ەەك توراعاسى تۇڭعىش رەت ەقىۇ تۇراقتى كەڭەس مۇشەلەرىنىڭ الدىندا جاساعان بايانداماسىن ەۋرازيالىق ينتەگراتسيانىڭ ىرگەسىن قالاۋشى قازاقستان پرەزيدەنتى ن.نازارباەۆ بولعانىن اتاپ وتۋمەن باستادى. كوميسسيا توراعاسى قاتىسۋشىلارعا ەۋرازيالىق ەكونوميكالىق وداقتىڭ (ەاەو) قىزمەتى مەن باسىمدىقتارى تۋرالى جان-جاقتى اقپارات ۇسىندى جانە وسى كۇنگە دەيىن ۇيىم شەڭبەرىندە جۇزەگە اسىرىلعان جۇمىستاردى اتاپ ءوتتى.
ۇيىمنىڭ جىبەك جولى ەكونوميكالىق بەلدەۋى اياسىنداعى ىنتىماقتاستىعى مەن اتالعان ەكى جوبانىڭ ساۋدا-ەكونوميكالىق قاتىناستاردا ءبىر-ءبىرىن تولىقتىرعانىن جەتكىزدى. سونىمەن بىرگە قازىرگى تاڭداعى كوميسسيانىڭ بىرىككەن ەنەرگەتيكا جانە قارجى نارىعىن قۇرۋ بويىنشا جۇمىسىنا نازار اۋداردى جانە ەۋروپالىق وداق ەلدەرىمەن اتالعان سالادا ىنتىماقتاستىق ورناتۋعا شاقىردى. ت.سارگسيان ەاەو-نىڭ ەقىۇ-مەن دە ىنتىماقتاستىعىن نىعايتۋعا مۇددەلى بولعانىن مالىمدەدى.
ەلىمىزدىڭ ەقىۇ-داعى تۇراقتى وكىلى قايرات سارىباي قازاقستاننىڭ ەاەو-داعى باسىمدىقتارى مەن ۇيىمعا 2016 جىلعى توراعالىعىندا «ەكونوميكالىق ديپلوماتيا» ماسەلەلەرىنە ەرەكشە ءمان بەرگەنىن, سونىمەن بىرگە جۋىردا سوچيدە وتكەن جوعارعى ەۋرازيالىق ەكونوميكالىق كەڭەستىڭ وتىرىسى بارىسىندا ۇيىمنىڭ نەگىزگى باسىمدىعىنا اينالعان, ەلباسىنىڭ ەاەو شەڭبەرىندە «تسيفرلىق فورماتقا» كوشۋگە ارنالعان ۇسىنىسىنىڭ قابىلدانۋىنا نازار اۋداردى جانە اتالعان ماسەلە بويىنشا ەقىۇ مەن ەاەو اراسىنداعى سينەرگيانىڭ ماڭىزدىلىعىنا توقتالدى.
سونىمەن قاتار ەلشى ەقىۇ پا باسشىسى ك.مۋتتونەننىڭ جۇمىسىن جوعارى باعالادى جانە قازاقستانعا ناتيجەلى ءىسساپارلار جاساعانىنا نازار اۋداردى. ءتورايىمنىڭ ماۋسىم ايىندا ەكسپو-2017 كورمەسىندە ەقىۇ ستەندىنىڭ اشىلۋىنا قاتىسۋىنا, استانادا وتكەن ەقىۇ ەكونوميكا جانە ەكولوگيالىق فورۋمىنىڭ ەكىنشى جينالىسىندا بايانداما جاساۋىنا, تامىزدا «جاڭا يادرولىق قاۋىپ-قاتەرگە قارسى ءىس-قيمىل» تاقىرىبىنا ارنالعان پاگۋوش كونفەرەنتسياسىنا قاتىسۋىنا العىسىن بىلدىرە وتىرا, قازاقستاندا پارلامەنت سەناتى جانە ءماجىلىس توراعالارى, سىرتقى ىستەر ءمينيسترى مەن جوعارى دەڭگەيدە بىرقاتار ۇكىمەت وكىلدەرىمەن كەزدەسۋ ۇيىمداستىرىلۋى ەقىۇ پا-عا دەگەن قازاقستاننىڭ ىقىلاسىن كورسەتەتىنىن مالىمدەدى.
ەقىۇ ەكونوميكا جانە ەكولوگيا كوميتەتىنىڭ توراعاسى – قازاقستان رەسپۋبليكاسىنىڭ ەقىۇ-داعى تۇراقتى وكىلى ق.سارىباي 10 اي بويى اتقارىلعان كوميتەت جۇمىسى تۋرالى ەسەپ بەردى. كوميتەتكە قازاقستان توراعالىعى بارىسىندا ترانسپورت, كوشى-قون, جاقسى باسقارۋ, سىبايلاس جەمقورلىقپەن كۇرەس, ينۆەستيتسيالىق كليمات, ساۋدا, ءوزارا بايلانىستىق, جاڭارمالى ەنەرگەتيكا, تۇراقتى دامۋ ىسپەتتەس ماسەلەلەر كوتەرىلگەنىن جانە ناتيجەسىندە ەقىۇ مينيسترلەر كەڭەسىنىڭ قاراۋىنا ەكونوميكا جانە قورشاعان ورتا بويىنشا شەشىم جوبالارى ەنگىزىلەتىنىن جەتكىزدى.
قازاقستان دەلەگاتسياسىنىڭ كوميتەتتەگى جۇمىسىنا ەۋروپالىق وداق, اقش, ازەربايجان, ۆاتيكان, گرۋزيا, قىرعىزستان, رەسەي, تۇركيا, ۋكراينا دەلەگاتسيالارى جوعارى باعا بەردى.
دايىنداعان
جولدىباي بازار,
«ەگەمەن قازاقستان»
