جالپى, وسى كەزگە دەيىن جان جاقتى زەردەلەنىپ قابىلدانعان «Four Seasons» جوباسى وڭىرگە تۋريستەردى تارتۋدا ءوزىنىڭ ناتيجەسىن بەرە باستاعان. جوبا اياسىندا جازعى مەزگىلدە ءداستۇرلى حالىقارالىق «بۋراباي-2017» جەلكەندى رەگاتى دا وتكىزىلدى. وعان قازاقستاننىڭ عانا ەمەس, سونىمەن قاتار رەسەيدىڭ ەكاتەرينبۋرگ, ومبى قالالارى مەن وزگە دە وڭىرلەرىنىڭ سپورتشىلارى قاتىستى. تامىز ايىندا وبلىس اكىمدىگى قولداۋىمەن وليمپيادا چەمپيونى, اتاقتى ۆەلوشاباندوز ا.ۆينوكۋروۆتىڭ قاتىسۋىمەن وتكەن قايىرىمدىلىق ۆەلوجارىسى دا بۋراباي كۋرورتتى ايماعىنا ەرەكشە نازار اۋداراتىنى بەلگىلى.
شارانى وتكىزۋ ناتيجەسىندە 150 ميلليون تەڭگە جينالسا, بۇل قارجى مۇمكىندىگى شەكتەۋلى بالالارعا قىزمەت كورسەتۋ ورتالىعىنا مەديتسينالىق قۇرال-جابدىقتار ساتىپ الۋعا باعىتتالدى. سونداي-اق سوڭعى جىلدارى بۋراباي كۋرورتتى ايماعى شەتەلدىك مەيمانداردى دا قىزىقتىرا باستاپتى. اسىرەسە, اتقا ءمىنىپ, سەرۋەندەۋدى ۇناتاتىندار قاتارى كوبەيىپ كەلەدى ەكەن. ولاردىڭ اراسىندا رەسەي, تۇركيا, برازيليا جانە وزگە دە ەلدەردىڭ ازاماتتارى كوپتەپ كەزدەسەدى.
تازا اۋا اياسىندا سەرۋەن قۇرۋشىلار موتوتسيكلدەرمەن دە ساياحاتتاپ جۇرەتىندىگىن بريفينگ وتكىزۋشىلەر ەرەكشە اتادى. تارقاتىپ ايتقاندا, «Elikti Park» تاۋ شاڭعىسى بازاسىندا بايكەرلەردىڭ سلەتى ءوتىپ, وعان قازاقستاننان وزگە رەسەي, ۋكراينا, بەلارۋس جانە بالتىق جاعالاۋى ەلدەرىنەن دە كەلىپ قاتىسىپتى. ماڭىزدى وقيعالاردىڭ ءبىرى رەتىندە مەملەكەت باسشىسىنىڭ قاتىسۋىمەن اشىلعان گولف-كلۋبىنىڭ جۇمىس ىستەي باستاۋى دا قالتالى تۋريستەردىڭ كەلۋىنە وزىندىك ۇلەسىن قوساتىن بولادى. وسىنداي وڭدى ءىس-شارالار ارقىلى تۋريزم سالاسىنداعى بيزنەستى قولداۋعا جاعداي جاسالۋدا.
قىسقى تۋريزمگە دايىندىق قازىردەن قولعا الىنىپ, ءىس-شارالار جوسپارى ءتۇزىلدى. اسىرەسە «قىسقى ەرتەگى» جوباسىن ىسكە اسىرۋ ارقىلى دەمالۋشىلاردىڭ كوڭىل كوتەرۋىنە ەرەكشە ماڭىز بەرىلىپ وتىر. حالىقارالىق كونكۋرس ارقىلى قىسقى قالاشىقتىڭ سالىنۋىنا ۇزدىك سۋرەتشىلەر, ديزاينەرلەر, مۇسىنشىلەر مەن وزگە دە شىعارماشىلىق وكىلدەرى تارتىلادى دەپ كۇتىلۋدە. ەرتەگى قالاشىعى 3 اي قاتارىنان مەيمانداردى قابىلداماق. سونىمەن قاتار «اكەم, انام, مەن – سپورتتىق وتباسىمىز» اتتى فەستيۆال ۇيىمداستىرىلىپ, «سانتا كلاۋستا قوناقتا بولعاندا» اتتى بالالار باعدارلامالارى كوپشىلىك نازارىنا ۇسىنىلادى.
اقمولا وبلىستىق تۋريزم باسقارماسىنىڭ باسشىسى ش.باتىرحانوۆتىڭ ايتۋىنشا, مۇنداي جوبالاردى جۇزەگە اسىرۋ ارقىلى قازاقستاندىق جانە شەتەلدىك تۋريستەرگە بۋراباي كۋرورتتى ايماعى تارتىمدى بولا تۇسەدى. ناتيجەسىندە قىزمەت كورسەتۋ كولەمى ءوسىپ, سالىق ءتۇسىمى ۇلعايىپ, تۋريستىك سالانىڭ دامۋىنا وزىندىك ۇلەس قوسادى. تاعى ءبىر بەلگىلى بولعانى, قازىرگى كەزدە كوكشەتاۋ قالاسىنىڭ اۋەجايى مەن رەسەيلىك ومبى, تۇمەن, ەكاتەرينبۋرگ, چەليابى جانە سۋرگۋت قالالارىمەن تىكەلەي اۋە قاتىناسىن ورناتۋ تۋرالى كەلىسسوزدەر جالعاسۋدا. اقمولا وبلىسى اكىمىنىڭ تۋريزم ماسەلەلەرى بويىنشا كەڭەسشىسى م.يعاليەۆ قوسىمشا رەيستەردىڭ اشىلۋىمەن رەسەيلىك تۋريستەردىڭ اقمولا وبلىسىنا كوپتەپ كەلۋىنە جاعداي جاسالاتىنىن جەتكىزدى.
اسقار تۇراپباي ۇلى,
«ەگەمەن قازاقستان»
اقمولا وبلىسى
