26 قاڭتار، 2017

بۇل – قوعامداعى جاعىمدى ءۇردىس

154 رەت كورسەتىلدى

بۇگىن ءبىز قوعامىمىزداعى سىباي­لاس جەمقورلىق ارەكەتتەرگە قا­تىستى حالىقتىڭ جالپىلاما كوز­قاراسىن از-كەم ءسوز ەتپەكپىز. سون­دىق­تان، اتالعان ماسەلەگە بايلانىس­تى ستاتيستيكالىق مالىمەتتەرگە جۇ­گىنبەي، سانداردى تىز­بە­لەمەي، تەك ءوزىمىز ارالاس-قۇرالاس جۇرگەن ورتا­نىڭ، تانىس-ءبىلىس كىسىلەردىڭ پىكىرلەرىن ال­عا تارتا وتىرىپ، ءوز پايى­مىمىزدى بىلدىرسەك دەدىك.

سونىمەن… مەملەكەت سەنىپ تاپ­سىر­عان قىزمەتىن ءوزىنىڭ جەكە «پات­شا­لىعىنداي» كورىپ، ونى زاڭسىز كول­دەنەڭ تابىس كوزىنە اينالدىرىپ جۇر­گەندەر قاتارىنىڭ از ەمەستىگىن ءىشىمىز سەزەدى. بۇل سەزىگىمىزدىڭ تۋىنداۋىنا ەلىمىزدەگى لاۋازىمدى تۇلعالاردىڭ، ءار­تۇرلى دەڭگەيدەگى، ءىرىلى-ۇساقتى شە­نەۋ­نىكتەردىڭ جەمقورلىقپەن ايىپتالىپ، تەرگەۋگە الىنۋىنىڭ تىم جيىلەپ كە­تۋى تۇرتكى بولىپ وتىر. دەمەك، بۇل جا­عىمسىز جاعداياتتاردان ەلىمىزدە سىباي­لاس جەمقورلىققا قارسى كۇرەستىڭ بارىنشا كۇشەيتىلە تۇسكەنىن، اتالعان ما­سەلەدە مەملەكەتتىك ساياسات «تۋرا بيدە تۋعان جوق…» ۇستانىمىنا شىنايى بەت بۇرعانىن، اتقارۋشى بيلىك جۇيەسىنىڭ ءوز قاتارىنداعى نيەتى بۇزىق، پيعىلى بۇكىر، سىبايلاس جەمقورلىققا شاتىلعان ازاماتتاردان ارىلۋعا دەگەن ۇمتىلىسىن انىق اڭعارۋعا بولادى.

بۇل ءۇردىس حالىقتىڭ بيلىك جۇيەسىنە دەگەن سەنىمىن نىعايتا تۇسەتىنى ءسوزسىز. حالىق ءوزىنىڭ قازىناسىنا زاڭسىز قول سۇققان نەمەسە سەنىپ تاپسىرىلعان قىز­مەتتىك وكىلەتتىگىن كولدەنەڭ تابىس كوزىنە اينالدىرعان ازاماتتارعا مەم­لەكەت ءتيىستى جازاسىن بەرىپ جاتسا، قا­لايشا «بارەكەلدى!» دەمەيدى. بۇل – جۇرت­شىلىقتىڭ اتقارۋشى بيلىككە قا­تىستى كوزقاراسىن جاقسارتاتىن ءۇردىس.

قازىرگى تاڭدا جەمقورلىق پەن پارا­قور­لىققا بايلانىستى «پالەنشە» تەر­گەۋگە الىنىپتى، «تۇگەنشە» ۇستا­لىپ­تى دەگەندەي مازمۇنداعى حابار تارا­سا، حالىق ەلىنە دەگەن قۇرمەتى از، ورتاق قازىناعا ورىنسىز قول سالاتىن پەندەلەردىڭ ءبىر ادامعا ازايعانىنا قۋانىپ قالاتىنداي… بۇل ءسوزىمىزدى اتالعان جايتقا بايلانىستى الەۋمەتتىك جەلىلەردە جازىلىپ جۇرگەن پىكىرلەرگە قاراپ ايتىپ وتىرمىز. ماسەلەن، سوڭعى ۋاقىتتا جەمقورلىقپەن ۇستالعان كەي­بىر تۇلعالار جونىندە الەۋمەتتىك جە­لى­لەردە كوپتەگەن پىكىرلەر جاريالان­دى. ولاردىڭ باسىم بولىگى حالىق دۇ­نيەسىنە زاڭسىز قول سالعانداردىڭ ۇس­تال­عانىن قوس قولىن كوتەرە قول­داي­تىن، ايىپكەرلەردىڭ ءادىل جازاسىن العانىن ءجون ساناعان پىكىرلەر.

جالپى، جۇرتشىلىق جەگىقۇرتقا با­­لايتىن سىبايلاس جەمقورلىقتىڭ كە­لە­شەكتە ءورىسى مەن تىنىسى تارىلا تۇ­سەتىنىن ۇقتىراتىن جاعداياتتار قو­عا­مىمىزدا انىق كورىنە باستاعانداي. بۇل – قۋانارلىق جايت. ەندى بۇل قانداي جاع­داياتتار ەكەنىنە توقتالايىق.

