وعان وبلىستاعى مەملەكەتتىك قىزمەتشىلەر, ۇكىمەتتىك ەمەس ۇيىمدار, ازاماتتىق قوعام ينستيتۋتتارىنىڭ, جاستار ۇيىمدارىنىڭ جانە جالپى جۇرتشىلىق وكىلدەرى قاتىستى. كوميسسيا حاتشىسى تاستەمىر ابىشەۆ ءوز سوزىندە ادام قۇقىقتارىنا قاتىستى وقىتۋ سەمينار-ترەنينگتەردىڭ وڭىرلەردە وتكىزۋدىڭ ماڭىزدىلىعىن ايتىپ, مۇنىڭ ءوزى جەرگىلىكتى حالىقتىڭ ادام قۇقىقتارى مەن بوستاندىقتارى, ادام قۇقىقتارىن سوت جانە سوتتان تىس تەتىكتەر ارقىلى قورعاۋ تۋرالى اقپارات الۋ دەڭگەيىن, سونداي-اق قوعامنىڭ بارلىق تاپتارىنىڭ قۇقىقتىق مادەنيەتىن ارتتىرا تۇسۋگە سەپتىگىن تيگىزەتىنىن اتاپ ءوتتى.
– قوستاناي ءبىز كەلگەن سەگىزىنشى ايماق بولىپ وتىر. قوستانايلىقتارعا ءوزىنىڭ كونستيتۋتسيالىق بوستاندىقتارىن, مىندەتتەرىن ءبىلۋدى, قۇقىقتارىن قورعاۋدىڭ مەحانيزمدەرىن بىلۋگە ۇيرەتەمىز, ەڭبەك قاتىناستارىنان تۋىندايتىن داۋ-دامايدى شەشۋ جولدارى, ايەلدەر مەن بالا قۇقىعىنىڭ قورعالۋى, ادام ساۋداسىن بولدىرماۋدىڭ كوپتەگەن ماسەلەلەرىن كوتەرەتىن بولامىز, – دەدى ادام قۇقىقتارى جونىندەگى كوميسسيانىڭ حاتشىسى ت.ابىشەۆ. ەقىۇ-نىڭ استاناداعى باعدارلامالار كەڭسەسىنىڭ ۇيلەستىرۋشىسى گ.قۋانجانوۆا جانە كوميسسيا مۇشەلەرى ز.بايساقوۆا مەن س.جاركەنوۆا ناقتى مىسالدارمەن تىڭداۋشىلارعا ادامنىڭ جانە ازاماتتىڭ قۇقىقتارى مەن بوستاندىقتارى تۋرالى عانا ەمەس, سونىمەن بىرگە ازاماتتاردىڭ مەملەكەت پەن قوعام الدىنداعى مىندەتتەرى, زاڭ الدىنداعى جاۋاپكەرشىلىگى جونىندە ايتىپ بەردى.
سەمينار-ترەنينگ بارىسىندا تىڭداۋشىلار بىرىككەن ۇلتتار ۇيىمىنىڭ ادام قۇقىقتارى سالاسىنداعى باقىلاۋ فۋنكتسيالارىمەن, ادام قۇقىقتارى جونىندەگى حالىقارالىق كونۆەنتسيالارعا قاتىستى بۇۇ قۇرعان باقىلاۋ ورگاندارىنىڭ قۇزىرەتىمەن تانىستى, بۇۇ-نىڭ ءتيىستى كوميتەتتەرىندە ازاماتتاردىڭ جەكە شاعىمدارىن قاراۋ تەتىگىن تالقىلادى. سونىمەن قاتار, مەملەكەت باسشىسىنىڭ بەس ينستيتۋتتىق رەفورماسى مەن «100 ناقتى قادامداعى» ايتىلعان ماسەلەلەردى ىسكە اسىرۋ تەتىكتەرى, سونداي-اق قازاقستانداعى قوعامدىق سانانى جاڭعىرتۋدىڭ ەرەجەلەرى ەگجەي-تەگجەيلى تالقىلاندى, ساراپشىلار سەمينارعا قاتىسۋشىلاردىڭ سۇراقتارىنا جاۋاپ بەردى.
كومميسسيا مۇشەلەرى قوستانايدان باسقا رۋدنىي قالاسى مەن فەدوروۆ اۋدانىندا دا بولىپ, وسىنداي سەمينار-ترەنينگ وتكىزدى.
ءنازيرا جارىمبەت,
«ەگەمەن قازاقستان»
قوستاناي
