وڭىردە جىلىتۋ ماۋسىمىنىڭ باستالۋىنا دا از قالدى. تەرىسكەيدىڭ قىسى قاھارلى ءارى ۇزاققا سوزىلاتىنىن ەسكەرسەك, ۋاقىت نايقالۋدى كۇتپەيتىنى, جان-جاقتى دايىندىق جۇمىستارىن قاجەت ەتەتىنى ءسوزسىز. ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى تاسمۇرات قاتقاداموۆتىڭ ايتۋىنشا, تۇرعىن ۇيلەر مەن الەۋمەتتىك سالا نىساندارىن قىسقى جاعدايعا قالپىنا كەلتىرۋگە جەرگىلىكتى قازىنادان 2,4 ميلليارد تەڭگە بولىنگەن. بيۋدجەتتىك مەكەمەلەر 173,8 مىڭ توننا كومىرگە كەلىسىمشارت جاساسىپ, 94 پايىزى جەتكىزىلگەن. «سەۆكازەنەرگو» اق ينۆەستيتسيالىق باعدارلامالار شەڭبەرىندە 5,6 ميلليارد تەڭگە باعىتتاعان. پەتروپاۆل № 2 جىلۋ ەلەكتر ورتالىعى 14 قازاندىق پەن تۋربواگرەگاتتى جونەۋدەن وتكىزىپ, ەكەۋىن تولىقتاي جاڭارتقان. كومىر مەن مازۋت قورى جەتكىلىكتى. «قىزىلجار سۋ» كاسىپورنى 280 شاقىرىم سۋ جۇيەلەرىن, 400 قۇدىقتى قالپىنا كەلتىرىپ, 53 گيدرانتتى اۋىستىرعان. «ەسىل سۋ» مەكەمەسى 18,8 شاقىرىم ماگيسترالدى سۋ قۇبىرلارىن جاڭالاعان.
باسشىنىڭ ەسەبى جان جادىراتار تسيفرلارعا تولى بولعانىمەن, وبلىس اكىمى قۇمار اقساقالوۆتى قاناعاتتاندىرمادى. كۇزگى-قىسقى جاۋاپتى ناۋقانعا دايارلىقتا بىرقاتار تۇيتكىلدى ماسەلەلەردىڭ قوردالانعانىن اتاپ كورسەتتى. جۇمىس كەستەسىنەن كەشىگۋشىلىك بار. الەۋمەتتىك نىساندارداعى 509 قازاندىقتىڭ 455-ءى عانا ءازىر. اسىرەسە, كوپ قاباتتى تۇرعىن ۇيلەردەگى اقاۋلار مەن كەمشىلىكتەردى انىقتاۋ سىلبىر جۇرگىزىلۋدە. وبلىس ورتالىعىنداعى ءبىر مىڭنان استام كوپ پاتەرلى باسپانالاردىڭ 600-نە جۋىپ-شايۋ, قىسىممەن تەكسەرۋ شارالارى جۇرگىزىلمەگەن. جامبىل, م. جۇماباەۆ اۋداندارىنىڭ قاتتى وتىنعا بەرەشەگى 75 ميلليون تەڭگەگە جەتەعابىل. كومىردى سابانمەن الماستىرۋ ۇردىسىنە كوشۋشىلەر ساناۋلى.
سول سياقتى مەكتەپتەر ىشىندەگى قازاندىقتاردى سىرتقا ورناتۋ تۋرالى ۇكىمەت تاپسىرماسىنىڭ ورىندالۋى دا كوڭىل كونشىتپەيدى. بيىل جوسپارلانعان 60 قازاندىقتىڭ 8-ءى عانا شىعارىلعان. قاراعاندى وبلىسىنىڭ شاحان قالاسىندا ورىن العان جارىلىستان كەيىن توعىز اي وتكەنىنە قاراماستان اۋدان اكىمدەرىنىڭ قارەكەتى قارىن اشتىرادى. «ساپرو-نات» جشس-ءنىڭ قازاندىقتاردى سەنىمدى باسقارۋعا الۋ سەكىلدى وزىق تاجىريبەسى وزگەلەرگە ۇلگى ەتۋگە تۇرارلىق بولعانىمەن, ەسكەرۋشىلەر از.
قۇمار ىرگەباي ۇلى جاڭادان بوي كوتەرىپ جاتقان باسپانالاردىڭ ساپاسىن دا وتكىر سىنعا الدى. شىنىندا دا, بىلتىر جاڭا قونىسقا كىرگەن تۇرعىنداردىڭ قىس بويى بۇرسەڭدەپ شىققانى ءالى ۇمىتىلا قويعان جوق. وسىعان وراي قاداعالاۋ ورىندارىنا قۇرىلىسقا بولىنەتىن قارجىنىڭ جۇمسالۋىن قاداعالاۋدى كۇشەيتۋ تاپسىرىلدى. قىلىشىن سۇيرەتىپ قىس كەلەدى. ونىڭ قانداي مىنەز كورسەتەرى بەلگىسىز. «قىس ارباڭدى, جاز شاناڭدى سايلا» دەپ تەككە ايتىلماعان. كەستەدەن اۋىتقۋشىلىق بولماسىن. كوپ قاباتتى تۇرعىن ۇيلەردىڭ, الەۋمەتتىك نىسانداردىڭ جىلى دا جايلى بولۋىنا اۋدان, قالا اكىمدەرى الدىمەن جاۋاپ بەرەدى, دەدى اكىم وتىرىستى قورىتىندىلاپ.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
