جيىنعا قاتىسقان وقو اكىمى جانسەيىت تۇيمەباەۆ فورۋمنىڭ حالىقارالىق فورماتتا ۇلتتىق قۇندىلىقتاردىڭ قاينارى بولعان وڭتۇستىك قازاقستان وبلىسىندا وتكىزىلىپ وتىرعاندىعىن ۇلكەن جەتىستىككە بالادى.
«مەملەكەت باسشىسى نۇرسۇلتان ءابىش ۇلى نازارباەۆ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا كونەنىڭ كوزىندەي بولعان ۇلتتىق قۇندىلىقتاردى زامان اعىمىنا ساي قايتا تۇلەتۋدى مىندەتتەگەن ەدى. مەدياتسيا باياعى «جەتى جارعىنىڭ» بۇگىنگى جالعاسى رەتىندە حالىقتىڭ بايىرعى مامىلەگەرشىلىك ءداستۇرىن جالعاستىرىپ وتىر. ول سونداي-اق, داۋلاسۋشى تاراپتاردى ءوزارا كەلىسىمگە كەلتىرىپ, ورتاق پايىم جاساۋعا جەتەلەيدى», - دەدى جانسەيىت قانسەيىت ۇلى.
رەسپۋبليكالىق فورۋمعا قر پرەزيدەنتى اكىمشىلىگى قحا حاتشىلىعىنىڭ مەڭگەرۋشىسى دارحان مىڭباي, قر «اتامەكەن» ۇلتتىق كاسىپكەرلەر پالاتاسىنىڭ باسقارما توراعاسى ابىلاي مىرزاحمەتوۆ, قر پارلامەنتى ءماجىلىسىنىڭ دەپۋتاتتارى, قر جوعارعى سوتىنىڭ سۋديالارى, قر باس پروكۋراتۋراسىنىڭ, قر ءبىلىم جانە عىلىم مينيسترلىگىنىڭ, قر پرەزيدەنتى جانىنداعى «قوعامدىق كەلىسىم» رمم-ءنىڭ وكىلدەرى, قحا جانىنداعى مەدياتسيا كەڭەسىنىڭ مۇشەلەرى, بارلىق وبلىستارداعى مەدياتسيا ورتالىقتارىنىڭ جەتەكشىلەرى مەن «قوعامدىق كەلىسىم» كمم-ءنىڭ جانىنداعى مەدياتسيا كابينەتتەرى مەڭگەرۋشىلەرى قاتىستى.
ءىس-شارا مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىنداعى ۇلتتىق بىرگەيلىكتى ساقتاۋدى, 2011 جىلى قابىلدانعان قر «مەدياتسيا تۋرالى» زاڭىنىڭ ورىندالۋىن سارالاپ, الداعى مىندەتتەردى بەلگىلەۋدى, بىتىمگەرشىلىككە نەگىزدەلگەن حالقىمىزدىڭ ءداستۇرلى بيلەر تاعىلىمىمەن ساباقتاسىپ جاتقان بۇگىنگى مەدياتسيا جەلىسىن دامىتۋدى, قوعامدىق كەلىسىم مەن جالپىۇلتتىق بىرلىك سالاسىنداعى مەملەكەتتىك ساياساتتى پايىمدى پاراساتتىلىقپەن ىسكە اسىرۋدى كوزدەيدى.
فورۋمدا قازاقستان حالقى اسسامبلەياسى توراعاسىنىڭ ورىنباسارى دارحان مىڭباي بايانداما جاسادى. سونداي اق, قر پارلامەنتى ءماجىلىسىنىڭ دەپۋتاتى ب.ءابدىرايىمنىڭ, قر سۋديالار وداعىنىڭ توراعاسى ە.اليمبەكوۆتىڭ, قر باس پروكۋرورىنىڭ اعا كومەكشىسى م.تۇرسىنبەكوۆانىڭ جانە شىعىس قازاقستان وبلىستىق «قوعامدىق كەلىسىم» كمم باسشىسى ە.تولەۋبەكوۆتىڭ, وڭتۇستىك قازاقستان وبلىستىق «قوعامدىق كەلىسىم» كمم باسشىسى ە.بايقوناقوۆتىڭ, ماڭعىستاۋ وبلىستىق «قوعامدىق كەلىسىم» كمم باسشىسى س.ساتاليەۆانىڭ, سايرام اۋدانىنداعى كاسىبي ەمەس مەدياتور س.يۋسانوۆتىڭ حابارلامالارى تىڭدالدى.
فورۋم اياسىندا قحا جانىنداعى مەدياتسيا كەڭەسى مەن وڭتۇستىك قازاقستان وبلىسى اكىمدىگىنىڭ, قحا جانىنداعى مەدياتسيا كەڭەسى مەن «اتامەكەن» ۇلتتىق كاسىپكەرلەر پالاتاسىنىڭ ءوزارا ىنتىماقتاستىق تۋرالى مەموراندۋمعا قول قويىلدى.
ايتا كەتەرلىگى, ەلباسى قازاقستان حالقى اسسامبلەياسىنىڭ XXIV سەسسياسىندا مەدياتسيا جەلىسىن دامىتۋدى اسسامبلەياعا جۇكتەگەن بولاتىن. بۇل باعىتتا قحا جانىندا مەدياتسيا كەڭەسى قۇرىلىپ, وڭىرلەردەگى دوستىق ۇيلەرىندە 17 مەدياتسيا كابينەتتەرى اشىلدى. ەلىمىزدە قىزمەت ەتەتىن 640 كاسىبي, 3583 كاسىبي ەمەس مەدياتورلاردىڭ دەرەكقورى جاسالدى. قحا مەن قر جوعارعى سوتىنىڭ اراسىندا تۇزىلگەن ءوزارا ىنتىماقتاستىق تۋرالى مەموراندۋم اياسىندا 2017 جىلى ارنايى پيلوتتىق جوبا قولعا الىنىپ, ناتيجەسىندە جىل باسىنان بەرى 13974 ءىس مەدياتسيا تارتىبىمەن شەشىلدى.
ال, وڭتۇستىك قازاقستان وبلىستىق «قوعامدىق كەلىسىم» مەكەمەسىندە اشىلعان مەدياتسيا كابينەتىندە 600-گە جۋىق ازاماتقا قۇقىقتىق كومەك كورسەتىلدى. وبلىستاعى 4 مەدياتسيا ورتالىعىمەن ارىپتەستىك بايلانىس ورناتىپ, وڭىردە قىزمەت اتقاراتىن 44 كاسىبي, 546 كاسىبي ەمەس مەدياتورلاردىڭ دەرەكقورى ءتۇزىلدى. وڭىردەگى مەدياتورلاردىڭ ىقپالىمەن بىلتىرعى جىلى 4 مىڭنان استام ءىس بويىنشا تاراپتار ورتاق مامىلەگە كەلسە, بيىلعى جىلدىڭ 8 ايىندا 3207 ءىس سوتقا دەيىنگى تارتىپپەن شەشىلدى.
