ىرگەلى جيىنعا ەلىمىزدىڭ تۇكپىر-تۇكپىرىنەن اقپارات مايدانىنىڭ مايتالماندارى مەن تانىمال تۇلعالار قاتىستى. اپتالىق بارىسىندا مەديا سالاسىنداعى ماڭىزدى ماسەلەلەر تالقىلانىپ, ءتۇرلى ۇسىنىستار جاسالدى.
اپتالىق اياسىندا ۇيىمداستىرىلعان «كونتەنت-ماركەت» دەپ اتالاتىن ارنايى سەسسيا كەزىندە 15 قازاقستاندىق, 7 شەتەلدىك تەلەارنا مەن 90 پروداكشن-كومپانيانىڭ ونىمدەرى تانىستىرىلدى. بۇدان بولەك, اپتالىقتىڭ العاشقى كۇنى «استانا PR كۇنى» اتتى كونفەرەنتسيا ءوتتى. جيىن بارىسىندا PR ترەندتەر جانە كوممۋنيكاتسيا ۆەكتورىنىڭ وزگەرۋى ءسوز بولدى. PG Communications كومپانياسىنىڭ باس ديرەكتورى جانە قوعاممەن بايلانىس جونىندەگى ۇلتتىق اسسوتسياتسيا كەڭەسىنىڭ ءتورايىمى اسەل قاراۋىلوۆا كوممۋنيكاتسيانى دامىتۋدى جۇيەگە ءتۇسىرۋ كەرەك ەكەنىن تىلگە تيەك ەتتى. ونىڭ ايتۋىنشا, مۇنداي جيىندار PR ماماندار مەن ءباسپاسوز حاتشىلارىنىڭ كاسىبي دەڭگەيىن كوتەرەدى. كونفەرەنتسيادا تايم-مەنەدجمەنت, ەموتسيالىق كۇيىنۋ جانە KPI كورسەتكىشىن كوتەرۋ سەكىلدى كوممۋنيكاتسيا سالاسىنىڭ ماڭىزدى تاقىرىپتارى توڭىرەگىندە اۋقىمدى پىكىرتالاس ءوتتى.
جيىننىڭ ەكىنشى كۇنىندە دە بىرقاتار ماڭىزدى باسقوسۋلار ءوتتى. Astana Digital Forum دەپ اتالاتىن شارادان باستالعان كۇن بۇقارالىق اقپارات قۇرالدارى جۋرناليستەرىنىڭ بىلىكتىلىگىن ارتتىرۋعا ارنالعان سەمينارلارمەن جالعاستى.
فورۋمدا تسيفرلى تەحنولوگيالارعا قاتىستى كۇن تارتىبىندە تۇرعان بىرقاتار ماسەلەلەر ءسوز بولدى. قازىرگى تاڭدا تسيفرلى تەحنولوگيانىڭ جاعدايىن باعامداۋ وتە قيىن. قازاقستان تاراپىنىڭ وسى جاھاندىق ۇدەرىسكە ىلەسۋى جانە ونداعى كەلەلى ماسەلەلەردى تالقىلاۋى ەلىمىزدىڭ باعىتى دۇرىس ەكەنىن كورسەتەدى. شالعاي اۋىل تۇرعىندارىنىڭ تسيفرلى تەحنولوگياعا ەركىن قول جەتكىزۋى باسەكەگە قابىلەتتى بولۋعا مۇمكىندىك بەرەدى. جيىن بارىسىندا 2021 جىلعا قاراي تاعى ەكى ميلليون تۇرعىن ينتەرنەتكە قوسىلاتىنى ايتىلدى.
ءىس-شارادا مەملەكەتتىك تىلگە قاتىستى ماسەلەلەر دە ءسوز بولدى. قازاقشا ۋيكيپەديانىڭ نەگىزىن سالۋشى نۇرتاي ءاشىمنىڭ سوزىنە سۇيەنسەك, بيىل انا تىلىمىزدەگى كونتەنتكە سۇرانىس كوبەيگەن. سوندىقتان عالامتورداعى قازاقشا ماتەريالداردى كوبەيتۋ ۋاقىت كۇتتىرمەيدى. ن.ءاشىمنىڭ ايتۋىنشا, كەيىنگى ۋاقىتتا انا تىلىمىزدەگى ۋيكيپەديانى وقيتىندار سانى 35 پايىزعا كوبەيگەن.
قازاق تىلىندەگى كونتەنتتى كوبەيتۋ ماسەلەسى اپتالىقتىڭ العاشقى كۇنى دە ءسوز بولدى. «استانا» ارناسىنىڭ باس ديرەكتورى ءلاززات تانىسباي ارىپتەستەرىن انا تىلىمىزدەگى ونىمدەردى كوبەيتۋگە شاقىردى. ونىڭ پىكىرىنشە, قازىرگى تاڭدا قازاقشا ونىمگە سۇرانىس جوعارى. «بولاشاق» كورپوراتيۆتى قورىنىڭ ديرەكتورى دينارا ءشايجۇنىسوۆا دا شوقان مەن ابايدىڭ تىلىندەگى ماتەريالداردى كوبەيتۋ كەرەك دەپ ەسەپتەيدى. ونىڭ سوزىنە ساي, Disney سەكىلدى الپاۋىت كومپانيالاردىڭ ونىمدەرىن قازاق تىلىنە اۋدارىپ, وتاندىق تەلەارنالاردان كوپتەپ كورسەتۋ كەرەك.
