ال «ۇزدىك مامان» سايىسىنىڭ اتالمىش كومپانياعا قاراستى بارلىق ەنشىلەس كاسىپورىنداردىڭ باسىن بىرىكتىرىپ, كەڭ كولەمدە وتكىزىلە باستاعانىنا بيىل ەكى جىل. بىلتىر ماماندىقتارىنا ساي اقتاۋ جانە اتىراۋ قالالارىنداعى ءوندىرىس ورىندارىندا سايىس كورىگىن قىزدىرعان مۇنايشىلار بيىل اقتاۋ جانە شىمكەنت وڭىرلەرىندە, ياعني «قازمۇنايگاز» ۇلتتىق كومپانياسى» اكتسيونەرلىك قوعامىنىڭ جۇمىسشىلارى شىمكەنت قالاسىنداعى «پەتروكازاحستانويلپروداكتس» جشس جانە ماڭعىستاۋ وبلىسىنداعى «قاراجانباسمۇناي» اق پەن اقتاۋ قالاسىنداعى «قازترانسويل» اق وقۋ-كۋرستىق كومبيناتى اۋماعىندا سىنعا ءتۇستى. جۇمىسشىلاردىڭ ىنتاسىن ارتتىرۋ جانە بىلىكتىلىگىن كوتەرۋ, سونداي-اق مۇناي سالاسى قىزمەتكەرلەرىنىڭ ءوزارا تاجىريبە الماسۋى ماقساتىنداعى سايىستىڭ ءبىرىنشى كەزەڭىندە مۇناي-گاز كەشەنىنىڭ 30 ماماندىعى بويىنشا ەنشىلەس كاسىپورىنداردىڭ 3000-عا جۋىق جۇمىسشىسى باق سىناسىپ, قورىتىندى بولىمدە مۇناي جانە گاز ءوندىرۋ جونىندەگى وپەراتور, ۇڭعىمالاردى زەرتتەۋ جونىندەگى وپەراتور, قابات قىسىمىن قولداۋ جونىندەگى وپەراتور, مۇناي كاسىبى جابدىعىن جوندەۋ جانە قىزمەت كورسەتۋ جونىندەگى سلەسار, توكار, حيميالىق تالداۋ زەرتحاناشىسى, ەلەكتر-گازبەن دانەكەرلەۋشى, ەلەكتر جابدىقتاردى جوندەۋ جانە قىزمەت كورسەتۋ جونىندەگى ەلەكترومونتەر, ۇڭعىمالاردى جەراستى جوندەۋ بريگاداسى, ۇڭعىمالاردى كۇردەلى جوندەۋ بريگاداسى, 320 – تسەمەنتتەۋ اگرەگاتىنىڭ ماشينيست-ءموتوريسى, اۆتوموبيل جوندەۋ سلەسارى, اۆتوموبيل جۇرگىزۋشىسى, تەحنولوگيالىق قوندىرعىلار وپەراتورى, كومپرەسسور قوندىرعىلارىنىڭ ءماشينيسى, تەحنولوگيالىق سورعىلار ءماشينيسى, مۇناي وڭدەۋ مەكەمەلەرىنىڭ حيميالىق تالداۋ زەرتحاناشىسى ماماندىقتارى بويىنشا 126 قاتىسۋشى شەبەرلىك سىناستى.
جارىس بارىسىندا تەوريالىق جانە پراكتيكالىق تاپسىرمالاردى ورىنداۋ ءۇشىن وندىرىستىك نىسانداردا ارنايى جابدىقتالعان جۇمىس الاڭدارى, قاجەتتى بولمەلەر مەن قۇرال-سايماندار دايىندالىپ, جارىسقا قاتىسۋشىلارعا ءوز مۇمكىندىكتەرىن تولىق كورسەتۋگە جاعداي جاسالدى. بيىلعى سايىستىڭ باستى ەرەكشەلىگى – «قازمۇنايگاز» ۇلتتىق كومپانياسى» اكتسيونەرلىك قوعامى ارنايى ۆەب-سايتىنان سايىستىڭ ءوتۋ بارىسى تۋرالى جاڭالىقتار جۇيەلى تۇردە بەرىلىپ وتىردى جانە بايقاۋ الاڭدارىندا فوتوگرافتار مەن تىلشىلەر سايىس بارىسىنا تىكەلەي كۋاگەر بولا الدى, سونداي-اق ايماقتاعى كورپوراتيۆتىك پورتالدىڭ قولدانۋشىلارى بايقاۋدى ونلاين رەجىمدە كورۋ مۇمكىندىگىنە يە بولدى.
