وسى جانە باسقا دا ولقىلىقتاردى قالا اكىمى ەرماك ءسالىموۆتىڭ ءوزى بايقاپ كوردى. اۆتوبۋستاردىڭ كوبى بيلەت بەرمەيدى, ال بەرگەن كۇننىڭ وزىندە ولاردى جول بويىندا تەكسەرىپ تۇراتىن تەكسەرۋشىلەر دە جوق, بارلىعى «وزدەرى بي, وزدەرى قوجا» بولىپ العاندار ەكەن. ءبىر ايلىق جول ءجۇرۋ بيلەتى قالاداعى اۆتوبۋستاردىڭ نەبارى 10 پايى-زىنا عانا جارامدى. ءتىپتى وسىدان ءۇش-ءتورت اي بۇرىن وبلىس اكىمى دانيال احمەتوۆ كەلىپ, №13 اۆتوبۋسقا جۇرتپەن بىرگە مىنگەن كەزدە, گاز شىعاراتىن تۇتىكتىڭ اۆتوبۋس سالونىنىڭ ىشىندە ورنالاسقانىن كورىپ, جاعاسىن ۇستاعان ەدى. قالا باسشىسىنا ونداي ولقىلىقتارعا جول بەرمەۋدى تاپسىرعان بولاتىن.
تاياۋدا ەرماك ءسالىموۆ جاڭادان تاعايىندالعان جولاۋشىلار كولىگى جانە اۆتوموبيل جولدارى ءبولىمىنىڭ باستىعى سەرىكقالي جۇمانوۆپەن جانە كولىك جانە كوممۋنيكاتسيا عىلىمي-زەرتتەۋ ينستيتۋتى ديرەكتورىنىڭ ورىنباسارى بايبولات بايماحانبەتپەن بىرگە رەيدكە شىقتى. اكىم تەكسەرىسكە شىققان كۇننەن باستاپ, سەمەيدە اۆتوبۋس تاسىمالىنداعىلار كەشكى 21.30-22.00-گە دەيىن جۇمىس ىستەيتىن بولدى. بۇرىندارى بارلىعى كەشكى 17.00-دەن باستاپ جوعالىپ كەتەتىن دە, حالىق جۇمىستان ۇيگە قايتۋعا كولىك تاپپاي قالاتىن. سوندىقتان, بۇل دا جاعىمدى جاڭالىقتىڭ ءبىرى بولدى. جانە قالا بويىنشا قوسىمشا بەس باعىتتىڭ اۆتوبۋستارى 22.30-عا دەيىن جۇرەتىن بولدى.
– قالا ىشىندە ءجۇرۋدىڭ جاڭا جۇمىس كەستەسى جولاۋشىلار كولىگى جانە اۆتوموبيل جولدارى بولىمىندە سەمەيلىكتەردىڭ كوپتەگەن ءوتىنىشى بويىنشا جاسالدى, – دەدى قالا اكىمى. – قالا تۇرعىندارى اۆتوبۋس-تار قوزعالىسىن كەشكى 22.00-23.00-گە دەيىن ۇزارتۋىن تالاپ ەتتى. دەگەنمەن, جاڭا جۇمىس كەستەسىندە ءالى دە وزگەرىستەر بولۋى مۇمكىن. ويتكەنى, ءبىز قاراپايىم حالىققا مەيلىنشە جاعداي جاساۋىمىز كەرەك.
جولاۋشىلار كولىگى جانە اۆتوموبيل جولدارى ءبولىمىنىڭ باستىعى س.جۇمانوۆتىڭ ايتۋىنشا, جاڭا جۇمىس كەستەسى قالاداعى 6 اۆتوبۋس پاركىنىڭ جەتەكشىلەرىنە تاپسىرىلىپتى. دەگەنمەن, جەتىلدىرەتىن دە تۇستارى بار ەكەن. سەبەبى, تاڭعى 5-تە جۇمىسقا كىرىسەتىن جۇرگىزۋشى تۇنگى 22.00-گە دەيىن شىداي المايدى. ياعني, 17-18 ساعاتتىق جۇمىس كەستەسى كولىك جۇرگىزۋشىسىنە وتە قيىن. ال قازاقستاننىڭ كەيبىر قالالارىندا ەكى نەمەسە ءۇش اۋىسىممەن جۇمىس ىستەيدى ەكەن جۇرگىزۋشىلەر, سوندىقتان دا سەمەيدە ەكى اۋىسىممەن جۇمىس ىستەۋ قولعا الىنۋى مۇمكىن. جۇرگىزۋشىلەر توبى, كوندۋكتورلار بۇرىنعى زامانداعىداي قايتا قالپىنا كەلۋ كەرەك. سەبەبى, كەيبىر باعىتتارداعى كولىكتەردە كوندۋكتورلار دا جوق. حالىق جولاقىسىن رولدە وتىرعان جۇرگىزۋشىگە جيناپ بەرەدى.
قالا اكىمى جولاۋشىلارمەن, كوندۋكتور جانە اۆتوبۋس جۇرگىزۋشىسىمەن سويلەسىپ, وزىنە كەرەكتى اقپاراتتارعا قانىق بولدى. ماسەلەن, جاڭا جۇمىس كەستەسى جايلى نە بىلەدى, جولاۋشىلارعا ارنالعان جەڭىلدىكتەر ساقتالعان با, ءدال قازىرگى ۋاقىتتا نەشە اۆتوبۋس باعىتقا شىققان, سالوندا سانيتارلىق تازالىق دۇرىس پا, قانشا رەت جۋىلىپ-شايىلادى, جۇرگىزۋشىلەر نەشە رەت مەديتسينالىق تەكسەرۋدەن وتەدى جانە تاعى باسقالار. قالا اكىمى بايقاعانداي, سەمەيدە, اسىرەسە, دەمالىس كۇندەرى حالىق ايالداماعا سىيماي كەتەدى. سەبەبى, اۆتوبۋستىڭ قايسىسى جۇرەتىندىگىن سول كۇنگى كەستە بويىنشا اۆتوپارك يەلەرى حالىق سۇرانىسىنا ەمەس, ءوز قالاۋلارىنا وراي بەكىتەتىن بولىپ شىقتى. قوجايىن اتاۋلى جەكسەنبى كۇنى دە حالىقتىڭ اۆتوبۋستارعا دەگەن قاجەتتىلىك, سۇرانىستارى بولاتىندىعىن ەسەپكە المايتىن بولسا كەرەك.
راۋشان نۇعمانبەك
سەمەي
سۋرەتتى تۇسىرگەن اۆتور
