بىراق ودان دا ماڭىزدىراق ماسەلەنى – ءوزىڭنىڭ ءبىرتۇتاس ۇلى ۇلتتىڭ پەرزەنتى ەكەنىڭدى ۇمىتۋعا استە بولمايدى», دەپ اتاپ كورسەتكەن ەدى. بۇل حالىقتىڭ بىرلىگىنە تىكەلەي قاتىستى. حالىق بىرلىگىن نىعايتا بەرۋدىڭ ءبىر جولى, ۋاقىت سىنىنان وتكەنى – ۇلت وكىلدەرىنىڭ ەلدىڭ بارلىق وڭىرلەرىندە ارالاسىپ-قۇرالاسىپ ءومىر ءسۇرۋى, بارشا تاراپتارداعى, بارلىق دەڭگەيدەگى كادرلار اراسىندا قازاقستاننىڭ قيىر-قيىرىنان كەلگەن ادامداردىڭ بولۋى. كەشەگى كەزەڭدە بۇل جونىنەن ۇيرەنەرلىك جايلار تابىلاتىن.
مىسالى, سوزاقتىڭ قىزىنىڭ الماتىعا وقۋعا ءتۇسىپ, ينستيتۋت بىتىرەردە كادرلىق سۇرانىسقا ساي جولداما بويىنشا اتىراۋدىڭ الىس اۋدانىنان شىعا كەلۋى, سول جەردە جۇمىسقا تۇرۋى, تۇرمىس قۇرۋى, بالالى-شاعالى بولۋى نەمەسە قوستانايدان وقۋعا كەلگەن جىگىتتىڭ جولدامامەن ءوز ماماندىعى قاجەت ەتىلىپ وتىرعان شىعىس قازاقستانعا بارۋى, سول جەردە ۇيلەنىپ, ورنىعىپ قالۋى قالىپتى جاي ەدى. سونداي جاعدايدا حالىقتىڭ تۋىسقاندىعى, باۋىرمالدىعى ارتادى, ۇلتتىڭ ىشكى بىرلىگى كۇشەيەدى. وكىنىشكە قاراي, نارىق جاعدايىندا وسى جاقسى ءداستۇر ۇزىلىڭكىرەپ قالدى.
جول قاراجاتىنىڭ قىمباتتىعىنا, استانا, الماتى سياقتى ءىرى قالالاردا تۇرۋدىڭ قالتاعا باتاتىنداي قيىندىعىنا, گرانتتاردىڭ جەتىمسىزدىگىنە, تيىسىنشە اقىلى وقۋعا تۋرا كەلەتىندىگىنە بايلانىستى جاستاردىڭ باسىم كوپشىلىگى وزدەرىنىڭ وبلىستارىندا وقىپ, ونى بىتىرگەن سوڭ ءوز اۋداندارىنا, ءوز اۋىلدارىنا عانا ورالاتىن بولىپ بارادى.
مۇنىڭ ءوزى پرەزيدەنت اتاپ ايتىپ, قاداپ كورسەتىپ وتىرعان الاڭداتارلىق احۋالعا – جەرشىلدىك پسيحولوگياسىنىڭ دەندەي باستاۋىنا اكەلىپ سوعۋى ابدەن مۇمكىن. ماسەلەنىڭ ەكىنشى قىرى كادرلاردىڭ مامان رەتىندە وسۋىنە, لاۋازىمدىق تۇرعىدان جوعارىلاۋىنا قاتىستى. مينيسترلىكتەر مەن ۆەدومستۆولاردا وبلىستىق قۇرىلىمداردان اۋىسقان, ال وبلىستىق قۇرىلىمداردا اۋداندىق دەڭگەيدەن اۋىسقان كادرلاردىڭ از ەكەندىگى انىق. ويتكەنى اۋداننان, وبلىستان كەرەكتى كادردى الدىرتۋ ولارعا وبلىس ورتالىعىنان نەمەسە ەلوردادان پاتەر بەرۋمەن, ياعني ول ماسەلەنىڭ قارجىلىق جاعىن شەشۋمەن تىكەلەي بايلانىستى.
وسى ءتۇيىن تارقاتىلماعاندىقتان قازىر جەرگىلىكتى كادرلاردى كاسىبي شىڭدالۋعا ۇمتىلدىرىپ تۇراتىن تەتىكتەر السىرەپ بارادى. اۋداندىق دەڭگەيدەگى قىزمەتكەر ءوزىن لايىقتى تانىتقان جاعدايدا وبلىستىق دەڭگەيگە اۋىسا الاتىنىن, وبلىستىق دەڭگەيدەن استاناعا كوتەرىلە الاتىنىن, جالپى ادال جۇمىس ىستەۋ, جاقسى ءجۇرىپ, جاقسى تۇرۋ تيىسىنشە باعالاناتىنىن ءبىلۋ ارقىلى ءوزىن-ءوزى قامشىلايتىن بولادى.
بۇل ماسەلەنى شەشۋ ءۇشىن جوعارى وقۋ ورىندارىن گرانت بويىنشا بىتىرۋشىلەردى مامان قاجەتتىگىنە ساي ءتيىستى جەرلەرگە جولدامامەن جىبەرۋ, جولدامامەن كەلگەن جاس ماماندارعا قاجەتتى قامقورلىق جاساۋ, وسى ماقساتپەن «ديپلوممەن – اۋىلعا!», «سەرپىن» سياقتى باعدارلامالاردى جاڭا دەڭگەيگە شىعارۋ, مەملەكەتتىك قىزمەتكەرلەردى قىزمەتتىك پاتەرمەن قامتاماسىز ەتۋدىڭ زاڭدىق تەتىكتەرىن, قارجىلىق كوزدەرىن تابۋ, كادرلار روتاتسياسىنا جۇيەلى سيپات بەرۋ, سول ارقىلى مەملەكەتتىك قىزمەتكە كادر ىرىكتەۋ مۇمكىندىگىن مولايتۋ قاجەت ەكەندىگى كۇمانسىز. وسى ماسەلەلەردى كورسەتىپ, پرەمەر-مينيستر ب.ساعىنتاەۆتىڭ اتىنا ساۋال جولداندى.
ساۋىتبەك ابدراحمانوۆ,
ءماجىلىس دەپۋتاتى
