا ۇلكەن ءمان جاتقانداي. ابروەۆا ارقىلى قازاقتىڭ تالاي قاراكوز قىزدارى­نىڭ ابىرويى پاش ەتىلەدى. دۇنيە-بايلىق ءۇشىن ءوز تاعدىرلارىن تاپتات­قان مۇنداي بەيباقتار از با؟ قىز تاعدىرى – قازىرگى باستى ماسەلەنىڭ ءبىرى. ارۋلارىن اياقاستى ەتكەن قوعامنىڭ سول قارا داعىن بەينەلەۋدە تالعات رەجيسسەر ءوزى­نىڭ وسى تۋىندىسى ارقىلى كورەر­مەنگە كوپ وي تاستايدى. ومىردە ءوز كەمشىلىگىن تۇزەيمىن دەگەن ادامعا ەشقاشان كەش ەمەس ەكەن. يدەيا اۆتورى كەيىپكەرىن تەرىس جولدان تەگىس جولعا شىعارادى. ازامات (دانيار قاناتقاليەۆ) ەسىمدى جىگىتتى كەزدەستىرگەنگە دەيىن ايشا قالتالى قولداۋشىسىنىڭ ىقپا­لى­نان شىعا الماي, ايتقانىنا كونىپ, ايداۋىنا ءجۇرىپ كەلسە, ەكى جاستىڭ ءبىر-بىرىنە دەگەن كىرشىكسىز ماحابباتى كەيىنگى ومىرلەرىن ءوز­گەرتىپ جىبەرەدى. بايلىقتىڭ ال­دىن­دا ازامات باسىن يمەيدى, سۇيىكتىسىن اقشاعا ايىرباستاپ كەتپەيدى. جوق-جىتىك پەن تاپشى­لىق­تىڭ زاردابىن شەككەن بويجەت­كەننىڭ ونەردەگى جولىنىڭ ءساتتى ورىلۋىنە, ارمانىنا قول جەتكىزۋىنە سەپتىگى تيگەن جەبەۋشىسى, اسا داۋلەتتى بانكيردى دە جەمە-جەمگە كەلگەندە كەشىرە بىلەدى. ونىڭ قولىمەن توسىننان اتىلعان وققا تەك ءوزىنىڭ كىنالى ەكەنىن ايتادى. رەجيسسەر ەشكىمگە كىنا ارتپايدى, كىنالى جاندى ىزدەمەيدى. فيلم ەكى جاستىڭ قوسىلعان باقىتتى شاعىمەن تۇيىندەلەدى. شەشۋشى مەزەتتە ايشا پاريجگە شاقىرۋ قاعازىن الىپ, شەتەلدىك ارىپتەس­تەرىنەن تاجىريبە الماسۋعا اتتا­نىپ كەتەدى. بىراق ومىردە ادامعا ءبىر عانا مارتە بۇيىراتىن ءمولدىر سەزىمنەن قىمبات ەشتەڭە جوق ەكەنىن ءتۇسىنىپ, ەلگە قايتا ورا­لادى. وتانعا ورالۋ ماسەلەسى دە قازىرگى جاستار ومىرىندەگى كۇردە­لى پروبلەمانىڭ ءبىرى دەسەك, اسىرەسە شەت ەلگە ءبىلىم قۋىپ كەتىپ جاتقان جاستاردىڭ تۋعان جەرگە ءبارى ورالىپ جاتىر ما دەگەن سۇراقتىڭ تۋى زاڭدى. ايشا دا سونداي جاستارىمىزدىڭ ءبىرى. وسى تاقىرىپ تەرەڭدەپ بولماسا دا, ءبىرشاما دەڭگەيدە كوتەرىلۋى كەيىنگى تۋىندىلارعا ساباق بولار دەگەن ويدامىز. تاعى ءبىر ەرەكشەلىگى – فيلم­گە فرانتسۋزدىڭ اتاقتى اكتەرى جەرار دەپاردەنىڭ ءتۇسۋى. رە­جيس­سەردىڭ ايتۋىنا قاراعاندا, ول ءوزىنىڭ مەيرامحاناسىن ۇسى­نىپ, ءفيلمنىڭ تۇسىرىلۋىنە كوپ قولداۋ كورسەتىپتى. سونىمەن بىرگە, ءوز اكتەرلەرىمىزدەن مەدينستي­تۋتتىڭ پروفەسسورى رولىندەگى اسىلبولات ىسماعۇلوۆ, ايشا­نىڭ اناسىنىڭ بەينەسىن سومدا­عان مايرا وماروۆا ويىندارىن اتاپ وتكەن ءجون بولار. ءفيلمنىڭ اتى ايتىپ تۇر­عانداي,  «ءوزى كۇنالى بولسا, ول قا­لاي پەرىشتە بولادى؟» دەگەن سۇ­راق­تىڭ قويىلۋى دا مۇمكىن. جەر بەتىندەگى ادام بالاسىنىڭ ءبارى كۇناھار پەندە. ول تۋرالى ويدى تولعاي تۇسسەك, ءبىر عانا فيلم توڭىرەگىندەگى اڭگىمە ازدىق ەتەرى ءسوزسىز. رەجيسسەردىڭ ماقساتى, جاس­تارعا وي سالۋ شىعار دەپ توپشىلادىق. ءبىر ادامدى ويعا باتىرا العان كورسەتىلىم جولى بولعان دۇنيە دەپ ەسەپتەلەدى. مىنە, وسى تۇرعىدان كەلگەندە, جۇرت مۇنى قىزىعا تاماشالاي­تىنى داۋسىز. قاراشاش توقسانباي. ______________________ سۋرەتتى تۇسىرگەن سوۆەتبەك ماعزۇموۆ.