كەلىسسوز قورىتىندىلارىنىڭ ورىندالۋىنا كەپىلگەر مەملەكەتتەر رەتىندە قاتىسۋشى رەسەي فەدەراتسياسىنىڭ دەلەگاتسياسىن رەسەي پرەزيدەنتىنىڭ سيريا جونىندەگى ارنايى وكىلى الەكساندر لاۆرەنتەۆ, تۇركيا دەلەگاتسياسىن سىرتقى ىستەر ءمينيسترىنىڭ ورىنباسارى سەدات ونال, يران دەلەگاتسياسىن سىرتقى ىستەر ءمينيسترىنىڭ ورىنباسارى حۋسەين دجابەري انساري باسشىلىق ەتۋدە.
كەزدەسۋگە سيريا ۇكىمەتى مەن سيريالىق وپپوزيتسيانىڭ, سونداي-اق بايقاۋشى رەتىندە بۇۇ, اقش جانە يوردانيانىڭ وكىلدەرى قاتىستى. ءىس-شارانىڭ باستالۋىنان ءبىر كۇن بۇرىن كەپىلگەر-ەلدەردىڭ وكىلدەرى ساراپشىلار دەڭگەيىندە ەكىجاقتى جانە ۇشجاقتى كونسۋلتاتسيالار وتكىزگەن بولاتىن. جالپى وتىرىس بارلىق تاراپتىڭ قاتىسۋىمەن بۇگىن, ياعني 31 قازاندا وتەدى.
الداعى كەزدەسۋ سيريادا ۇرىس ءىس-قيمىلدارىن دوعارۋ رەجىمىن نىعايتۋ بويىنشا قول جەتكىزىلگەن ناتيجەلەردى ساقتاۋعا, سونداي-اق داعدارىستى ساياسي رەتتەۋگە ءوتۋ كەزەڭىندە اتالعان ەلدەگى جاعدايدى ءارى قاراي تۇراقتاندىرۋ شەڭبەرىندە كۇش-جىگەرلەردى ارتتىرۋعا باعىتتالعان.
بۇعان دەيىن قازاقستان سىرتقى ىستەر مينيسترلىگى جوعارى دەڭگەيدە وتەتىن كەلىسسوزدە تۇتقىنداردى جانە قاماۋدا وتىرعانداردى بوساتۋ, قازا تاپقانداردىڭ دەنەلەرىن بەرۋ جانە ءىز-ءتۇزسىز جوعالعانداردى ىزدەستىرۋ بويىنشا جۇمىس توبىنىڭ ەرەجەسىن بەكىتۋ جوسپارلانعانىن حابارلاعان بولاتىن. تاراپتار سونىمەن قاتار حالىقارالىق تەرروريزممەن كۇرەس ماسەلەلەرىن قاراستىرىپ, سيريادا مينادان تازارتۋ جۇمىستارىن جۇرگىزۋ تۋرالى بىرلەسكەن مالىمدەمە قابىلداماق نيەتتە.
«ەگەمەن-اقپارات»
