بالدىرعاندار «بالداۋرەنگە» بارادى

جۋىردا ارقالىق اۋماعىنا قاراستى فۋرمانوۆ اۋىلىندا «بالداۋرەن» بالاباق­شاسى اشىلدى. «بالاپان» باعدارلاماسى اياسىندا جاڭادان تۇرعىزىلعان ەكى قاباتتى عيماراتتا بۇيىرتسا, 60-قا جۋىق ءبۇلدىرشىن تاربيە الماق. ءبىر-ەكى جىل بۇرىن اتالعان اۋىلدا زامان تالابىنا ساي كەلەتىن ورتا مەكتەپ, وتباسى­لىق دارىگەرلىك امبۋلاتوريا, سىرتى مەن ءىشى اسەم بەزەندىرىلگەن مەشىت بوي كوتەرگەن ەدى. سونىمەن قاتار, مادەنيەت ءۇيى كۇردەلى جوندەۋدەن ءوتىپ اۋىل جاستارىن ءبىر قۋانتىپ تاستاعان. قازىرگى تاڭدا فۋرمانوۆ اۋىلى – ينفراقۇرىلىمى دامىعان ەلدى مەكەن. جاڭا بالاباقشا دا اتالعان جەتىستىكتەر قاتارىندا جىل سايىن كوركەيىپ كەلە جاتقان اۋىلدىڭ تۇرعىندارىن زور قۋانىشقا بولەپ وتىر. تاۋەلسىزدىكتىڭ 20 جىلدىق مەرەيتويىمەن تۇسپا-تۇس كەلگەن «بالداۋرەننىڭ» اشىلۋ سالتاناتىنا حالىقتىڭ ءيىن تىرەسە كەلۋى وسىنىڭ ايقىن دالەلى ىسپەتتەس. «ەل بولام دەسەڭ – بەسىگىڭدى تۇزە» دەگەندەي, مەكتەپكە دەيىنگى تاربيە بەرۋدىڭ ماڭى­زى زور ەكەنى ءسوزسىز. بۇگىنگى زاماندا جان-جاقتى ءارى زاماناۋي جابدىقتالعان بالاباق­شا بولۋى يگىلىكتى ءىس. بۇل ماقساتتى قالا باسشىلىعى ۇنەمى نازاردا ۇستاۋدا ەكەنىن ايتقان ابزال. وسى ورايدا بۇلدىرشىندەردىڭ باستاپقى تاربيە الۋلارىنا وزدەرىنىڭ ۇلەسىن قوسىپ جاتقان شاعىن ورتالىقتارعا توقتال­عان ورىندى بولار. ى.التىنسارين اتىنداعى ارقالىق مەملەكەتتىك پەداگوگيكالىق ينستي­تۋ­تىنىڭ قاراماعىندا وسىنداي ءبۇلدىرشىن­دەرگە ارنالعان ورتالىق يگى ىسكە ۇيىتقى بولۋدا. شاعىن ورتالىقتاردا بالاباقشاداعى ورىن تاپشىلىعى ماسەلەسىنىڭ شەشىلۋىمەن قاتار, بولاشاق پەداگوگتارعا بالالارمەن جۇ­مىس جاساۋعا ماشىقتانۋىنا, مول ءتاجى­ريبە الۋىنا زور مۇمكىندىك قاراستىرىلعان. بۇرىن مۇنداي شاعىن ورتالىق فۋرمانوۆ اۋىلىندا دا بولعانىن ەسكەرسەك, جىل ساناپ دەموگرافيالىق ءوسىمى ۇلعايىپ كەلە جاتقان اۋىلدا قالا باسشىلىعى تولىق بالاباقشا تۇرعىزۋدى ءجون ساناپتى. ەكى قاباتتى عيماراتتى بالاباقشاعا لايىقتاپ, كۇردەلى جوندەۋدەن وتكىزۋ ءۇشىن قالالىق بيۋد­جەتتەن 10 ميلليون تەڭگە ءبولىنىپ, قالا قاراجاتى ەسەبىنەن جاڭا جىلۋ جۇيەسى تارتىلعان. بالاباقشا شتاتىن قۇرۋ مەن ونىڭ جالاقىسىن تولەۋ شىعىندارىن وتەۋ ماقساتىندا رەسپۋبليكالىق بيۋدجەتتەن 5 ميلليون تەڭگە قارجى اۋدارىلعان. قىزعالداق بازاربەك. قوستاناي وبلىسى.