مەديااپتالىق اياسىندا قازاق ءتىلدى بۇقارالىق اقپارات قۇرالدارىنا ارنالعان بىلىكتىلىك سەمينارلارى ءوتتى. ەكى بولىكتەن قۇرالعان شارادا اقپارات تەكسەرۋ, جاڭا مەديانىڭ ءتيىمدى قۇرالدارى جانە كونۆەرگەنتتىك جۋرناليستيكا سەكىلدى ماسەلەلەر توڭىرەگىندە ءسوز بولدى.
بىلىكتىلىكتى ارتتىرۋعا ارنالعان سەميناردا جۋرناليستەرگە كەرەكتى بىرقاتار كومەكشى قۇرالدار تانىستىرىلدى. مەديا ترەنەرلەردىڭ سوزىنە سۇيەنسەك, Google كومپانياسىنىڭ ونىمدەرى مەديا سالاسىنىڭ ماماندارىنا وتە قاجەت. سونداي-اق ءىس-شارا بارىسىندا جۋرناليستەردىڭ جالعان اقپاراتقا قارسى قالاي كۇرەسۋى كەرەك ەكەنى دە ايتىلدى. Youtube, Google سەكىلدى سايتتاردى پايدالانىپ, فەيك جاڭالىقپەن كۇرەسۋدىڭ جولدارى تانىستىرىلدى.
اپتالىقتىڭ سوڭعى كۇنى وڭىرلىك بۇقارالىق اقپارات قۇرالدارىنىڭ فورۋمى ءوتتى. جيىنعا اقپارات جانە كوممۋنيكاتسيالار ءمينيسترى داۋرەن اباەۆ پەن ءماجىلىس دەپۋتاتى ساۋىتبەك ءابدىراحمانوۆ قاتىستى. ەلىمىزدىڭ تۇكپىر-تۇكپىرىنەن كەلگەن جۋرناليستەردىڭ جيىنىندا مينيستر «Astana Media Week» سەكىلدى كولەمدى شارانىڭ ەلىمىزدەگى مەديا سالاسىن دامىتاتىنىن اتاپ ءوتتى. سونىمەن قاتار ۆەدومستۆو باسشىسى باق سالاسىندا اتقارىلىپ جاتقان بىرقاتار جۇمىستارعا توقتالدى. ونىڭ ايتۋىنشا, قازىرگى تاڭدا رەسپۋبليكالىق جانە وڭىرلىك بۇقارالىق اقپارات قۇرالدارىنىڭ ءوزارا ارىپتەستىك ورناتۋى جاڭارتىلماق. سوعان سايكەس ايماقتاعى مەديا قۇرالدارى رەسپۋبليكالىق ارىپتەستەرىنەن ەمىن-ەركىن ماتەريال الماسا الادى.
فورۋم بارىسىندا ايماقتىق باق-تارعا جانە جۋرناليستيكا سالاسىنىڭ كۇن تارتىبىندەگى ماسەلەلەرى ايتىلدى. «Qazaqstan» تەلەارناسىنىڭ باسشىسى ەرلان قارين تەلەارنالار مەن ينتەرنەت قۇرالدارى اراسىندا اۋديتورياعا تارتىس ءجۇرىپ جاتقانىن ءسوز ەتتى. «بولاشاق جاستار» گازەتىنىڭ رەداكتورى داۋرەن بابامۇراتوۆ ينتەرنەت سايتتارى رەيتينگ پەن سەنساتسيا قۋالاپ, اقپاراتتىڭ نەگىزگى بولىگى نازاردان تىس قالعانىنا توقتالدى. ول اتالعان سايتتاردىڭ باسشىلىعىن وسى ماسەلەگە نازار اۋدارۋعا شاقىردى.
اپتالىقتىڭ قورىتىندىسى رەتىندە ەلدەگى بىرقاتار ءباسپاسوز قىزمەتى ماراپاتتالدى. وسىعان ساي «ەڭ ۇزدىك ءباسپاسوز قىزمەتى» اتالىمى بويىنشا ينۆەستيتسيالار جانە دامۋ مينيسترلىگى توپ جاردى. ال جەرگىلىكتى اتقارۋشى ورگاندار اراسىنان باتىس قازاقستان وبلىسىنىڭ ءباسپاسوز قىزمەتى ەڭ ۇزدىك دەپ تانىلسا, كومپانيالار اراسىندا «قازاقستان تەمىر جولى» اكتسيونەرلىك قوعامىنىڭ اسىعى الشىسىنان ءتۇستى. كورپوراتيۆتىك سايتتار اراسىندا استانا قالاسى اكىمىنىڭ ءباسپاسوز قىزمەتى وزىق شىقتى. «كاسىبي مويىندالۋ» اتالىمىندا ىشكى ىستەر مينيسترلىگى توتەنشە جاعدايلار كوميتەتىنە تەڭ كەلەر ەشكىم بولعان جوق. سىرتقى ىستەر مينيسترلىگىنىڭ ءباسپاسوز حاتشىسى ءانۋار جايناقوۆ جىلدىڭ ەڭ ۇزدىك ءباسپاسوز حاتشىسى دەپ تانىلدى.
اپتالىققا قاتىسقان ماماندار مۇنداي ءىس-شارانىڭ قاتىسۋشىلارعا وزىق تاجىريبەلەرمەن تانىسىپ, شەبەرلىك شىڭداۋعا جانە جاڭا تەحنولوگيالاردى ەل يگىلىگىنە پايدالانۋعا بەرىلگەن ۇلكەن مۇمكىندىك ەكەنىن ءسوز ەتتى. سونىمەن قاتار جيىننىڭ مەديا سالاسىنداعى سەرىكتەستىك قاتىناستار مەن حالىقارالىق ىنتىماقتاستىقتى دامىتۋعا ەلەۋلى ۇلەس قوساتىنىنا سەنىم ءبىلدىردى.
اباي اسانكەلدى ۇلى,
«ەگەمەن قازاقستان»
