«بولاشاقتىڭ ەنەرگياسىن قالىپتاستىرۋ» ءحى ەۋرازيالىق KAZENERGY فورۋمى – ەكسپو-2017 كورمەسى اياسىنداعى قورىتىندى شارالاردىڭ ءبىرى. ەكى كۇنگە جوسپارلانعان شارا قازاقستان ۇكىمەتى مەن ەنەرگەتيكا مينيسترلىگىنىڭ قولداۋىمەن ۇيىمداستىرىلعان. فورۋم بۇۇ ايماقتىق كوميسسيالارى اياسىندا بيىلعى جىلدىڭ 11-14 ماۋسىمىندا استانادا وتكىزىلگەن تۇراقتى دامۋعا ارنالعان ەنەرگەتيكا جونىندەگى 8-ءشى حالىقارالىق فورۋم مەن «ەنەرگەتيكانىڭ تۇراقتى دامۋىن قامتاماسىز ەتۋ» كونفەرەنتسياسى شەڭبەرىندە باستالعان كەلىسىمدەردىڭ جالعاسى سانالادى. فورۋمنىڭ اشىلۋىنا چەحيا, فينليانديا, رەسەي, گرۋزيا, پولشا ەلدەرىنىڭ ەنەرگەتيكا سالالارىنىڭ باسشىلارى, سونداي-اق بۇكىلالەمدىك مۇناي كەڭەسىنىڭ پرەزيدەنتى تور فايەران قاتىستى.
جيىننىڭ اشىلۋىندا سويلەگەن سوزىندە ەنەرگەتيكا ءمينيسترى قانات بوزىمباەۆ استانادا ەكسپو بازاسىندا بولاشاق ەنەرگيالارىنىڭ ينۆەستيتسيالىق جوبالارى مەن جاسىل تەحنولوگيالاردىڭ حالىقارالىق ورتالىعى قۇرىلاتىنىن ايتتى. ول ءوز كەزەگىندە ترانسفورماتسيالىق ەنەرگەتيكالىق سەكتور مەن جاسىل بيزنەسكە وتۋگە قاتىستى تاپسىرمالاردى ورىنداۋعا ىقپال ەتەدى. ورتالىق رەسەي, قىتاي, اقش, ءۇندىستان مەن لاتىن امەريكاسى ەلدەرىمەن بىرلەسىپ جۇمىس اتقارادى. ول ەكسپو تاجىريبەسىنىڭ لايىقتى جالعاسى بولماق.
ق.بوزىمباەۆ سونداي-اق الداعى جىلدان باستاپ ەلىمىز مۇناي مەن گاز سالاسىندا جەر قويناۋىن پايدالانۋعا كەلىسىمشارتتاردىڭ بارلىق تۇرلەرىن وڭتايلاندىرۋدى قاراستىرىپ وتىرعانىن اتاپ ءوتتى. وسى رەتتە ولاردى بەكىتۋ مەرزىمىن قىسقارتىپ, كوپتەگەن اكىمشىلىك كەدەرگىلەردى جويۋدى, مۇناي-گاز شيكىزاتىنىڭ قورى بويىنشا ەسەپتىلىك ستاندارتتارىنىڭ حالىقارالىق جۇيەسىنە كوشۋدى ىسكە اسىرۋ كوزدەلگەن. سونىمەن قاتار, مينيستر مۇناي وڭدەۋدە ەنەرگيا تيىمدىلىگىنىڭ جوبالارى ەنگىزىلىپ جاتقانىن, مۇناي وڭدەۋشى زاۋىتتاردىڭ ءۇش جىلدا ءبىر رەت جوندەۋ كەزەڭىنە كوشىرىلگەندىگىنە توقتالدى. قازاقستان ستراتەگياسى تەك ءداستۇرلى ەنەرگەتيكانىڭ جوعارى كورسەتكىشتەرىنە عانا ەمەس, سونىمەن قاتار كەزەڭ-كەزەڭمەن بالامالى ءارى جاڭعىرمالى ەنەرگيا كوزدەرىن دامىتۋعا باعىتتالعان. سوڭعى جىلدار بالامالى ەنەرگەتيكا كوپتەگەن ەلدەردىڭ ۇكىمەتتەرى تاراپىنان قولداۋعا يە بولدى, وسى ورايدا قازاقستان دا ەنەرگيالىق بالانسقا بالامالى جانە جاڭعىرمالى ەنەرگيانى بەلسەندى تۇردە ەنگىزۋگە باعىت الدى. بۇل تۇرعىدا ونىڭ جالپى كولەمدەگى ۇلەسى 2050 جىلعا قاراي 50 پايىزدى قۇرايتىن بولادى. مۇناي-گاز سالاسىندا بۇرىننان ءتيىمدى ىنتىماقتاستىق ورناتقان ءىرى كورپوراتسيالاردىڭ تاجىريبەسى بىزگە وسى سالادا دا پايدالى بولادى دەپ سانايمىز. سوندىقتان ءبىز ءتيىستى كەلىسسوزدەردى جۇرگىزدىك جانە كوپتەگەن كومپانيالار اتالعان سالادا قازاقستاندا جۇمىس جۇرگىزۋگە نيەتتى, دەدى مينيستر.
ءحى KAZENERGY ەۋرازيالىق فورۋمىندا الەمدىك ەنەرگەتيكالىق كومپانيالار تۇراقتى ەنەرگەتيكا كوزدەرىن ءتيىمدى باسقارۋ, ەنەرگيا رەسۋرستارىنىڭ ءوندىرىلۋىن, ساقتالۋىن جانە پايدالانىلۋىن باقىلاۋ, ەنەرگيا كوزدەرىنە قول جەتكىزۋ, كليماتتىڭ وزگەرۋى جانە كومىرقىشقىل گازى شىعارىندىلارىن تومەندەتۋ, بالامالى ەنەرگيا كوزدەرىنىڭ پايدالانىلۋىن ىنتالاندىرۋ, ەنەرگيالىق تيىمدىلىك بويىنشا باعدارلامالاردى جانە «اقىلدى» ەنەرگەتيكانى ەنگىزۋ, ۋران جانە اتوم سالاسىن يننوۆاتسيالىق تۇرعىدا دامىتۋ سياقتى ماسەلەلەر تالقىلاندى.
دينارا بىتىك,
«ەگەمەن قازاقستان»
سۋرەتتى تۇسىرگەن
ەرلان ومار,
«ەگەمەن قازاقستان»
