باياناۋىلعا ساپارىمىزدا تاۋ باۋرايىندا وتىرعان اۋىلدارعا دا بارىپ قايتامىز. ءبىر اقساڭنىڭ ءوزى اينالا قاپتاعان قالىڭ تاۋلى كورىكتى تابيعاتتىڭ ورتاسىندا. كوركەمدىگىن ساقتاپ, دۇرىس كوزقاراسپەن قاراسا, جازعى-قىسقى تۋريزمگە سۇرانىپ-اق تۇرعان جەر. سابىندىكولدىڭ جاعاسىنداعى رەسپۋبليكالىق ماڭىزداعى ۇلكەن جول تاۋ ىشىمەن ءجۇرىپ وتىرىپ, اقساڭ اۋىلىنا الىپ كەلەدى.
– اۋداننىڭ تۇرعىن ءۇي-كوممۋنالدىق شارۋاشىلىعى بولىمىندە جوبالاۋ-سمەتالىق قۇجات دايىن, قاراجات ماسەلەسى شەشىلسە, كۇتىپ تۇرعان اۋىل جولى دا جوندەلىپ قالار, – دەدى اۋىل اكىمى كەنجەبەك دۇيسەنباەۆ.
اۋىل اۋدان ورتالىعىنىڭ ىرگەسىندە ورنالاسقان. جالعىزقايىڭ, قاراجار اۋىلدارىن قوسقاندا اقساڭ اۋىلدىق وكرۋگىنىڭ اۋماعىندا مىڭعا جۋىق حالىق تۇرادى. وسى مىڭنىڭ 514-ءى جۇمىستا, كوپشىلىگى باياناۋىل ۇلتتىق پاركىنە قاراستى ورمان شارۋاشىلىقتارىندا تۇراقتى جانە ماۋسىمدىق ۋاقىتتاردا ەڭبەك ەتەدى ەكەن.
اۋىل اكىمى كەنجەبەك دۇيسەنباەۆ وڭتۇستىك قازاقستان وبلىسىنا بارىپ, سولتۇستىككە كەلەتىن وتباسىلاردىڭ ءبىر-ەكەۋىن ماقتاارال اۋدانىنان باياناۋىلدىڭ اقساڭىنا كوشىرىپ الىپ كەلىپتى. الداعى ۋاقىتتا تاعى دا بارىپ, بىرنەشە وتباسىن كوشىرىپ اكەلۋ ماقساتى بار. كوشىپ كەلگەن بەيبىتجان مەن ءالىمجاننىڭ وتباسىلارى قازىردىڭ وزىندە جەر الىپ, جىلىجاي اشىپ, كوكونىس وسىرەمىز دەپ دايىندالۋدا.
اۋىل بالالارىنىڭ وقىپ-ءبىلىم الۋلارىنا بارلىق جاعداي جاسالىپتى. قالىڭ قارلى, تابيعاتى عاجاپ مىرزاشوقى باۋرايىندا وسكەن اۋىل بالالارى شەتىنەن شاڭعىشى كورىنەدى. اۋدان بويىنشا وتەتىن قىسقى سپورتتىق جارىستاردا ءۇش اۋىلدىڭ سپورتشىلارى جۇلدەلى ورىنداردى يەلەنىپ ءجۇر ەكەن. جەلاياق جاس شاڭعىشىلار ولجاتاي مۇراتبەك, مارال يسمايلوۆانىڭ, ەرەسەكتەر اراسىندا ارايلىم سەمبەكوۆا, تولەگەن تولەۋباەۆتىڭ ەسىمدەرى ۇنەمى ۇزدىكتەر قاتارىندا اتالادى.
ءبىر وكىنىشتىسى, شاعىن مەكتەپتەردە بالا سانىنىڭ ازايۋ مىسالدارى باياناۋىل اۋىلدارىنىڭ بارىندە كەزدەسەدى. اقساڭدا بىلتىر بار-جوعى 7 وقۋشى مەكتەپ ءبىتىرىپتى. سوندىقتان اۋىل اكىمدىگى الداعى ۋاقىتتا تاعى دا وڭتۇستىك وڭىردەن بىرنەشە وتباسىن كوشىرىپ اكەلۋدى جوسپارلاپ وتىر.
مىرزاشوقى – قارارجار اۋىلى ماڭىندا, تاۋداعى شاڭعى كەشەنى وسى جەردەن اشىلماقشى. قىسقى ءتۋريزمدى قولعا العاندار ەندى تاۋ-تاستى قازىپ, جول جاساماق. اۋىل تۇرعىندارى دا شاڭعى كەشەنىن تۇرعىزۋعا قاتىسىپ, جۇمىسقا الىنىپتى. تاۋ باۋرايىنداعى تىنىشتىقتى قۇرىلىس داۋىسى بۇزعانداي. بيىك تاۋعا ەلەكتر ەنەرگياسىن تارتىپ, جولدى جوندەۋدى ايتپاعاننىڭ وزىندە, مىرزاشوقىعا باسقا دا ينفراقۇرىلىمدار تارتىلماق. ءبىز كەلگەندە تۇركيادان ورىندىقتارى بار ارقان جول اكەلىنىپ, قۇراستىرىلىپ جاتىر ەكەن. بيىكتىگى ءبىر شاقىرىمدى قۇرايتىن تاۋدان 800 مەتر تومەنگە قاراي سىرعانايتىن ارنايى جول سالىنۋدا. ياعني, الداعى ۋاقىتتا ءۇش اۋىلعا تۋريستەر كەلە باستايدى. بۇل – اۋىل ءۇشىن جۇمىس كوزى. مىرزاشوقىنىڭ الەۋەتى ارتادى.
تاۋ باۋرايىنداعى اۋىلداردىڭ الەۋمەتتىك-تۇرمىستىق جاعدايلارى دا تۋريستىك الەۋەتپەن جاراسىم تابار. تۋريزمنەن تۇسەر پايدانىڭ ارقاسىندا جالعىزقايىڭ اۋىلىنىڭ بالالارىن مەكتەپكە تاسىمالداۋعا جاڭادان اۆتوبۋس الىنىپ, قاراجار اۋىلىنا شاعىن مەكتەپ سالىپ بەرىپ, ابدەن ەسكىرگەن سۋ قۇبىرلارى, جولدارى جوندەلىپ, اقساڭ اۋىلدىق وكرۋگىنىڭ ەڭسەسى كوتەرىلىپ, ءبىر جاڭارىپ قالار دەگەن ويدامىز.
فاريدا بىقاي,
«ەگەمەن قازاقستان»
پاۆلودار وبلىسى,
باياناۋىل اۋدانى
