№4 كۇرشىم ورتا مەكتەبى اۋدانداعى ەڭ ىرگەلى ءبىلىم وشاعى سانالادى. مۇندا وتكەن وقۋ جىلىن 489 وقۋشى اياقتاپ, ولاردىڭ ىشىندە 96 ۇزدىك, 160 وقۋشى ەكپىندى اتانعان بولاتىن. ال 11-سىنىپتى بىتىرگەن 35 تۇلەكتىڭ 23-ءى ۇبت-عا قاتىسىپ, 16 بالا جوعارى وقۋ ورنىنا ءتۇستى, 15 تۇلەك كوللەدج ستۋدەنتتەرىنىڭ قاتارىن تولىقتىردى. وسى ايتۋلى كۇنى بۇل مەكتەپتە تاعى ءبىر عيبراتتى شارا ءوتىپ, مۇنىڭ ءوزى مەكتەپ ۇستازدارى مەن وقۋشىلارىنىڭ شىنايى ريزاشىلىعىنا سەبەپكەر بولعان ەدى.
قازاق كسر حالىق اعارتۋ ءىسىنىڭ ۇزدىگى, قازاقستان رەسپۋبليكاسىنىڭ ەڭبەك سىڭىرگەن قىزمەتكەرى, «قۇرمەت بەلگىسى» وردەنىنىڭ يەگەرى, كۇرشىم اۋدانىنىڭ قۇرمەتتى ازاماتى, بەلگىلى پەداگوگ قۋانىشباي سەمباەۆتىڭ ەسىمى كوپكە ايگىلى. سانالى عۇمىرىنىڭ 45 جىلىن ۇستازدىققا ارناعان ارداگەر تالىمگەر وسى ءومىر جولىنىڭ 42 جىلىن ءبىلىم سالاسىنىڭ باسشىلىعىندا وتكىزگەن-ءدى. اۋدانداعى بىرنەشە مەكتەپكە ديرەكتور بولىپ, كەيىننەن اۋداندىق حالىق اعارتۋ ءبولىمىنىڭ مەڭگەرۋشىلىگىنە تاعايىندالعان ق.سەمباەۆ جاۋاپتى قىزمەتتى 17 جىل بويى ءمىنسىز اتقاردى.
پاراساتتى پەداگوگتاردىڭ وتباسىندا تاربيەلەنگەن ۇرپاعى ماتەماتيكا ءپانىنىڭ داۋسىز بىلگىرى اتانعان اكەلەرىنە ارناپ كابينەت جابدىقتاپ بەرۋدى ماقسات تۇتقان ەكەن. سول نيەتتىڭ ورىندالۋى بۇگىنگى ءساتتى كۇنگە ءدوپ كەلىپ, قارت ۇستازدىڭ ءوزى 15 جىل بويى جاس بۋىنعا ءدارىس بەرگەن №14 ماتەماتيكا كابينەتى بارىنشا ۇقىپتى جابدىقتالىپ, جاڭارىپ-جاڭعىرىپ, ەسىگىن ايقارا اشتى. بۇل بولمە بۇدان بىلاي «ارداگەر ۇستاز قۋانىشباي سەمباەۆ اتىنداعى كابينەت» دەپ اتالادى.
– وسى ءبىر وي ءبىزدى كوپتەن بەرى مازالاپ جۇرگەن بولاتىن, دەيدى قاريانىڭ ۇلكەن ۇلى, ۇقك شەكارا قىزمەتىنىڭ ارداگەرى, زاپاستاعى پولكوۆنيك قايرات سەمباەۆ. – اقىرىندا اعايىندى بەسەۋىمىز ءبىر كەلىسىمگە كەلدىك. بىرلەسە قارجى جيناپ, اكەمىزدىڭ اتىنا ءبىر كابينەت جابدىقتاپ بەرۋگە شەشىم قابىلدادىق. ءبارى زاڭدى دا رەسمي بولۋى ءۇشىن الدىمەن وسى №4 كۇرشىم ورتا مەكتەبى ديرەكتورىنىڭ اتىنا ءوتىنىش جازدىق. بۇل حاتىمىز مەكتەپتىڭ پەداگوگيكالىق كەڭەسىندە تالقىلانىپ, ءبىراۋىزدان قولداۋعا يە بولدى. سونىمەن بىرگە ءار وقۋ جىلى اياقتالعان سايىن وسى مەكتەپتىڭ ماتەماتيكا ءپانىن ۇزدىك بىتىرگەن ءبىر تۇلەگىنە 100 مىڭ تەڭگە كولەمىندە سىياقى بەرىپ وتىرماق بولعان ەدىك. بۇل ۇسىنىس تا قابىلداندى. ءبىز قاجەتتى ماتەريالداردى جەتكىزىپ بەرىپ تۇردىق, جوندەۋ-جاڭعىرتۋ جۇمىستارىنا دا اتسالىستىق. مەكتەپ ۇجىمى بارىنشا كومەكتەسىپ, كابينەتتىڭ كوڭىلدەگىدەي شىعۋى ءۇشىن ايانباي كۇش جۇمسادى. وسىنداعى بارشا شارۋاعا تياناقتى دا تاباندى باسشىلىق جاساعان مەكتەپ ديرەكتورى ورالبەك سەيىتقازينگە ايتار العىسىمىز زور.
