جيىنعا پارلامەنت سەناتىنىڭ توراعاسى قاسىم-جومارت توقاەۆ, قازاقستان سىرتقى ىستەر ءمينيسترى قايرات ءابدىراحمانوۆ, رەسەي سىرتقى ىستەر ءمينيسترى سەرگەي لاۆروۆ, اتالعان وقۋ ورنىنىڭ رەكتورى اناتولي توركۋنوۆ, حالىقارالىق دەڭگەيدەگى ساياسي تۇلعالار مەن قوعام قايراتكەرلەرى, ديپلوماتتار جانە وقۋ ورنىنىڭ تۇلەگى رەتىندە الەمنىڭ ءتۇرلى سالاسىندا جۇرگەن بيزنەس-قاۋىمداستىق وكىلدەرى قاتىستى.
القالى جيىندى اشقان پارلامەنت سەناتىنىڭ توراعاسى ق.توقاەۆ ديپلوماتيالىق قىزمەتتە بىلىكتى ماماندار دايارلاۋدا بۇل وقۋ ورنىنىڭ ماڭىزى جوعارى ەكەندىگىن ايتا كەلىپ, مەملەكەت باسشىسى نۇرسۇلتان نازارباەۆتىڭ فورۋم قاتىسۋشىلارىنا ارناعان قۇتتىقتاۋ حاتىن وقىپ بەردى.
«ماسكەۋ مەملەكەتتىك حالىقارالىق قاتىناستار ينستيتۋتى تۇلەكتەرىنىڭ ءتورتىنشى حالىقارالىق فورۋمىنا قوش كەلدىڭىزدەر. بۇگىن استانادا حالىقارالىق قاتىناستار سالاسىندا الەمدىك دەڭگەيدە بىلىكتى مامانداردى دايىندايتىن بەدەلدى جوعارى وقۋ ورنى تۇلەكتەرى باس قوسىپ وتىر. ۋنيۆەرسيتەت ساياسي, قوعام قايراتكەرلەرى, ديپلوماتتار, جۋرناليستەر, كاسىپكەرلەر سىندى ساڭلاقتار توبىن دايىنداۋدا الما-ماتەر بولىپ سانالادى. بۇل ينستيتۋت تمد ەلدەرىندە عانا ەمەس, الىس شەتەلدە دە جوعارى بەدەلگە يە. وسى جوعارى وقۋ ورنىندا زامان تالابىنا ساي جان-جاقتى, تەرەڭ ءبىلىم الۋعا بولادى. قازىرگى تاڭدا الەمدىك ساياساتتاعى, ەكونوميكاداعى, قوعامدىق ومىردەگى تۋربۋلەنتتى جاعدايلاردا حالىقارالىق قاتىناس ماماندارىنا دەگەن جاۋاپكەرشىلىك ارتا ءتۇستى. سوندىقتان وقۋ ورنىنىڭ الداعى ۋاقىتتاردا اتقاراتىن قىزمەتىنىڭ ماڭىزى زور. اتالعان فورۋمدى ۇيىمداستىرۋ جاقسى ءداستۇر دەپ سانايمىن. وندا تۇلەكتەر الەمدەگى وزەكتى ماسەلەلەر جونىندە ءوزارا پىكىر الماسا الادى. بارلىقتارىڭىزعا فورۋمدا جانە الداعى قىزمەتتەرىڭىزدە ساتتىلىك تىلەيمىن», دەپ جازىلعان ن.نازارباەۆتىڭ حاتىندا.
سونداي-اق فورۋمعا قاتىسۋشىلار الدىندا ءسوز سويلەگەن رەسەي سىرتقى ىستەر ءمينيسترى س.لاۆروۆ تا قازاقستاننىڭ باس قالاسىنا جوعارى باعا بەرگەن رەسەي پرەزيدەنتى ۆلاديمير ءپۋتيننىڭ ارنايى حاتىن وقىپ بەردى. وندا ۆ.پۋتين قازاقستاننىڭ قازىرگى استاناسى كوپجاقتى ديپلوماتيانىڭ ورتالىعىنا اينالعانىن اتاپ وتكەن.
«ماسكەۋ مەملەكەتتىك حالىقارالىق قاتىناستار ينستيتۋتى تۇلەكتەرىنىڭ ءتورتىنشى حالىقارالىق فورۋمىنىڭ اشىلۋىمەن قۇتتىقتايمىن. وسى جىلى جيىنعا ءار ەلدەن قوناقتار كەلدى. مەملەكەتتىك ۆەدومستۆو قىزمەتكەرلەرى, ديپلوماتتار مەن عالىمدار ءارى حالىقارالىق قاتىناس ماماندارىن استانا قالاسى كۇتىپ الدى. استانا – كوپ جاقتى ديپلوماتيانىڭ, حالىقارالىق ەكونوميكالىق قارىم-قاتىناستىڭ ءارى ەۋرازيالىق ينتەگراتسيا ورتالىعىنىڭ ءبىرى بولىپ سانالادى», دەپ جازىلعان رەسەي پرەزيدەنتىنىڭ قۇتتىقتاۋىندا, فورۋمدى ۇيىمداستىرعانى ءۇشىن ەلباسىنا جانە قازاقستاندىقتارعا زور العىسىن بىلدىرگەن.
ءوز كەزەگىندە قازاقستاننىڭ سىرتقى ىستەر ءمينيسترى ق.ءابدىراحمانوۆ ممحقي تۇلەكتەرى حالىقارالىق قاتىناستار سالاسىندا اشىق ديالوگ پەن كاسىبي ديپلوماتيالىق بايلانىستاردىڭ دامۋ جولىندا قوماقتى ۇلەس قوسىپ كەلە جاتقانىن اتاپ ءوتتى. ال ماسكەۋ مەملەكەتتىك حالىقارالىق قاتىناستار ينستيتۋتىنىڭ رەكتورى ا.توركۋنوۆ بولسا, وسىمەن ءتورتىنشى رەت ۇيىمداستىرىلىپ جاتقان اۋقىمدى شارانىڭ ويداعىداي وتۋىنە اتسالىسقان تاراپقا زور العىسىن ءبىلدىردى.
ايتا كەتەيىك, پانەلدىك سەسسيالار اياسىندا كۇنى بويى جالعاسىن تاپقان فورۋم قاتىسۋشىلارى «جاھاندىق ساۋدا, جاڭا قولداۋلار مەن ەكسپو ساباقتارى», «ينتەگراتسيالىق تۇيىسۋدەگى قازاقستان تاجىريبەسى» جانە «25 جىلدان كەيىنگى پوستكەڭەستىك قوعام. ءبىلىم مەن مادەنيەت سالاسىنداعى ارىپتەستىك» تاقىرىپتارىندا وي ءبولىسىپ, پىكىر الماستى.
نۇرلىبەك دوسىباي,
«ەگەمەن قازاقستان»
