«دينامومەن» بولعان ويىندا ەلوردا كومانداسىنا ساتتىلىك جەتىسپەدى. العاشقى گولدى ماتچتىڭ 13-مينۋتىندا «بارىستىڭ» حوككەيشىسى تالعات جايلاۋوۆ سوققان ەدى. بىراق كەزدەسۋدىڭ 19-شى جانە 38-مينۋتتارىندا الەكساندر كيتاروۆ پەن كۋينتون حاۋدەن ەكى شايبامەن جاۋاپ بەرىپ, «دينامونى» العا شىعارعان. ويىننىڭ اياقتالۋىنا ساناۋلى سەكۋندتار قالعاندا تالعات جايلاۋوۆ ارىپتەسى نايدجەل دوۋسقا ءدال پاس بەرىپ, ءوز كەزەگىندە كاپيتان مۇمكىندىكتى ءمۇلت جىبەرمەدى. وۆەرتايمدا ەكى كوماندا يتجىعىس ءتۇسىپ, كەزدەسۋ تاعدىرىن بۋلليت شەشتى. بۇل سىندا «دينامونىڭ» جولى بولىپ كەتتى.
ال سوچيدە وتكەن كەزدەسۋدە ەۆگەني كورەشكوۆتىڭ شاكىرتتەرى تىم سىلبىر وينادى. «بارىستىڭ» قاقپاسىن قورعاعان سەرگەي كۋدرياۆتسەۆكە «سوچي» ساپىنان ميحايل يۋنكوۆ ەكى (9-شى جانە 33-مينۋتتار) جانە كەيسي ۋەللمەن ءبىر شايبا (36) سالدى. ءۇش بىردەي گول جىبەرگەن كۋدرياۆتسەۆتىڭ ورنىنا باپكەرلەر حەنريك كارللسوندى شىعارعان ەدى. بىراق بۇدان تابلوداعى ەسەپ وزگەرە قويمادى. بار بولعانى ماتچتىڭ 53-مينۋتىندا مارتەن سەن-پەر اۋپىرىممەن گول سوعىپ, «بارىس» تاراپىنان سوعىلعان جالعىز شايبانىڭ اۆتورى اتاندى.
سونىمەن, 18 ويىندا 29 ۇپاي العان «بارىس» شىعىس كونفەرەنتسياسى بويىنشا التىنشى ورىندا كەلەدى. كوماندا كەلەسى ويىنىن ەرتەڭ ومبىدا «اۆانگارد» حوككەي كلۋبىمەن وتكىزەدى.
قايرات ءابىلدا,
«ەگەمەن قازاقستان»
