ءىس-شاراعا اسسامبلەيا توراعاسىنىڭ ورىنباسارى جانە حاتشىلىق مەڭگەرۋشىسى دارحان مىڭباي, اۋىل شارۋاشىلىعى ۆيتسە-ءمينيسترى ەرلان نىسانباەۆ, ءماجىلىس دەپۋتاتتارى جانە باسقا دا ءتۇرلى سالا وكىلدەر قاتىستى.
«استانا – ەل تاۋەلسىزدىگىنىڭ سيمۆولى. ال قالانى قورشاپ جاتقان جاسىل بەلدەۋ ەلباسىنىڭ سوزىمەن ايتساق, بولاشاق ۇرپاققا قالدىراتىن ءبىزدىڭ مۇرامىز. بۇل ورماندى جاساۋ ءۇشىن قانشاما ادام تەر توكتى. سوندىقتان, ولاردىڭ ەڭبەگىن قۇرمەتتەپ, اعاشتاردى بالالارىمىز سەكىلدى الپەشتەۋىمىز كەرەك. جاسىل بەلدەۋ ەلگە ونەگە بولۋى ءتيىس», – دەدى د.مىڭباي.
ونىڭ پىكىرىنشە, قازىرگى تاڭدا اتقارىلىپ جاتقان جۇمىسقا جەتپەيتىن ءبىر نارسە بار. ول – بۇقارالىق اقپارات قۇرالدارىندا جاسىل بەلدەۋدى ناسيحاتتاۋ. وسىعان سايكەس, اسسامبلەيا توراعاسىنىڭ ورىنباسارى بارشا مەديا وكىلدەرىن استانا ورمانىن حالىققا كەڭىنەن ناسيحاتتاۋعا شاقىردى.
اكتسياعا كەلگەن حالىق قالاۋلىلارىنا اۋىل شارۋاشىلىعى ۆيتسە-ءمينيسترى ەرلان نىسانباەۆ جاسىل بەلدەۋ اياسىندا اتقارىلىپ جاتقان جۇمىستارمەن تانىستىردى. ونىڭ ايتۋىنشا, القاپتى قالىپتاستىرۋ كەزەڭ-كەزەڭىمەن جۇزەگە اسىپ جاتىر. ەلورداعا جاسىل بەلدەۋ قالىپتاستىرۋ اياسىندا 2025 جىلعا دەيىن 100 مىڭ گەكتار جەرگە اعاش ەگۋ جوسپارلانعان. وسىعان سايكەس, 1998 جىلدان بەرى 13,5 ميلليوننان استام كوشەت وتىرعىزىلىپتى.
«استانانىڭ جاسىل بەلدەۋ» اتتى اكتسيانىڭ ماقساتى – شاھاردىڭ ورماندى القابىنىڭ الەۋەتىن دارىپتەۋ, وسكەلەڭ ۇرپاقتىڭ بويىنا ەلىمىزدىڭ تابيعي بايلىقتارىنا ۇقىپتى قاراۋ داعدىسىن ءسىڭىرۋ, سونىمەن قاتار, سالاۋاتتى ءومىر سالتىن ناسيحاتتاۋ.
سونداي-اق, اكتسيا بارىسىندا قاتىسۋشىلار مەن قوناقتار «جاسىل بەلدەۋدى قالپىنا كەلتىرۋ جانە جاسىل بەلدەۋدىڭ ەكىنشى كەزەڭىن جاساۋ» جوباسىنا سايكەس كوشەتتەر وتىرعىزدى. سودان كەيىن, مەيماندار ارنايى ۆەلوشەرۋگە قاتىسىپ, «استانا» ۆەلوكلۋبىنىڭ سپورتشىلارىمەن كەزدەستى.
اباي اسانكەلدى ۇلى,
«ەگەمەن قازاقستان»
