كوميسسيا وتىرىسىنا قازاقستان رەسپۋبليكاسى بيلىگىنىڭ زاڭ شىعارۋشى, اتقارۋشى جانە سوت تارماقتارى ورگاندارىنىڭ, حالىقارالىق جانە ۇكىمەتتىك ەمەس ۇيىمداردىڭ, ەمدەۋ مەكەمەلەرىنىڭ, ادۆوكاتۋرانىڭ وكىلدەرى قاتىستى. جيىندا دەنساۋلىق ساقتاۋ سالاسىن دامىتۋدىڭ 2016-2020 جىلدارعا ارنالعان مەملەكەتتىك «دەنساۋلىق» باعدارلاماسىن ىسكە اسىرۋ ماسەلەلەرى تالقىلاندى. كوميسسيا مۇشەلەرى باعدارلامانىڭ ىسكە اسىرىلۋى الەۋمەتتىك-باعدارلى ۇلتتىق دەنساۋلىق ساقتاۋ جۇيەسىمەن حالىقتى جاپپاي قامتۋ, الەۋمەتتىك ادىلدىك, ساپالى مەديتسينالىق كومەكپەن قامتاماسىز ەتۋ قاعيداتتارىن ساقتاي وتىرىپ, تۇراقتى ءارى قارقىندى دامىتۋعا ىقپال ەتەتىنىن اتاپ ءوتتى. 2016 جىلدىڭ قورىتىندىسى بويىنشا قازاقستاندىقتاردىڭ ءومىر ءسۇرۋ ۇزاقتىعى 72,3 جاسقا جەتكەن. سوڭعى 10 جىل ىشىندە ءومىر ءسۇرۋ ۇزاقتىعىنىڭ 6 جىلعا ارتۋى, ءولىمنىڭ 27 پايىزعا, انا ءولىمىنىڭ 4 ەسەگە تومەندەۋى بايقالادى, سابيلەردىڭ شەتىنەۋى 1,6 ەسە, تۋبەركۋلەزدەن قايتىس بولۋ 5 ەسە, قاتەرلى ىسىكتەردەن بولاتىن ءولىم 20 پايىزعا تومەندەگەن.
بارلىق دەنساۋلىق ساقتاۋ قىزمەتى مەديتسينالىق-سانيتارلىق العاشقى كومەكتى (مساك) جاڭعىرتۋ جانە باسىم دامىتۋ نەگىزىندە حالىقتىڭ قاجەتتىلىكتەرى اينالاسىندا ينتەگراتسيالانادى. ونىڭ ساپاسىن جاقسارتۋ ءۇشىن «كەزەكسىز ەمحانا» قاناتقاقتى جوباسى جانە دۇنيەجۇزىلىك بانك كونسۋلتانتتارىمەن بىرلەسە 5 وڭىردە اۋرۋدى باسقارۋ باعدارلاماسى ەنگىزىلۋدە. مينيسترلىك جاھاندىق باسەكەلەستىك جاعدايىندا دەنساۋلىق ساقتاۋ سالاسىن تسيفرلاندىرۋ جانە اقپاراتتاندىرۋ ارقىلى حالىققا مەديتسينالىق قىزمەت كورسەتۋدىڭ قولجەتىمدىلىگى مەن ساپاسىن قامتاماسىز ەتۋدى جوسپارلاپ وتىر.
تالقىلاۋعا قاتىسقان ساراپشىلار بيلىك پەن قوعامنىڭ, ەمدەۋ مەكەمەلەرىنىڭ, مەديتسينالىق قىزمەت كورسەتۋدى جەتكىزۋشىلەر مەن حالىقتىڭ بىرىگۋى ازاماتتاردىڭ دەنساۋلىعىن ساقتاۋ مەن بىلىكتى مەديتسينالىق كومەك الۋدا كونستيتۋتسيالىق قۇقىقتارىن تولىعىمەن ىسكە اسىرۋعا مۇمكىندىك بەرەتىنىن اتاپ ءوتتى. كوميسسيا وتىرىسىندا تۇجىرىمدالعان ۇسىنىمدار مەملەكەت باسشىسىنىڭ, پارلامەنت پەن ۇكىمەت نازارىنا جەتكىزىلەتىن بولادى.
دۋمان اناش,
«ەگەمەن قازاقستان»
