ال اۋىل شارۋاشىلىعى مينيسترلىگىنىڭ مالىمەتى بويىنشا, وسى ەگىس القاپتارىنان ازىرگە 9 ميلليون 623,5 مىڭ توننا استىق جينالعان. ءار گەكتاردىڭ ونىمدىلىگى ورتا ەسەپپەن 12,7 تسەنتنەردەن اينالعان. سالىستىرۋ ءۇشىن ايتا كەتەيىك, وتكەن جىلى ءدال وسى كەزەڭدە استىقتى وڭىرلەردەگى ەگىس القاپتارىنان 9 ميلليون 1,4 مىڭ توننانىڭ ءونىمى الىنعان بولاتىن.
ەگەر جاعدايدى تاراتىپ ايتاتىن بولساق, 4 قىركۇيەك كۇنى قوستاناي وبلىسىندا 2 ميلليون 116,3 مىڭ گەكتاردىڭ استىعى ورىلعان. ءسويتىپ, استىقتى القاپتاردىڭ 50,5 پايىزىندا ءونىم جيناۋ جۇمىستارى جۇزەگە اسقان. سونداي-اق, مايلى داقىلدار ەگىستىگىنىڭ 61,5 مىڭ گەكتارى نەمەسە 18 پايىزى جينالىپ الىنعان. بۇدان 2 ميلليون 267,6 مىڭ توننا استىق, 45 مىڭ توننا كۇنباعىس ءدانى الىنعان. وبلىستىق اۋىل شارۋاشىلىعى باسقارماسىنىڭ مالىمەتى بويىنشا, استىقتىڭ ءار گەكتارىنىڭ ونىمدىلىگى 10,7 تسەنتنەردەن, كۇنباعىستىكى 7,3 تسەنتنەردەن اينالعان.
ايتا كەتەرلىك ءبىر جاعداي, بيىل قوستاناي وبلىسىنداعى اۋىلشارۋاشىلىق داقىلدارى ەگىستىگىنىڭ كولەمى بىلتىرعىدان 1,1 پايىزعا ۇلعايتىلىپ, 5 ميلليون 197,1 مىڭ گەكتاردى قۇراپ وتىر. مۇنىڭ 80,7 پايىزى استىق جانە بۇرشاق داقىلدارى ەگىستىگىنە, 12,3 پايىزى مال ازىقتىق داقىلدارعا, 6,7 پايىزى مايلى داقىلدارعا, 0,3 پايىزى كارتوپ پەن كوكونىسكە جانە باقشا داقىلدارىنا ارنالعان.
سولتۇستىك قازاقستان وبلىسىنداعى جاعداي دا وسىعان ۇقساس. 4 قىركۇيەك كۇنى مۇندا 1 ميلليون 695,9 مىڭ گەكتاردىڭ ءونىمى ورىلدى. مۇنىڭ 337,9 مىڭ گەكتارى – مايلى داقىلدار ەگىستىگى.
جۋىقتا ەلىمىزدىڭ اۋىل شارۋاشىلىعى مينيسترلىگى استىقتى ساتىپ الۋ باعاسىن جاريالادى. بيىلعى ەگىن ورۋ ماۋسىمىندا بيداي باعاسى ونىڭ ساپاسى مەن جەتكىزۋ ورنىنا بايلانىستى قالىپتاستىرىلدى. بۇل اقپارات استىق باستىرىپ جاتقان ديقاندارىمىز ءۇشىن اسا قاجەت بولعان سوڭ كەلتىرە كەتەيىك.
ءسويتىپ 1 توننا استىق باعاسى كلەيكوۆيناسى (قامىرلىلىعى) مەن پروتەينىنە بايلانىستى تومەندەگىدەي مولشەردە انىقتالدى:
قۇرامىندا 23 پايىز كلەيكوۆينا جانە 12 پايىز پروتەينى بار 3-سۇرىپتاعى بيدايدىڭ تونناسى – 42000 تەڭگە; قۇرامىندا 25 پايىز كلەيكوۆينا جانە 13 پايىز پروتەينى بار 3-سۇرىپتاعى بيدايدىڭ تونناسى – 45000 تەڭگە; قۇرامىندا 27 پايىز كلەيكوۆينا جانە 14,5 پايىز پروتەينى بار 3-سۇرىپتاعى بيدايدىڭ تونناسى – 50000 تەڭگە (54000 تەڭگە – اقو-دا قاپشىقتالعان); قۇرامىندا 32 پايىز ۇلپا جانە 15 پايىز پروتەينى بار 3-سۇرىپتاعى بيدايدىڭ تونناسى – 60000 تەڭگە (اقو-دا قاپشىقتالعان); قۇرامىندا 20 پايىز كلەيكوۆينا جانە 11 پايىز پروتەينى بار 4-سۇرىپتاعى بيدايدىڭ تونناسى – 39000 تەڭگە; قۇرامىندا 18 پايىز كلەيكوۆينا جانە 9,5 پايىز پروتەينى بار 4-سۇرىپتاعى بيدايدىڭ تونناسى – 37000 تەڭگە; ال 5-سۇرىپتاعى بيدايدىڭ تونناسى – 33000 تەڭگە.