بۇگىندە بالاسىنىڭ لاۋازىمدى قىز­مەتكە جايعاسقانىن تىلەيتىن، بۇل قا­لاۋىنىڭ استارىندا پەرزەنتىنىڭ الگى بيلىگى ارقىلى باۋىرلارى مەن اعاي­­ىن-تۋىستارىنا «كوكە» بولسا، جا­لا­­قىسىنان بولەك ءويتىپ-ءبۇيتىپ اقشا تاپ­­سا دەگەن ويى بۇقپانتايلاعان  اتا-انالاردىڭ پيعىلىنا مۇلدە كە­رە­­عار پىكىردەگى وت­باسىلار پايدا بو­­لۋدا. مۇنداي اتا-انالار بالا­سى­­نىڭ قانداي دا ءبىر لاۋازى­م­-
عا­ تاعايىندالسا، ەلىنە ادال قىزمەت ەت­كە­نىن عانا قالايدى.

ءبىر تانىسىمنىڭ ۇلى تالاپتانىپ ءجۇرىپ، ءوزىنىڭ قابىلەتىمەن اجەپتاۋىر قىزمەتكە ورنالاستى. الگى كىسى بىردە ماعان ۇلىنا جالاقىسىنان وزگە ەش­قان­داي اقشانى قالتاسىنا سالماۋىن، قىزمەتىن پايدالانىپ، ءوزىنىڭ باۋىرلارى مەن اعايىن-تۋىستارىنا قانداي دا ءبىر ارتىقشىلىقتار بەرمەۋىن قاتاڭ ەسكەرتىپ وتىراتىنىن ايتقان. وزىنە سەنىپ تاپسىرىلعان مەملەكەتتىك جاۋاپتى قىزمەت ەشكىمنىڭ قولجاۋلىعىنا اينالماۋى ءتيىس دەپ ويلايتىن تانىسىم بۇل ماسەلەدە اعايىننىڭ وكپە-نازى تۋىنداپ جاتسا، ولارعا ماسەلەنىڭ جاي-جاپسارىن تەرەڭىرەك تۇسىندىرەرمىز دەيدى.

بۇگىندە يسلام دىنىنەن حابارى مول، ونىڭ تىيىمدارىن جاقسى بىلەتىن، نەنىڭ ادال، نەنىڭ حارام ەكەنىن اجىراتا الاتىن، اقىرەتىن ويلايتىن ۇر­پاق­تىڭ تۇتاستاي ءبىر بۋىنى جەتىلىپ كە­لەدى. بۇلاردىڭ وكىلدەرى ءدىنىمىزدىڭ جەم­قورلىقتى حارام سانايتىنىن ۇققاندىقتان، وسىنداي لاس ىسكە بارا قويمايدى. مۇنىڭ ءوزى ەلىمىزدە تاياۋ جىلداردا سىبايلاس جەمقورلىقتىڭ ەداۋىر باسەڭدەيتىنىن مەڭزەيدى.

بۇگىندە دىننەن حابارى مول بۋىن­نىڭ كوپتەگەن وكىلى اقشامەن زاڭسىز الىس-بەرىس جاساۋعا ءماجبۇر ەتۋى مۇمكىن مەملەكەتتىك مەكەمەلەرگە بارىپ قىزمەت ەتۋدەن وزدەرىن اۋلاق ۇستاپ جۇرگەنى – ءومىردىڭ شىندىعى. بۇعان كوپتەگەن مىسالدار كەلتىرۋگە بولادى. جاقىندا ءبىر اعايىننىڭ بالاسى قۇزىرلى زاڭ ورىندارىنىڭ بىرىندە ىستەپ جۇرگەن قىزمەتىنەن سانالى تۇردە باس تارتىپ، باسقا شارۋامەن شۇعىلدانىپ كەتتى. سەبەبىن سۇراعانعا، ول «بىلىققا باتىپ توق جۇرگەنشە، ارىمدى ادال ۇستاپ اش جۇرگەنىم ارتىق» دەپ جاۋاپ بەرگەن.

قورىتا ايتقاندا، مەملەكەتتىڭ سىبايلاس جەمقورلىققا قارسى كۇرەس شارالارىنا قاراپايىم حالىق وكىلدەرى، اسىرەسە، جاستار ىزگىلىكتى جولمەن ۇلەس قوسا باستادى. بۇل ءوز كەزەگىندە قازاق­س­تاننىڭ بولاشاقتاعى دامۋىنا، بەدە­لىنە وڭ ىقپال ەتەتىنى انىق.

جولدىباي

بازار،

«ەگەمەن قازاقستان»

سوڭعى جاڭالىقتار

الماتىدا باقىلاۋ كۇشەيتىلدى

كوروناۆيرۋس • كەشە

تىلىكسىز وتا جاسالدى

مەديتسينا • كەشە

ۇقساس جاڭالىقتار