رۋحاني جاڭعىرۋدى, ونداعى لاتىن جازۋىنا كوشۋ قوزعالىسىندا دا الدىڭعى قاتاردا كەلەمىز. لاتىن ءالىپبيى ءسوز جوق قازاققا كەرەك. ونى ەڭ كوپ پايدالاناتىن بىزدەر ءۇشىن ماڭىزى ءتىپتى ەرەكشە. سەبەبى وسى جاڭا جازۋدىڭ بارلىق ىستىعى مەن سۋىعىن باستان كەشەتىن, ءالىپبيدىڭ ۇلتقا قىزمەتىندەگى تاعدىر-تالايىندا جاۋاپكەرشىلىكتىڭ نار جۇگىن ارقالايتىنداردىڭ ءبىرىمىز. ەندەشە, ەل بولىپ ەلباسى باستاماسىن قىزۋ قولداپ وتىرعان تاريحي كەزەڭدەگى قوعامعا كەرەگى سارابدال سابىر. پرەزيدەنتىمىز قايتا-قايتا ەسكەرتىپ وتىرعانداي اسىقپاي, جان-جاقتى تالقىلاپ, سارالاپ بارىپ, تۇپكىلىكتى شەشىم قابىلداۋ ءلازىم.
وسى جەردە جاڭا ءالىپبي قابىلدانباي جاتىپ-اق جەكەلەگەن باق لاتىنشا جازۋدى باستاپ كەپ جىبەردى. ول-ول ما, كەيبىر جەرلەردە ماڭدايشالار, بيلبوردتار لاتىنشا بوي كورسەتىپ جاتىر. ءالىپبيى, ەرەجەلەرى قابىلدانباعان مۇنداي اسىعىستىق كورەرمەندى, وقىرماندى اداستىرۋ بولىپ شىقپاي ما؟ تۇركيا, وزبەكستان جانە ازەربايجاندا ءدال وسىنداي ويسىز ارەكەتتىڭ سالدارىنان شاتاسۋعا, اداسۋعا, باس قاتىرۋعا ۇشىراپ, ءالى كۇنگە دەيىن سونىڭ سالدارىنان ايىعا الماعانىن كوزىمەن كورىپ, ءوز اۋزىنان ەستىگەندەرمەن جۇزدەستىك. سوندىقتان لاتىنشا جازۋدىڭ ءمان-جايىن عىلىمي ۇيعارىم جاسالماي جاتىپ, اسىعىس اتتانداۋعا ءۇن قوسپايىق.
الدىمەن ارىپتەستەرىمە, كىسىگە كەڭەس بەرمەس بۇرىن ءوزىمىز تەرەڭىنەن زەرتتەپ, انىق-قانىعىنا كوز جەتكىزىپ الايىق دەگىم كەلەدى.
قازىر قوعامداعى پىكىرلەر ءار-الۋان, سان قيلى كوزقاراس ايتىلۋدا. بارىنە دە توزىمدىلىك تانىتىپ, دۇرىس قابىلداۋىمىز كەرەك. وسى ورايدا سولتۇستىك وڭىردە ورىس تىلدىلەر باسىم ورتادا تۇتاستاي العاندا قازاق ءتىلىنىڭ لاتىن جازۋىنا كوشۋىن تۇسىنىستىكپەن قابىلداعانى قۋانتتى. تالاي ورىس جانە ورىس ءتىلدى تۇرعىندارمەن جۇزبە-ءجۇز تىلدەستىم. ماسەلەنىڭ تەرەڭ, ماڭىزدى, ۇلتتىق وڭ جاڭعىرۋ ەكەنىن اتاپ كورسەتتى. ايتالىق, وبلىستىق ءارحيۆتىڭ باسشىسى ۆ.ۆيشنيچەنكو, «تەررا» شارۋا قوجالىعىنىڭ جەتەكشىسى ۆ.سەمەيكين, ارىپتەسىم «كوستانايسكيە نوۆوستي» گازەتىنىڭ باس رەداكتورى س.حارچەنكو اعىنان جارىلا شىنايى قولدايتىندىعىن دەرەك-دايەكپەن ايتقاندا سۇيسىنەسىڭ. بىرگە ءومىر ءسۇرىپ وتىرعان ءتۇرلى زامانداستاردىڭ وسىندايداعى ىشكى بىرلىگىنە ءتانتى بولاسىڭ. ايتسە دە تەك تىز ەتپە ەموتسيادان عانا تۇراتىن, استارىندا قيسىندى وي جوق, جۇرتتىڭ بىرلىگى مەن ىنتىماعىنا سىزات تۇسىرەتىن پىكىرسىماقتار, الەۋمەتتىك جەلىنى ايتپاعاندا, ءۇش-ءتورت كىسى باس قوسقان جەردە جىلت ەتە قالادى. مۇندايدا بايسالدى جاۋابىڭ بولۋى كەرەك. ويتكەنى كوبى جۋرناليست اعايىنداردىڭ اۋزىن اڭديتىنى انىق.
سۇراق كوپ. ءبىر مۇعالىم قازاق مەكتەبىن لاتىنشا بىتىرگەندەر ەلدەگى جوعارى وقۋ ورىندارىندا ورىسشا كيريليتسادا وقىتاتىن ماماندىقتارعا تۇسە الا ما؟ سەبەبى, ەلدەگى, رەسەيدەگى جوو دەنى ۇلتارالىق تىلدە ەكەنى انىق قوي دەيدى. نەگە تۇسپەسىن, تۇسە الادى, سەبەبى ءۇش ءتىل دە مەكتەپتە وقىتىلادى. بولاشاعىن ايقىنداعان ءجاسوسپىرىم وقيتىن ءتىلىن تەرەڭىرەك يگەرۋگە ۇمتىلادى دەيمىز.
مەنىڭ ايتايىن دەگەنىم, ءبىز ەل ءۇشىن كەرەك وزىق وي-پىكىر,قۇندى ۇسىنىستاردى جۇرتقا الدىمەن جەتكىزۋگە ۇمتىلامىز. ەندەشە ۇلت تاعدىرىنا تىكەلەي قاتىستى بۇل ماسەلەگە ءجىتى قاراپ, شىنايى جاناشىر بولايىق.
جانۇزاق ايازبەكوۆ,
قوستاناي وبلىستىق «قوستاناي تاڭى»
گازەتىنىڭ ديرەكتور-باس رەداكتورى
قوستاناي