سونىمەن قاتار, 2-سۇرىپتاعى ارپانىڭ جەتكىزۋ كولەمى 1000 تونناعا دەيىن بولسا, 40000 تەڭگەگە باعالانباق, ال جەتكىزۋ كولەمى 1000 توننادان ارتىق بولسا, تونناسىنىڭ باعاسى 41000 تەڭگەگە دەيىن ارتا تۇسەتىن بولادى. بۇل باعالاردىڭ بارلىعىندا ققس-نىڭ قوسا ەسەپتەلىنگەندىگىن ايتا كەتسەك ارتىق بولماس.
ەلىمىزدىڭ استىقتى وڭىرلەرىندە ەگىن وراعى قىزۋ قارقىن العان وسى تۇستا اق كۇرىشىمەن اتى شىققان قىزىلوردا وبلىسىنىڭ قارماقشى اۋدانىندا دا وسى ءونىمدى جيناۋ جۇمىستارى باستالىپ كەتتى. مۇنداعى بيىلعى جىلدىڭ ءبىر ەرەكشەلىگى, ەگىستىكتىڭ ەلەۋلى بولىگىنە كۇرىشتىڭ يراندىق «تاروم حوشيمي» سورتىنىڭ ەگىلگەندىگىندە بولىپ وتىر.
اتالعان كۇرىش سورتىن ءوسىرىپ وتىرعان اقتوبە اۋىلىنداعى «اقتوبە ي ك» جشس ەگىستىك القاپتارىندا وبلىس اكىمى قىرىمبەك كوشەرباەۆتىڭ قاتىسۋىمەن جانە اتاقتى كۇرىششى سوتسياليستىك ەڭبەك ەرى ءساليما جۇمابەكوۆانىڭ اق باتاسىمەن كۇرىش باستىرۋ جۇمىستارى سالتاناتتى تۇردە باستالدى.
«اقتوبە ي ك» جشس-نىڭ كۇرىشتىڭ يراندىق سورتىن تاڭداپ الۋىندا دا وزىندىك سىر بار ەكەن. وبلىس اكىمدىگى مەن يران ەلىنىڭ ءتيىستى ورىندارى ءوز ارا ىنتىماقتاستىق ورناتۋى ناتيجەسىندە ەكى ەلدىڭ كۇرىش وسىرۋشىلەرى مەن ساتۋشىلارى ءوزارا مامىلەگە كەلگەن. مۇندا يراننان جەتكىزىلىپ, ءوسىرىلىپ وتىرعان «تاروم حوشيمي» سورتتى كۇرىشتى يراندىقتاردىڭ وزدەرى ساتىپ الماق. بۇل ەل جىلىنا 3 ميلليون تونناعا جۋىق كۇرىش تۇتىنسا, سونىڭ ۇشتەن ءبىر بولىگىن سىرتتان ساتىپ الادى ەكەن. يران ەلىندەگى كۇرىشتىڭ ورتاشا شىعىمدىلىعى گەكتارىنا 33-35 تسەنتنەردەن اينالسا, «اقتوبە ي ك» جشس قولدانعان جاڭا تەحنولوگيانىڭ ناتيجەسىندە مۇنداعى 1510 گەكتار القاپتاعى شىعىمدىلىق گەكتارىنا 75 تسەنتنەردەن اينالىپ وتىر. دەمەك, ەكى ەلدىڭ بىرلەسكەن ارەكەتى قىزىلوردالىق كۇرىششىلەر ءۇشىن پايدالى بولاتىندىعى انىق.
سۇڭعات ءالىپباي,
«ەگەمەن قازاقستان»
