سىبايلاستار سوتتالدى

انگليانىڭ جوعارعى سوتى بتا بانكتىڭ ءابليازوۆ پەن بۇرىنعى باسشىلارىنا قاتىستى اتالعان بانكتىڭ تالاپ-ارىزىن قاراۋ بارىسىندا پولۋ كيفرەوتيستى سوتتى سىيلاماعانى ءۇشىن 1 جىل 9 اي تۇرمەگە جابۋ تۋرالى شەشىم قابىلدادى. پول كيفرەوتيس ءابليازوۆتىڭ نەگىزگى سىبايلاستارىنىڭ ءبىرى جانە ول كيپردە ءابليازوۆتىڭ وف­فشور­لىق كومپانيا جۇيەسىن باس­قارعان. بۇعان قوسا كيفرەوتيس پەن ونىڭ قىز­مەتكەرلەرى ونداعان وف­فشور­لىق كومپانيالاردىڭ نەگىزگى اكتسيونەرلەرى, بەنيفيتسارلارى جانە ديرەك­تور­لارى  بولىپ تابىلادى. ولار وسى كومپانيالار ارقىلى بتا بانك­تىڭ ۇرلانعان قارجى­لا­رىن باس­قا بانكتەرگە اۋدارىپ وتىرعان. كيفرەوتيس 300 ملن. دوللار سوماسىنداعى قۇندى قاعازداردىڭ ۇرلانۋىنا بايلانىستى شىعىن­دار­دى تالاپ ەتىپ وتىرعان بتا بانككە قاراستى كومپانيالارعا, ءاب­ليازوۆكە, سولودچەنكوعا جانە باسقا دا ادامدارعا قاتىستى بتا بانكتىڭ ارىزىنا جاۋاپ بەرۋشى بولىپ تابىلادى. وسى تالاپ-ار­ىز­عا سايكەس, انگليانىڭ جوعارعى سوتى كيفرەوتيستەن ءوزىنىڭ اكتيۆتەرى, سونداي-اق اقشالاي قارجى­نىڭ قايدا اۋدارىلعاندىعى تۋرا­لى اقپاراتتاردى اشىق ايتۋدى تالاپ ەتتى. كيفرەوتيس سوتقا جالعان اقپارات بەرگەندىگىن مويىندادى. ونىڭ مالىمدەۋىنشە, ول جاۋاپ بەرۋشى كەيبىر ادامداردىڭ تاراپى­نان قىسىم كورگەن. بۇعان قوسا, بانك كيفرەوتيستىڭ ءابليازوۆ پەن ونىڭ  قايىناعاسى شا­لاباەۆتان 4,5 ملن. فۋنت ءتو­لەۋدى تالاپ ەتكەندىگى تۋرالى حاتتى سوتقا تاپسىردى. كيفرەوتيس – بريتانيانىڭ ازا­ماتى, كيپردە تۇرادى. بانك وسى شەشىمنىڭ كيپردە مويىندالۋى جونىندەگى مۇمكىن بولعان شارا­لاردى قاراستىرۋدا. سونداي-اق كيفرەوتيستى «سوتتى سىيلاماعانى ءۇشىن كىنالى» دەپ تابۋ جونىندە كيپردە وسى ەلدىڭ زاڭى بويىنشا جەكە پروتسەسس باستالماق. كيفرەوتيستى تۇرمەگە قاماۋ تۋرالى ۇكىمنىڭ شىعارىلۋى – وسى ىسكە قاتىستى ءۇشىنشى وقيعا. ويتكەنى انگليانىڭ جوعارعى سوتى بۇعان دەيىن بتا بانكتىڭ تالاپ-ارىزى بويىنشا شالاباەۆ پەن ستەپانوۆقا قاتىستى ءدال وسىنداي ۇكىم شىعارعان بولاتىن. ءابليازوۆ پەن ونىڭ زاڭگەرلەرى سوت پروتسەسىن توقتاتۋ نەمەسە مەزگىلىن سوزۋ ماقساتىندا مۇمكىن بولعان بارلىق قادامدارعا بارۋدا. دەگەنمەن ءابليازوۆتى سوتتى سىيلاماعانى ءۇشىن جاۋاپقا تارتۋ پروتسەسى 2011 جىلى 28 قاراشادا باستالادى. «ەگەمەن-اقپارات».