پرەمەر-ءمينيستردىڭ ورىنباسارى ا.جۇماعاليەۆ «سكولكوۆو» تەحنوپاركىندە يننوۆاتسيالىق دامۋدىڭ «اشىق يننوۆاتسيالار-2017» VI ماسكەۋ حالىقارالىق فورۋمىنا قاتىستى.بيىلعى فورۋمنىڭ باستى تاقىرىبى – تسيفرلى ەكونوميكا. الەمنىڭ 90 ەلىنەن جينالعان 18 مىڭنان استام قاتىسۋشى تسيفرلى ەكونوميكا مەن الەمدىك اقپاراتتاندىرۋعا قاتىستى عالامدىق ۇردىستەردىڭ ترانسفورماتسيالانۋىن تالقىلاۋدا.
فورۋم اياسىندا «سكولكوۆو» تەحنوپاركىنىڭ بازاسىندا «يننوۆاتسيالىق تەحنولوگيالار پاركى» (يتپ) اۆتونومدى كلاستەرلىك قور وكىلدىگىنىڭ اشىلۋى ءوتتى.
«سكولكوۆوداعى» «يتپ» وكىلدىگىنىڭ اشىلۋى وتكەن اپتادا سوچيدە ۇيىمداستىرىلعان جوعارى ەۋرازيالىق ەكونوميكالىق كەڭەس وتىرىسىنىڭ قورىتىندىسى بويىنشا مەملەكەت باسشىلارى اراسىنداعى كەلىسىم ۇردىسىندەگى ەاەو ەلدەرىنىڭ تسيفرلى ەكونوميكاسىن سايكەستەندىرۋگە جاساعان قارىمدى قادامداردىڭ ءبىرى بولدى.
قازىرگى تاڭدا ءبىز ەلباسىنىڭ تاپسىرماسى بويىنشا ادامي كاپيتالدى جانە پرواكتيۆتى مەملەكەتتى دامىتۋ, تسيفرلى ينفراقۇرىلىمدى جاساۋ جانە ەكونوميكانىڭ بارلىق سالاسىن تسيفرلاندىرۋ ماسەلەسىن قامتيتىن «تسيفرلى قازاقستان» باعدارلاماسىن جەتىلدىرۋمەن اينالىسىپ جاتىرمىز. بۇل باعدارلامادا ەكوجۇيەنى دامىتۋ مەن ونەركاسىپ مەكەمەلەرىن تسيفرلاندىرۋ سياقتى ماڭىزدى ەلەمەنتتەر بولادى. باعدارلاما جۋىردا پىسىقتالىپ جەتىلدىرىلەدى», دەدى پرەمەر-ءمينيستردىڭ ورىنباسارى ا.جۇماعاليەۆ.
قازاقستان ۆيتسە-پرەمەرى ءىسساپار بارىسىندا رەسەي فەدەراتسياسىنىڭ ۇكىمەتى توراعاسىنىڭ ورىنباسارى ا.دۆوركوۆيچپەن كەزدەستى. تاراپتار يننوۆاتسيالىق سەرىكتەستىكتى نىعايتۋ قاجەت ەكەندىگىن ايتىپ, ناقتى باعىتتاردى تالقىلادى.
