جەنەۆا قالاسىندا قازاقستان رەسپۋبليكاسى مەن شۆەيتساريا كونفەدەراتسيا اراسىنداعى ديپلوماتيالىق قاتىناستاردىڭ ورناعانىنا 25 جىل تولۋىنا وراي قازاقستاننىڭ ەلشىلىگى قۇرمەتتى كونسۋلدىعىنىڭ رەسمي اشىلۋىن وتكىزدى. اتالعان ءىس-شارالارعا رەسمي جانە ىسكەر توپتارىنىڭ وكىلدەرى قاتىستى.
شارا بارىسىندا قازاقستان رەسپۋبليكاسىنىڭ شۆەيتسارياداعى ەلشىسى جانار ايتجانوۆا, شۆەيتساريا سىرتقى ىستەر دەپارتامەنتىنىڭ پروتوكول باسشىسى, ەلشى ماۋرو رەينا جانە قازاقستاننىڭ جەنەۆاداعى قۇرمەتتى كونسۋلى جان-پول پەريا ءسوز سويلەدى.
ج. ايتجانوۆا شۆەيتساريامەن اعىمداعى جانە دامۋ ىنتىماقتاستىعىنىڭ كەلەشەگى, سونداي-اق «استانا» حالىقارالىق قارجى ورتالىعى جانە حالىقارالىق «جاسىل تەحنولوگيالار» ورتالىعى شەڭبەرىندە ىنتىماقتاستىق تۋرالى ەگجەي-تەگجەيلى اڭگىمەلەدى.
م. رەينا ەكىجاقتى قارىم-قاتىناستىڭ دەڭگەيىن جوعارى باعالاپ, ەكى ەل اراسىنداعى ىنتىماقتاستىقتىڭ ودان ءارى نىعايا تۇسەتىنىنە سەنىم ءبىلدىردى.
ءوز كەزەگىندە جان-پول پەريا جاڭا قۇرمەتتى كونسۋلدىقتىڭ اشىلۋى ەكى ەل اراسىندا رەسمي, ىسكەر, عىلىمي جانە مادەني قارىم-قاتىناستاردىڭ ارتۋىنا سەبەپ بولاتىنىنا ايتتى. اتالعان كونسۋلدىق شۆەيتساريانىڭ ينۆەستيتسيالارى مەن تەحنولوگيالاردى قازاقستاندىق نارىققا تارتۋعا جاردەم كورسەتۋگە ارنالعانىن اتاپ ءوتۋ قاجەت.
رەسمي كەزدەسۋدەن كەيىن قازاقستاندا جالپى بيزنەس جۇرگىزۋ, ساۋدا-ەكونوميكالىق جانە عىلىمي-تەحنيكالىق, اسىرەسە قازاقستان مەن شۆەيتساريا ايماقتارى اراسىندا ىنتىماقتاستىقتى نىعايتۋ بويىنشا اشىق پىكىرالماسۋ ءوتتى.
شۆەيتساريا قازاقستاننىڭ نەگىزگى ساۋدا ارىپتەستەرىنىڭ ءبىرى بولىپ تابىلادى. 2005 جىلدان بەرى شۆەيتساريالىق ينۆەستيتسيالاردىڭ جالپى كولەمى شامامەن 19 ملرد اقش دوللارىن قۇرادى. قازاقستاندىق نارىقتا «ABB», «Philip Morris», «Glencore», «Nestlé», «Roche», «Novartis», «Syngenta», «Bühler» جانە تاعى باسقا شۆەيتساريالىق كومپانيالار كەڭىنەن ۇسىنىلعان.
