الماتىداعى ءو.جولداسبەكوۆ اتىنداعى ستۋدەنتتەر سارايىندا وتكەن مەرەيلى جيىنعا قوعام قايراتكەرى تالعات ماماشەۆ, بۇرىنعى ۇقك توراعاسى, گەنەرال-لەيتەنانت ءادىل شاياحمەتوۆ, قازاقستاننىڭ ەڭبەك سىڭىرگەن قايراتكەرى ورىنشا قارابالينا-قازىباەۆا, اقىن سەرىك قاليەۆ جانە مەكتەپتىڭ ارداگەر ۇستازدارى مەن تۇلەكتەرى قاتىستى. سالتاناتتى جيىندا ارداگەر مۇعالىمدەرگە قۇرمەت كورسەتىلىپ, مەرەيتويلىق توسبەلگىلەر تابىس ەتىلدى. جالپى, بۇل ءبىلىم مەكەمەسىندە ۇلتتىق ءتاربيەگە باسىمدىق بەرىلگەنىن ەرەكشە ايتقان ابزال.
– قازىرگى تاڭدا مەكتەبىمىزدە 425 بالا ءبىلىم الۋدا. قازاق ءتىلى, ورىس ءتىلى, اعىلشىن تىلىمەن قاتار, بيىل تۇرىك جانە قىتاي تىلدەرىن ەنگىزىپ وتىرمىز. رەسپۋبليكالىق مەكتەپ-ينتەرناتقا اۋىلدىڭ قاراپايىم قارادومالاق بالالارى كەلەدى. ولار وسى مەكتەپتەن ءبىلىم الىپ, ءدارىس الىپ, ەل تانىعان تۇلعالارعا اينالىپ جاتادى, – دەيدى اتالعان مەكتەپ-ينتەرناتتىڭ ديرەكتورى روزا ەربوزىمقىزى.
بۇل ءبىلىم ورداسى باستاپقىدا قازاقستاننىڭ تۇكپىر-تۇكپىرىنەن كەلگەن مالشى قاۋىمنىڭ, اۋىل شارۋاشىلىعى ەڭبەككەرلەرىنىڭ, كوپ بالالى وتباسىلاردىڭ بالالارىنا ارناپ اشىلعان بولاتىن. وقۋشىلار مەن بەلگىلى تۇلعالار اراسىندا ساليقالى سۇحبات ءىسپەتتى جىلى جۇزدەسۋلەر كوپتەپ ۇيىمداستىرىلاتىندىقتان, تۇلعاتانۋ ساباعىنىڭ ءبىر جارقىن ۇلگىسى وسى وقۋ ورداسىندا قالىپتاسقان دەۋگە بولادى. سونداي كەزدەسۋلەردىڭ بىرىندە قازاقستاننىڭ حالىق جازۋشىسى ءازىلحان نۇرشايىقوۆ بالالاردىڭ ونەرىنە ءتانتى بولىپ, «مەن مەكتەپكە ماشينامەن كەلىپ ەدىم, ەندى ۇشاققا مىنگەندەي بولىپ قايتىپ بارامىن. وقۋشىلاردىڭ اندەرىن ەستىگەندە فيلارمونيادا, قويىلىمىن كورگەندە دراما تەاترىندا, ولەڭدەرىن وقىعاندا جازۋشىلار وداعىندا وتىرعانداي سەزىندىم», دەپتى.
سول سياقتى سالتاناتتى كەشتى مەكتەپ-ينتەرناتتىڭ ونەرپازدارى دوڭگەلەتىپ اكەتتى. ءبىلىم جانە عىلىم ءمينيسترى ە.ساعاديەۆتىڭ قۇتتىقتاۋىن مينيسترلىكتىڭ مەكتەپكە دەيىنگى جانە ورتا ءبىلىم, اقپاراتتىق تەحنولوگيالار دەپارتامەنتىنىڭ ديرەكتورى ش.كارينوۆا جەتكىزدى. پەداگوگيكا قىزمەتكەرلەرىنىڭ ىشىندە ۇلجالعاس اعىباەۆا, ساۋلە شابدەنوۆا, ءلاززات نازحانوۆا جانە ارداق جۇسىپبەكوۆا ى.التىنسارين اتىنداعى توسبەلگىمەن, گۇلميرا تايعارينا, سالتانات قالمانبەتوۆا جانە تاربيەشى رىسحان احمەتوۆا «ءبىلىم بەرۋ ءىسىنىڭ قۇرمەتتى قىزمەتكەرى» مەدالىمەن ماراپاتتالدى.
تۇلەكتەر, اسىرەسە, عۇمىرىنىڭ 57 جىلىن ءبىلىم سالاسىنا ارناعان, «ۇستاز باقىتى», «ۇستاز جۇگى قاشاندا اۋىر» سياقتى كوپتەگەن كىتاپ جازعان ورىنشا قارابالينا-قازىباەۆاعا ايرىقشا قۇرمەت كورسەتتى.
– ءبىزدىڭ وقۋشىلار مەكتەپتەن ءبىلىم عانا ەمەس, ۇلكەن تاربيە الدى, وزدىگىنەن ىزدەنۋگە, ەڭبەككە ۇيرەندى. بالالاردىڭ شىعارماشىلىق قابىلەتتەرىن دامىتۋعا مۇمكىندىك جاسادىق. قازىرگى جاڭارتىلعان وقۋ باعدارلاماسىندا العان ءبىلىمدى ومىرگە جاراتۋ, پايدالانۋ دەگەن قاعيدا بۇل مەكتەپتە ەرتە كەزدەن باستالدى, – دەيدى ۇلاعاتتى ۇستاز.
ايناش ەسالي,
«ەگەمەن قازاقستان»
