قوناقتاردىڭ قاتارىندا قر سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى جالعاس ابىلداەۆ, ساۋد ارابياسى ەلىنەن كەلگەن اراب-ورىس اقپارات ورتالىعىنىڭ ديرەكتورى, پروفەسسور مادجيد يبن ابدۋل ازاز ات -تۋركي, قر ۇعا-نىڭ قۇرمەتتى اكادەميگى, حالىقارالىق ن.تورەقۇلوۆ اتىنداعى قايىرىمدىلىق قورىنىڭ پرەزيدەنتى ءاجدىجاپپار ساپارباەۆ, تاريح عىلىمدارىنىڭ دوكتورى, پروفەسسور كاحرامون رادجابوۆ, تاجىكستان رەسپۋبليكاسى كاسىپكەرلىك جانە سەرۆيس ينستيتۋتىنىڭ پروفەسسورى حوتاموۆ ناموز سىندى تۇركى الەمىنە تانىمال عالىمدار بار.
كەزدەسۋ بارىسىندا ءسوز العان وبلىس اكىمى عىلىمي-تاجىريبەلىك كونفەرەنتسيانىڭ ءساتتى وتۋىنە تىلەكتەستىگىن جەتكىزدى.
«بۇگىن مىنە رۋحاني استانامىز – تۇركىستان قالاسىندا مەملەكەت جانە قوعام قايراتكەرى ءنازىر تورەقۇلوۆتىڭ 125 جىلدىق مەرەيتويىنا ارنالعان «الاشتىڭ اسىل پەرزەنتى» اتتى حالىقارالىق عىلىمي-تاجىريبەلىك كونفەرەنتسياسىن وتكىزگەلى وتىرمىز. قازاقتان شىققان تۇڭعىش كاسىبي, بىلىكتى ديپلومات, ەلشىمىزدىڭ ەسىمى كوزى تىرىسىندە-اق حالىقارالىق دەڭگەيدە تانىلىپ, جوعارى باعالانعانىن بىلەمىز. الداعى ۋاقىتتا قايراتكەردىڭ ديپلوماتيالىق مۇراسىن عىلىمي تۇرعىدان زەرتتەۋگە ەرەكشە ءمان بەرۋىمىز قاجەت», - دەدى جانسەيىت قانسەيىت ۇلى.
ءنازىر تورەقۇلوۆ 1928-1936 جىلدارى سول كەزدەگى ەڭ جوعارى ديپلوماتيالىق اتاق – كسرو باس كونسۋلى, توتەنشە جانە وكىلەتتى وكىل دەگەن لاۋازىممەن كەڭەس وداعىنىڭ ساۋد ارابياسىنداعى ەلشىسى قىزمەتىن اتقارعان. سەگىز ءتىلدى جەتىك مەڭگەرگەن ول دجيددادا تىركەلگەن باتىس ەۆروپا ەلدەرى ديپلوماتتارىمەن قويان-قولتىق جۇمىس ىستەپ, سول كەزەڭدە تۋىنداعان كۇردەلى ماسەلەلەردى وڭتايلى شەشىپ وتىرعان.
كەزدەسۋ بارىسىندا قر سىرتقى ىستەر مينيسترلىگىنىڭ ەرەكشە تاپسىرمالار جونىندەگى ەلشىسى جالعاس ابىلداەۆ ءسوز الىپ, وبلىس اكىمىنىڭ كەۋدەسىنە ءنازىر تورەقۇلوۆ اتىنداعى توسبەلگىنى تاقتى. مۇنان سوڭ مەملەكەت جانە قوعام قايراتكەرى قۋانىش ايتاحانوۆ, حالىقارالىق ن.تورەقۇلوۆ اتىنداعى قايىرىمدىلىق قورىنىڭ پرەزيدەنتى ءاجدىجاپپار ساپارباەۆتار ءسوز الىپ, بۇگىنگى شارانىڭ ماڭىزدىلىعىنا توقتالدى.
كەزدەسۋ سوڭىندا وبلىس اكىمى 60 جاسقا تولىپ وتىرعان فيلولوگيا عىلىمدارىنىڭ كانديداتى, جازۋشى, دراماتۋرگ جولتاي ءالماش ۇلىن قۇتتىقتاپ, سىي-قۇرمەت كورسەتتى.
