لاتىن قارپىنىڭ دۇنيە جۇزىندە كەڭ قولدانىستا ەكەنى بارشاعا ايان. اسىرەسە اعىلشىن ءتىلىنىڭ, عىلىمي كىتاپتار مەن ماتەريالداردىڭ, عالامتوردىڭ قولدانىسى دەگەندەي. بۇل جەردە جاستارىمىزدىڭ بۇگىندە ەش قينالماي لاتىن قارىپتەرمەن جۇمىس ىستەيتىنى حاق. ۇلكەندەرىمىزدىڭ دە ءبىرازى 1929-1940 جىلدارى تىلىمىزدە قولدانىستا بولعان لاتىن قارىپتەرىمەن تانىس ەكەنى بەلگىلى.
ەگەر وزىمە قاتىستى ايتار بولسام, تاۋەلسىزدىگىمىزدىڭ العاشقى جىلدارىنىڭ بىرىندە ۇلتتىق قاۋىپسىزدىك ورگاندارىنىڭ ارحيۆىندەگى 1937 جىلى قاراعاندى وبلىسى اقتوعاي اۋدانىنىڭ 65 ازاماتىن «حالىق جاۋلارى» دەپ جاۋاپقا تارتقان قىلمىستىق ىسپەن تانىسقانىم بار ەدى. سوندا 8 تومدىق ءىستىڭ ماتەريالدارى بويىنشا قولدانىستا ءتورت ءتۇرلى گرافيكامەن جولىقتىم: ورىسشا, قازاقشا كيريلل, لاتىن جانە اراب (توتە جازۋ) قارىپتەرى. ارابشا جازۋدان باسقاسىن وقىپ-ءبىلۋ قيىندىق تۋعىزباعان ەدى. ودان بولەك اعا بۋىن اقىن-جازۋشىلارىمىزدىڭ ەرتەرەكتەگى شىعارمالارىن, ۇلى وتان سوعىسى مايدانىنان ەلگە جەتكەن اتالارىمىزدىڭ حاتتارىن وقىعانىم دا بار.
ءتىلىمىزدىڭ جالپى لاتىن قارپىنە كوشۋى تۋرالى العاش پارلامەنتكە ۇسىنىلعان نۇسقانى ارداگەرلەر ۇيىمى ورتالىق كەڭەسىنىڭ تورالقا وتىرىسىندا قاراپ, قاتىسقاندار نەگىزىندە قولداعان بولاتىنبىز. بۇل نۇسقانىڭ ءالى ءپىسىپ-جەتىلەتىنىنە سەنىمدى بولعانبىز.
كەيىنگى عالىمدار مەن ماماندار ۇسىنعان ءتۇرلى نۇسقالارىمەن باق تارالىمدارى ارقىلى جالپى جۇرتشىلىقپەن بىرگە ءوز باسىم مۇقيات تانىسىپ ءجۇردىم. وسى ماسەلەنىڭ كوپشىلىك تالقىسىنا سالىنعانى وتە ورىندى بولدى دەپ ەسەپتەيمىن.
ديگرافپەن بەرىلەتىن 8 دىبىس تۋرالى نۇسقانى مەن دە قابىلداي الماي ءجۇر ەدىم. عالىمدار مەن ءتىل ماماندارىنان تۇراتىن كوميسسيانىڭ ەلباسىمىزعا 9 قازاندا جاڭا جوبانى ۇسىنعانىن, ونى نۇرسۇلتان ءابىش ۇلىنىڭ نەگىزىنەن قۇپتاعانىن ريزاشىلىقپەن قابىلدادىم. ويتكەنى جان-جاقتى پىكىرلەردىڭ ءبارىن سارالاپ, تۋىسقان باۋىرلاس ەلدەردىڭ وڭ تاجىريبەسىن, جىبەرگەن قاتەلىكتەرىن, ت.ب. كوپتەگەن تىلدىك ماسەلەلەردى جان-جاقتى ەسكەرىپ ۇسىندى دەپ ويلايمىن. مۇنداعى 32 قارىپ ءتىلىمىزدىڭ بارلىق قاجەتتىلىگىن قامتىپ وتىر دەپ بىلەمىن. وسى جاڭا نۇسقانى نەگىزىنەن ماقۇلداپ, قولداۋعا ارداگەرلەر قاۋىمىن تۇگەلدەي شاقىرامىن.
كوپبولسىن بەكماعانبەت,
رەسپۋبليكالىق ارداگەرلەر
ۇيىمى ورتالىق كەڭەسىنىڭ
جاۋاپتى حاتشىسى
