– مەملەكەت باسشىسى الەۋمەتتىك سالانىڭ ينفراقۇرىلىمىن مەملەكەت-جەكەمەنشىك ارىپتەستىگى ارقىلى دامىتۋدى ۇنەمى ايتىپ كەلەدى. بيىلعى «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» جولداۋىندا ەلباسى بيزنەس-ورتانى تۇبەگەيلى جاقسارتۋ جانە كەڭەيتۋ, ەلدىڭ ىشكى جالپى ونىمىندەگى شاعىن جانە ورتا بيزنەستىڭ ۇلەسى 2050 جىلعا قاراي كەم دەگەندە 50% بولۋىن قامتاماسىز ەتۋ جونىندە تاپسىرما بەردى. وسىعان وراي دەنساۋلىق ساقتاۋ سالاسىنا دا ينۆەستيتسيانى كوپتەپ تارتۋ شارالارى قاراستىرىلىپ جاتىر, دەدى ا.قيناياتوۆ.
ونىڭ ايتۋىنشا, وسى سالادا مەملەكەت-جەكەمەنشىك ارىپتەستىگىن دامىتۋ ارقىلى ەلگە كورسەتىلەتىن مەديتسينالىق قىزمەت ساپاسىن ارتتىرۋعا بولادى. مەديتسينالىق قۇرال-جابدىقتاردى جاڭارتىپ, ەمدەۋدىڭ زاماناۋي تاسىلدەرىنە قول جەتكىزۋ مۇمكىندىگى بار. سونداي-اق ينۆەستيتسيا كوبىرەك تارتىلسا, نىسانداردى پايدالانۋعا بەرۋ شىعىندارى دا ازايتىلماق. ال مەملەكەتپەن كەلىسىمگە وتىرعان جەكە كاسىپكەرلەرگە تۇراقتى ءارى ۇزاق مەرزىمدى بيزنەستى قۇرۋعا جول اشىلادى.
بۇگىندە مەملەكەت-جەكەمەنشىك ارىپتەستىگى ارقىلى جالپى سوماسى 16 ملرد تەڭگەنى قۇرايتىن 14 جوبا بويىنشا كەلىسىمشارت جاسالىپتى. سولاردىڭ ىشىندە جەدەل مەديتسينالىق جاردەم ستانساسى, اقتوبەدە وفتالمولوگيا اۋرۋحاناسى مەن بالالار ستوماتولوگيالىق ەمحاناسى قۇرىلىستارىن سالۋ, ەكىباستۇزدا ەمحانا عيماراتىن تۇرعىزۋ, شىمكەنتتە جەدەل مەديتسينالىق جاردەم ستانساسىن سالۋ, الماتى وبلىسىندا مەديتسينالىق زەرتحانا جاساقتاۋ سەكىلدى جوبالار بار. بۇعان قوسا, ەكىباستۇز بەن پاۆلودار اۋرۋحانالارىنا ەكى كومپيۋتەرلى توموگرافيا ورناتۋ جونىندەگى جوبالاردى دا اتاپ وتۋگە بولادى.
جىلدىڭ اياعىنا دەيىن مەديتسينالىق سالاعا قاجەتتى تاعى 30 كەلىسىمگە قول قويۋ جوسپارلانىپ وتىر. مەملەكەت-جەكەمەنشىك ارىپتەستىگى جوبالارىن مەملەكەتتىك قولداۋدى قامتاماسىز ەتۋ ءۇشىن كەلىسىمشارتتار 3 جىلدان 5 جىلعا دەيىن جاسالادى. مۇنداي جوبالار مەردىگەردى تاڭداۋ ءۇشىن جىل سايىن كونكۋرسقا قاتىسىپ جاتپايدى. بۇل دا مەملەكەتتىك قولداۋدىڭ ءبىر ءتۇرى.
دەنساۋلىق ساقتاۋ سالاسىن جەكە ينۆەستورلار ءۇشىن تارتىمدى ەتۋ ماقساتىندا مينيسترلىك جەرگىلىكتى اكىمدىكتەرمەن بىرلەسە ينفراقۇرىلىمدى 2025 جىلعا دەيىن دامىتۋدىڭ پەرسپەكتيۆالىق جوسپارىن ازىرلەپتى. ونىڭ ىشىندە باستى 16 وڭىرلىك جوبا بار.
بريفينگكە دەنساۋلىق ساقتاۋ ءمينيسترىنىڭ كەڭەسشىسى انار مۇسىرەپوۆا, دەنساۋلىق ساقتاۋدى دامىتۋدىڭ رەسپۋبليكالىق ورتالىعى باس ديرەكتورىنىڭ ورىنباسارى نۇربول كۇزەمباەۆ قاتىسىپ, جۋرناليستەردىڭ ساۋالىنا جاۋاپ بەردى.
قىمبات توقتامۇرات,
«ەگەمەن قازاقستان»
