بۇل رەتكى مادەني شارانىڭ وزەگىنە قازاق اقىنى سۇلتانماحمۇت تورايعىروۆتىڭ شىعارماسىنداعى ەلشىلدىك يدەياسى تاقىرىپ بولدى. ويتكەنى بيىلعى جىلدىڭ ء«بىر ەل – ءبىر كىتاپ» اكتسياسىنا اتالمىش اقىن شىعارمالارى تاڭدالعان بولاتىن. بار-جوعى 27 جىل عۇمىر سۇرگەن اقىننىڭ شىعارماشىلىعى جايلى كەزىندە قازاق ادەبيەتىنىڭ قابىرعالى وكىلدەرى م.بازارباەۆ, ب.كەنجەباەۆ, س.قيراباەۆتار ونى «ابايدان كەيىن قازاق ەلى ىشىندەگى الەۋمەتتىك تەڭسىزدىكتى جەتە كورىپ, ونى ءوز شىعارمالارىنىڭ ارقاۋى ەتە بىلگەن, تالانتتى اقىن» دەپ باعالاعان بولاتىن.
باسقاسىن ايتپاعاندا, جاسى 20-عا تولار-تولماستا جازعان «قاراڭعى قازاق كوگىنە, ورمەلەپ شىعىپ كۇن بولام...» دەيتىن ءورشىل رۋحتى تىركەسى مەن «مەن قازاق» ولەڭىندەگى:
مەن قازاق, قازاقپىن دەپ
ماقتانامىن,
ۇرانعا «الاش» دەگەن اتتى
الامىن.
سۇيگەنىم – قازاق ءومىرى, ءوزىم –
قازاق,
مەن نەگە قازاقتىقتان
ساقتانامىن؟! –
دەيتىن وسى ءبىر شۋماعى شىن مانىندە ۇلكەن جۇرەك قانا ايتا الاتىن, زامانامەن ۇندەسكەن ءسوز.
وسىلاي ونلاين جۇزدەسۋگە قاتىسقان قوس شاھار وقىرماندارى اقىننىڭ ءورشىل جىرلارىنا قانىققان سوڭ, ونىڭ شىعارمالارىنداعى الاششىلدىق تاقىرىبىن قاۋزادى. قاراعاندىلىق اقىن-جازۋشى رۋسلان نۇربايدىڭ مودەراتورلىق تىزگىنىنە باعىنعان كومىرلى قالانىڭ ستۋدەنتتەرى س.تورايعىروۆتىڭ الاش ارداگەرلەرى ءا.ەرمەكوۆ, ب.سارسەنوۆ, ح.عابباسوۆ, ر.مارسەكتەر جازعان «تانىستىرۋ» اتتى تولعاۋىنان ۇزىندىلەر وقىسا, استانالىقتار اتىنان مەنەدجمەنت جانە بيزنەس كوللەدجىنىڭ ستۋدەنتتەرى مەن №48 قازاق ورتا مەكتەپ وقۋشىلارى جانە جەكەلەنگەن كىتاپحاناشىلار اقىننىڭ ءومىربايانى جايلى شەجىرەلىك تانىستىرىلىمىن بايانداپ بەردى.
اسىرەسە ءورشىل اقىننىڭ قازاقتىڭ ءۇش ارىسى جايلى جازعان:
باسىندا ول قاراعىم تۇر عوي
دايىن,
تەز ۇزاق ءومىر بەرسىن ءبىر قۇدايىم.
دۋلاتوۆ, بايتۇرسىنوۆ,
بوكەيحانوۆ,
بىلەمىن بۇل ءۇش ەردىڭ ايتپاي
جايىن.
كەشەگى قارا كۇندە بولماپ پا ەدى,
ءبىرى كۇن, ءبىرى شولپان, ءبىرى ايىم.
سولاردان باسقا كەشە كىم بار ەدى,
قازاق ءۇشىن شام قىلعان جۇرەك
مايىن,
اتتى جىرى تىڭداۋشىلاردىڭ كوكەيىنەن شىقتى.
ماڭىزدى جۇزدەسۋدى قورتىندىلاعان استانا قالالىق ورتالىقتاندىرىلعان كىتاپحانالار جۇيەسىنىڭ ديرەكتورى گۇلبادان ماديباەۆا مەن ج.بەكتۇروۆ اتىنداعى قاراعاندى وبلىستىق جاسوسپىرىمدەر كىتاپحاناسىنىڭ باسشىسى نۇرگۇل قالەنوۆا حانىمدار شاراعا اتسالىسقان وقىرماندارعا راحمەت ايتىپ, ونلاين جۇزدەسۋىنىڭ ناتيجەلى بولعانىنا توقتالدى.
بەكەن قايرات ۇلى,
«ەگەمەن قازاقستان»
