ءبىر ايتا كەتەرلىگى, وتكەن ايدا ساۋد ارابياسىنىڭ تاۋەلسىزدىك كۇنىنە وراي وتكەن فۋتبول ماتچىن تاماشالاۋعا ەر-ريادتاعى ستاديونعا ايەلدەر دە كىرگىزىلگەن بولاتىن. ال ەندى كەلەسى جىلدان باستاپ بارلىق ايەلدەر سپورت ويىندارىن ستاديوننان تاماشالاي الادى. ساۋد ارابياسىنىڭ سپورت ورگانى ازىرگە دايىندىق ەر-رياد, دجيددا جانە داممام قالالارىنداعى ەڭ ءىرى ءۇش ستاديوندا باستالاتىنىن ايتتى. قاجەتتى ينفراقۇرىلىمداردى ەنگىزۋ جۇمىستارى 2018 جىلى اياقتالادى دەپ جوسپارلانىپ وتىر.
ساۋد ارابياسىنىڭ حانزاداسى موحاممەد بين سالمان كورولدىك بۇرىنعىداي بارلىق دىنگە تۇسىنىستىكپەن قارايتىن مەملەكەتكە اينالۋ كەرەك دەپ ەسەپتەيدى. ءدال وسى ماقساتپەن 2 جىل بۇرىن Vision 2030 باعدارلاماسى قابىلدانعان بولاتىن. باعدارلاما بويىنشا جاستار مەن ايەلدەردىڭ مۇمكىندىكتەرى مەن قۇقىقتارىن ارتتىرۋ باستى نازارعا الىنعان. سونىمەن قاتار باعدارلاما ەكونوميكانىڭ مۇنايعا تاۋەلدىلىگىنەن باس تارتىپ, ەڭبەك نارىعىنا جاستار مەن ايەلدەردى كوپتەپ تارتۋدى كوزدەپ وتىر.
نەگىزى ساۋد ارابياسىنداعى جۇيە بويىنشا ايەلدەر وقۋعا ءتۇسۋ, جول ءجۇرۋ ءۇشىن اكەسىنىڭ, اعاسىنىڭ نەمەسە كۇيەۋىنىڭ رۇقساتىن الۋى كەرەك. ەندىگى دامۋ باعدارلاماسىندا كەيبىر نورمالار جەڭىلدەتىلگەن. ءتىپتى, يسلامنىڭ قاتاڭ قاداعالاناۋىن باقىلاپ, كەيدە قاتىگەزدىككە باراتىن ءدىني پوليتسيانىڭ دا مۇمكىندىكتەرى شەكتەلىپ, ولار ۇلكەن قالالاردا ازايعان. ەستەرىڭىزدە بولسا, قوعامدى جاڭعىرتۋ باعدارلاماسى بويىنشا وتكەن ايدا ايەلدەرگە كولىك جۇرگىزۋگە رۇقسات بەرىلگەن بولاتىن.
دەگەنمەن, بۇل رەفورمالارعا قارسى پىكىر بىلدىرۋشىلەر قاتارى دا كۇن ساناپ ارتىپ كەلەدى. الەۋمەتتىك جەلىلەردە «الدىمەن ايەلدەرگە كولىك جۇرگىزۋگە رۇقسات بەرىلدى. ەندى ستاديوندار. ارى قاراي نە بولادى؟» دەپ جازۋشىلار قاتارى كوپ. بىراق ساراپشىلار رەفورمالارعا قارسى كونسەرۆاتيۆتى ورتانىڭ كەرى رەاكتسياسى بولاتىنىن الدىن الا بولجاعان بولاتىن. «باتىل شەشىمدەرگە قاراماستان, 1970 جىلدان بەرى كەلە جاتقان كونسەرۆاتيۆتى كوزقاراستىڭ باسىمدىعىن از ۋاقىتتا جويۋ مۇمكىن ەمەس. ۋلتراكونسەرۆاتيۆتى جانە راديكالدى ەلەمەنتتەر جاڭا باستامالاراعا قاۋىپ توندىرە بەرەدى", دەيدى Eurasia Group اناليتيكالىق كومپانيا ماماندارى.
گۇلنۇر قۋانىشبەكقىزى,
"ەگەمەن قازاقستان"
