شاراعا سالالىق, ايماقتىق كاسىپوداق ۇيىمدارىنىڭ وكىلدەرى مەن ساراپتامالىق قاۋىمداستىق جانە حالىقارالىق ۇيىمداردىڭ وكىلدەرى قاتىستى. جيىنعا جەتەكشىلىك ەتكەن كاسىپوداقتار فەدەراتسياسىنىڭ توراعاسى ابىلعازى قۇسايىنوۆ قوعامدىق سانانى جاڭعىرتۋ جولىندا ءاربىر وتانداسىمىز ءوز-وزىنە دەگەن كوزقاراستى قايتا قاراۋ قاجەتتىگىن اتاپ ءوتىپ, دۇنيەجۇزىلىك قاۋىمداستىقتىڭ ءبىر بولىگى رەتىندە حالقىمىزدىڭ جەتكەن جەتىستىگى مەن كەمشىن تۇستارىن سارالاۋدى مەڭگەرۋگە شاقىردى.
القالى كەڭەستە رەسەي فەدەراتسياسىنىڭ عىلىمي قاۋىمداستىعى اتىنان ءسوز العان پروفەسسور ب.تيتوۆ: «سانانى جاڭعىرتۋ – قازاقستاندىقتاردىڭ سانالى تاڭداۋى, بۇل ءوز كەزەگىندە قازاقستاننىڭ ادام كاپيتالى دامۋىنىڭ جوعارعى يندەكسىنە يە ەڭ تابىستى مەملەكەتتەر قاتارىندا بولاتىندىعىنىڭ باستى شارتى», دەدى. ونىڭ پىكىرىنشە, وسى ماقسات ورىندالعان جاعدايدا قازاقستاندىق قوعامنىڭ الەۋمەتتىك جاڭعىرۋ مەن رۋحاني پروگرەسكە بەيىمدەلۋى كەڭ ءورىس الادى.
فورۋمعا قاتىسۋشىلار «سانانى جاڭعىرتۋ» باعدارلاماسىن ساپالى جۇزەگە اسىرۋدىڭ ماڭىزدىلىعىن جان-جاقتى تالقىلاپ, ءاربىر وبلىس ورتالىقتارىنداعى كاسىپوداق وكىلدەرىمەن تابىستى جۇمىس جۇرگىزۋدى ءتۇسىندىرۋ توپتارى قۇرىلدى. سونداي-اق, وسى باعىتتا ورىندالىپ جاتقان جوسپار-جوبالاردىڭ ارتىقشىلىقتارى تۋرالى ۇگىت-ناسيحاتتىق بيلبوردتار ازىرلەنىپ, وڭىرلەرگە جىبەرىلگەن.
اپتا سوڭىنا دەيىن جالعاسىن تاباتىن فورۋمدا سەمينار تۇرىندەگى سەكتسيالىق جانە پلەنارلىق وتىرىستار مەن ترەنينگتەر ۇيىمداستىرىلىپ, كاسىپوداقتاردىڭ قىزمەتتىك وكىلەتتىگىنە بايلانىستى وزەكتى ماسەلەلەر پانەلدى پىكىرتالاستاردا قىزۋ تالقىلانادى دەپ جوسپارلانعان.
نۇرلىبەك دوسىباي,
«ەگەمەن قازاقستان»