قىركۇيەك ايىنىڭ 25-29-ى ارالىعىندا وتكەن سايىستا جۇمىسشىلاردىڭ شەبەرلىگىن كومپانياعا قاراستى كاسىپورىنداردىڭ ساراپشىلارىنان قۇرالعان قازىلار انىقتاپ, جەڭىمپازداردى تانۋدا كاسىبي ماشىعى, تاپسىرمالاردى ورىنداۋ جىلدامدىعى مەن قاۋىپسىزدىك تەحنيكاسىن ساقتاۋ شەبەرلىگىن باستى نازارعا الدى.
اقتاۋ قالاسىندا سالتاناتتى جاعدايدا قورىتىندىلانعان جيىندا بايقاۋعا قاتىسۋشىلارعا «قازمۇنايگاز» ۇك» اق باسقارما توراعاسى س.مىڭباەۆتىڭ قۇتتىقتاۋ حاتى وقىلدى.
الەمدىك داعدارىسقا بايلانىستى مۇناي باعاسىنىڭ تۇراقسىزدىعىنا قاراماستان, جۇمىسكەرلەرگە الەۋمەتتىك قولداۋدىڭ قازىرگى دەڭگەيى ساقتالعاندىعىن ايتقان حاتتا «بۇل «قازمۇنايگاز» ۇلتتىق كومپانياسى» اكتسيونەرلىك قوعامى كومپانيالار توبىنىڭ بيزنەس-باعىتتاردىڭ كوپشىلىگى بويىنشا وڭ ناتيجەلەرگە قول جەتكىزۋىنىڭ ارقاسىندا مۇمكىن بولىپ وتىر. اتالعان زاڭدى ناتيجە – اكىمشىلىكتىڭ, جۇمىسكەرلەر مەن كاسىپوداقتاردىڭ جۇمىلا جۇمىس ىستەگەنىنىڭ ايقىن كورسەتكىشى», دەلىنگەن.
90 مىڭعا جۋىق مامان قىزمەت ەتەتىن الىپ مەكەمەدەن سۋىرىلىپ 146 ازاماتتىڭ شىعۋى وڭاي ەمەس. كونكۋرس جەڭىمپازدارى «ۇزدىك مامان» مەدالىمەن جانە ارنايى سەرتيفيكاتتارمەن ماراپاتتالدى.
– مەن قاراعاندى مەملەكەتتىك تەحنيكالىق ۋنيۆەرسيتەتىن مۇناي سالاسى ماماندىعى بويىنشا ءبىتىرىپ شىقتىم. سەرىكتەستىكتە جۇمىس جاساعانىما ءۇش جىل بولدى. وسى ءۇش جىلدىڭ ىشىندە تاجىريبە جاعىنان جەتىلىپ, الدىڭعى بۋىن اعا-اپالاردان ۇيرەنىپ كەلەمىز. باسشىلىق تاراپىنان جۇمىسشىلاردىڭ, اسىرەسە جاس مامانداردىڭ اياقتان تۇرىپ كەتۋىنە, ءوز ءىسىن جەتىك مەڭگەرۋىنە جاسالىپ جاتقان مۇمكىندىكتەر وتە مول. بۇگىنگى سايىستى دا جۇمىسشىلاردى العا ۇمتىلدىراتىن, قاناتتاندىراتىن شارالاردىڭ ءبىرى دەپ سانايمىن. بيىل سايىسقا العاش رەت قاتىستىم, قيىن سايىستا جۇلدەگەر اتانعانىما قۋانىشتىمىن. سايىس مەنى تەك جەڭىمپاز بولۋىممەن قۋاندىرمايدى, الداعى ۋاقىتتا جۇمىستى جان-جاقتى جۇرگىزۋگە تاجىريبە الۋىما سەپتىگى تيگەندىگىمەن دە قۋانتادى. مىسالى, جۇمىسىمىز ءبىر بولعانمەن, ءار كومپانيادا جابدىقتار ءارتۇرلى, دەمەك, جۇمىس جاساۋ ءتاسىلى, تاجىريبەسى دە بولەك. مەن سايىس بارىسىندا وزگە كومپانياداعى ارىپتەستەرىمنەن وسى باسقا جابدىقتاردا جۇمىس جاساۋدى ۇيرەندىم. كوپ بىلگەننىڭ ارتىقتىعى جوق, – دەيدى سايىس جەڭىمپازى, «قازگەرمۇناي» جشس مۇناي جانە گاز ءوندىرۋ وپەراتورى عازيز مەرەكەەۆ.
جاس مۇنايشىنىڭ ايتۋىنشا, سايىس تەك جەڭۋ ءۇشىن ەمەس, تاجىريبە الماسۋ ءۇشىن دە ماڭىزدى. ولاي بولسا, «قازمۇنايگاز» ۇك» اق ۇيىمداستىرعان «ۇزدىك مامان» سايىسى ءوز ماقساتىنا جەتىپ, نەگىزگى ناتيجەسىن بەرۋدە دەگەن ءسوز.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىسى
