قارجى • 08 قىركۇيەك، 2017

الىستى جاقىنداتقان ىنتىماقتاستىق

168 رەتكورسەتىلدى

2017 جىلدىڭ 6 ايىندا قازاقستان مەن فرانتسيا اراسىنداعى سىرتقى ساۋدا اينالىمى 45،9 پايىزعا ءوستى

كەشە استانادا قازاقستان رەسپۋبليكاسىنىڭ ينۆەستيتسيالار جانە دامۋ ءمينيسترى جەڭىس قاسىمبەك پەن فرانتسۋز رەسپۋبليكاسىنىڭ سىرتقى ىستەر جانە ەۋروپا ءمينيسترى جانىنداعى مەملەكەتتىك حاتشىسى  جان-باتيست لەمۋاننىڭ قاتىسۋىمەن ەكونوميكالىق ىنتىماقتاستىق جونىندەگى قازاقستان-فرانتسۋز ۇكىمەتارالىق كوميسسياسىنىڭ 13-ءشى وتىرىسى ءوتتى.

ۇكىمەتارالىق كوميسسيا وتى­رىسىندا ساۋدا مەن ينۆەس­تي­تسيا، ەنەرگەتيكا، سونىڭ ىشىندە جاڭعىرمالى ەنەرگيا كوزدە­رى، عارىشتىق قىزمەت، قورشا­عان ورتانى قورعاۋ، اۋىل شارۋا­شى­لىعى، دەنساۋلىق ساقتاۋ جانە تاعى باسقا دا سالالار بويىنشا ەكىجاقتى ىنتىماقتاستىق ماسە­لەلەرى تالقىلاندى.
ينۆەستيتسيالار جانە دامۋ ءمينيسترى جەڭىس قاسىم­بەك فرانتسيانىڭ ماماندان­دى­رىلعان ەكسپو-2017 حالىق­ارالىق كورمەسىنە قاتىسۋى ەكى ەلدىڭ ءوزارا ءىس-قيمىلىنىڭ جو­عارى دەڭگەيدە ەكەنىن جانە جاھاندىق تۇراقتى دامۋدى قام­تاماسىز ەتۋ ماسەلەلەرى بويىنشا ۇستانىمدارىنىڭ ءبىر ەكەنىن ايعاقتايدى، دەپ اتاپ ءوتتى. 

«قۋاتتى ەكونوميكالىق الەۋەتكە يە فرانتسيا قازاق­ستان­نىڭ ەۋروپاداعى نەگىزگى ساۋدا سە­رىكتەستەرىنىڭ ءبىرى. ەكى ەل ارا­سىنداعى تاۋار اينالىم­ىنىڭ ءوسىم ديناميكاسى قارقىندى. 2017 جىلدىڭ 6 ايىندا قازاقستان مەن فرانتسيا اراسىنداعى سىرتقى ساۋدا اينالىمى 1،7 ملرد اقش دول­لارىن قۇرادى. بۇل وتكەن جىل­دىڭ سايكەس كەزەڭىمەن سالىس­تىرعاندا 45،9 پايىزعا جوعارى»، دەدى ج.قاسىمبەك. 

فرانتسيا قازاقستاننىڭ نەگىز­گى ساۋدا سەرىكتەستەرى تىزىمىندە 5-ءشى ورىندى يەلەنەدى. سونىمەن قاتار، فرانتسيا قازاقستانعا ينۆەستيتسيا سالۋ دەڭگەيى بو­يىنشا دا 5-ءشى ورىندا. بۇل ەل سوڭعى 12 جىلدا قازاقستانعا 13،6 ملرد دوللار ينۆەستيتسيا سالعان.

فرانتسۋز رەسپۋبليكاسىنىڭ سىرتقى ىستەر جانە ەۋروپا ءمي­نيسترى جانىنداعى مەملەكەتتىك حاتشىسى جان-باتيست لەمۋان ەكى ەلدىڭ ۇكىمەتارالىق كوميسسياسى جۇمىس ىستەپ جاتقان وسى ەكى كۇننىڭ ىشىندە قازاقستان تارا­بىمەن كوپتەگەن كەزدەسۋلەر وتكىزىلگەندىگىن ايتا كەلە، جىلى قابىلداۋ ءۇشىن العى­سىن ءبىلدىردى. ونىڭ سوزىنە قارا­عاندا كەزدەسۋلەر تابىستى جۇرۋ­دە. «كوميسسيا جاساعان حاتتا­ما­نىڭ 10 بەتكە دەيىن جەتۋى ءبىز­دىڭ ارامىزداعى ىسكەرلىك بايلا­نىس­تاردىڭ قاناتىن كەڭگە جايىپ كەلە جاتقاندىعىن جانە ماز­مۇن­دى ەكەندىگىن بىلدىرەدى» دەدى ول.

فرانتسۋز تارابى قازاق­ستان­دىقتاردى ەكسپو-2017 حالىقارالىق كورمەسىنىڭ تابىس­تى وتۋىمەن قۇتتىقتادى. ولار­دىڭ ايتۋىنشا، كورمەدەگى فرانتسۋز پاۆيلونىن وسى ۋاقىتقا دەيىن 500 مىڭعا جۋىق ادام كەلىپ تاماشالاپتى. مۇنىڭ ءوزى پاۆيلوننىڭ تارتىمدى بول­عاندىعىن دالەلدەيتىن كور­سەتكىش. قازاقستان تارابى فران­تسۋزدارعا كورمەگە بەلسە­نە قاتىسقاندىقتارى ءۇشىن العىس­تارىن ءبىلدىردى.

وتىرىس بارىسىندا ەكى ەل­دىڭ ەكونوميكالىق ىنتىماقتاس­تى­عىنىڭ كۇن تارتىبىندەگى ماسە­لەلەرى جۇيە-جۇيەگە ءبولىنىپ، ناقتىلاي قارالدى. سونىڭ ىشىندە قازاقستاننىڭ ينۆەستيتسيالىق احۋالىن ودان ءارى جاقسارتۋدىڭ جولدارى، وسى رەتتە فرانتسۋز تارابىنان تۋىندايتىن ماسەلەلەر ناقتى اڭگىمە بولدى. فرانتسۋز تارابى، سونداي-اق قالالىق كولىك، قورشاعان ورتانى قورعاۋ سالالارىنا ينۆەستيتسيا سالۋعا ىنتالارىنىڭ بار ەكەندىگىن جەتكىزدى. مۇنىڭ سىرتىندا فران­تسۋز ينۆەستورلارىنىڭ قاتى­سۋىمەن جالپى قۋاتى 14 مۆت بولاتىن جاڭعىرمالى قۋات ءوندى­رۋ جوباسىن جۇزەگە اسىرۋ ماسە­لەسى ناقتى اڭگىمە بولدى.

قازاقستان تارابى فران­تسيا­مەن اراداعى اتوم ونەركاسىبى، ع­ا­رىشتىق قىزمەت، اۆياتسيا، اۋىل شارۋاشىلىعى جانە باسقا دا سالالارداعى ارىپتەس­تىك­تىڭ ءوز جەمىسىن بەرىپ، ناقتى جوبا­لار­دىڭ جۇزەگە اسىپ جاتقاندىعىن اتاپ كورسەتتى. بۇل جۇمىستار ودان ءارى جالعاسىن تاپپاق.

سۇڭعات ءالىپباي،
«ەگەمەن قازاقستان» 

سوڭعى جاڭالىقتار

باسىلىم باسشىلارى - ەركىن قىدىر (1962)

باسىلىم باسشىلارى • كەشە

ۇقساس جاڭالىقتار