كابينەتتىڭ اشىلۋ سالتاناتىنا ارداگەر ۇستازدىڭ ءوزى دە زايىبىمەن بىرگە قاتىسىپ, وسى شاراعا مۇرىندىق بولعان ۇلدارىنا, كەزىندە ءوزى باسشىلىق جاساپ, تاربيەلەگەن مەكتەپ ۇجىمىنا شىن كوڭىلدەن شىققان اكەلىك العىسىن ارنادى. وسىناۋ ءبىلىم ورداسىنىڭ قاشاندا بيىكتەن كورىنىپ, تابىستارعا جەتە بەرۋىنە تەبىرەنە تۇرىپ تىلەكتەستىك ءبىلدىردى.
قارتتىڭ ۇلدارى, بۇرىنعى اسكەري قىزمەتكەرلەر قايرات پەن جانبولات ءوز تىلەكتەرىن ورتاعا سالا كەلە, اكەلەرى سالىپ كەتكەن سارا جولدى جاس ۇرپاقتىڭ لايىقتى دەڭگەيدە جالعاستىرىپ, مەكتەپ بەدەلىن بيىكتەتە بەرۋلەرىنە تىلەك ءبىلدىردى. ەڭبەك ارداگەرلەرى م.قاسىمباەۆا, س.تاكەنوۆا, مەكتەپ ۇستازدارى ت.مايقىنوۆا, ن.پەلتس قۇتتىقتاۋ تىلەكتەرىن ارناپ, قارت تالىمگەرگە ۇزاق عۇمىر, باياندى باقىت تىلەدى.
– پرەزيدەنتىمىزدىڭ «بولاشاققا باعدار: رۋحاني جاڭعىرۋ», سونداي-اق وڭىرىمىزدە جولعا قويىلعان «تۋعان جەرگە – تاعزىم» باعدارلامالارى اياسىنداعى كوپتەگەن اكتسيالاردىڭ قاتارىنا بۇگىنگى شارا دا قوسىلىپ وتىر, – دەدى وسى كەزدەسۋدى تۇجىرىمداعان مەكتەپ ديرەكتورى و.سەيىتقازين. – جاس بۋىنعا ونەگە بولارلىقتاي ماعىنالى شارا ەكەندىگى داۋسىز. اعايىندى سەمباەۆتاردىڭ بۇل ىستەرىن قۋانا قۇپتادىق جانە وسىنداي يگى شارالار ودان ءارى جالعاسىن تابا بەرسىن دەپ تىلەيمىز. كابينەت جابدىقتاۋ ءداستۇرى بۇرىننان بار, ال ۇزدىك وقۋشىعا سىياقى تاعايىنداپ وتىرعاندارىڭىز – بۇل وڭىردەگى جاڭا باستاما, ونىڭ كەلەشەكتە شاكىرتتەردى جاقسى وقۋعا ىنتالاندىرا تۇسەرى ءسوزسىز. سوندىقتان دا بارىمىزگە ۇلگى بولعان ارداگەر اعامىزعا, ول كىسىگە لايىقتى ۇرپاق بولىپ وتىرعان سىزدەرگە كوپ راحمەت!
سەمباەۆتار اۋلەتى كابينەتتى جىل سايىن جوندەپ, جاڭارتىپ وتىرۋعا ۋادە بەردى.
حاسەن زاكاريا,
جۋرناليست
شىعىس قازاقستان وبلىسى,
كۇرشىم اۋدانى
