«سارجايلاۋ», «قۇستار ءانى», ء«وز ەلىم!» سياقتى ومىرشەڭ اندەرىمەن جانە «القيسسا», «اتا تولعاۋ» سىندى كوركەم كۇيلەرىمەن قازاقتىڭ مۋزىكا تاريحىندا قالعان كورنەكتى كۇيشى, كومپوزيتوردىڭ شىعارمالارى ءالى تالاي ۇرپاقتىڭ رۋحاني ولجاسىنا اينالارى حاق. قازاقتىڭ سايىن ساحاراسىن انمەن الديلەپ, كۇيمەن تەربەتكەن ۇلى دارىننىڭ اتىندا ەلىمىزدە جىل سايىن ءتۇرلى فەستيۆالدەر مەن كونكۋرستار ۇيىمداستىرىلۋدا. جۋىردا ۇلى كومپوزيتوردىڭ شىعارمالارى اۋليەاتا اسپانىندا اۋەلەپ, تىڭدارمانداردىڭ قۇلاق قۇرىشىن قاندىردى. بايزاق اۋدانىنداعى ءال-فارابي اتىنداعى مادەنيەت ۇيىندە وبلىستىق مادەنيەت, ارحيۆ جانە قۇجاتتاما باسقارماسىنىڭ ۇيىمداستىرۋىمەن بەسىنشى رەت «كەل, ەركەم, الاتاۋىڭا!» اتتى نۇرعيسا تىلەنديەۆتىڭ شىعارماشىلىعىنا ارنالعان انشىلەر مەن كۇيشىلەردىڭ رەسپۋبليكالىق بايقاۋى ءوتتى.
اتالعان بايقاۋعا ەلىمىزدىڭ ءار تۇكپىرىنەن 23 ۇمىتكەر قاتىسىپ, ءوز ونەرلەرىن كورسەتتى. بايگەگە قاتىسۋشىلار ساحنا مادەنيەتى مەن ورىنداۋ شەبەرلىگىن ۇشتاستىرىپ, كوپشىلىككە كوتەرىڭكى كوڭىل-كۇي سىيلادى. ال بايقاۋعا ەلىمىزدىڭ ەڭبەك سىڭىرگەن مادەنيەت قايراتكەرلەرى سايات مەدەۋوۆ, مۇحتارباي راحمانقۇلوۆ جانە بەلگىلى كۇيشى-سازگەر امان مالدىباەۆ قازىلىق جاساپ, ۇمىتكەرلەردىڭ لايىقتى باعاسىن بەردى.
ناتيجەسىندە بايقاۋدىڭ باس جۇلدەسىن جامبىلدىق اسەل ۋاشەۆا جەڭىپ السا, ءبىرىنشى ورىندى استانالىق باتىرحان ابەنوۆ پەن قىزىلوردالىق ارۋجان قويشىعارا يەلەندى. سونىمەن قاتار, ەكىنشى ورىن استانالىق نۇريددين قۇدايبەرگەنوۆ پەن شىمكەنتتىك بەك نۇريددينگە بۇيىرسا, الماتىلىق ۇلجان اعلاقوۆا, جامبىلدىق دۋلات جاسۇزاقوۆ جانە وڭتۇستىك قازاقستان وبلىسىنان كەلگەن ەركەبۇلان قۇراسبەك ءۇشىنشى ورىننان كورىندى. ال بايقاۋدىڭ ىنتالاندىرۋ سىيلىعىنا جامبىلدىق راۋان جەكسەنبى, الماتىلىق نۇريددين قىرعىزباەۆ, كەرەكۋلىك جىبەك ايتباەۆا جانە باتىس قازاقستان وبلىسىنان كەلگەن تاڭات جەكسەنباەۆ لايىق دەپ تانىلدى. رەسپۋبليكالىق بايقاۋدىڭ بارلىق جەڭىمپازدارى مەن جۇلدەگەرلەرىنە قوماقتى قارجىلاي سىيلىقتار مەن ديپلومدار تاپسىرىلدى.
حاميت ەسامان,
«ەگەمەن قازاقستان»
جامبىل وبلىسى
