ءىس-شارا بارىسىندا تابيعي رەسۋرستاردى ساقتاۋ سالاسىنداعى مىندەتتەر كورسەتىلدى. ال جيىندا ءسوز العان سپيكەرلەر قاتارداعى جاڭارتىلاتىن ەنەرگيا كوزدەرىنىڭ قولدانىستاعى جانە جوسپارلانىپ وتىرعان جوبالارى جانە تابيعي رەسۋرستاردى ساقتاۋ جوبالارى تۋرالى وي ءبولىستى.
Kahramaa وكىلدەرى ەلدەگى ەنەرگيانى ۇنەمدەۋ جانە سۋ رەسۋرستارىن ساقتاۋ سالاسىنداعى جۇمىس ناتيجەلەرىن ۇسىندى. ماسەلەن, 2015 جىلدان باستاپ قاتار سۋ تۇتىنۋدى 35%-عا, ال ەلەكتردى 20%-عا قىسقارتتى.
تابيعي رەسۋرستاردى ساقتاۋ تۋرالى مەملەكەتتىڭ جاڭا زاڭىنا سايكەس Kahramaa بىرقاتار تەحنولوگيالاردى ازىرلەپ جاتىر. ولاردىڭ اراسىندا عيماراتتاردى ەنەرگيامەن قامتاماسىز ەتۋگە ارنالعان كۇن ەنەرگياسىن پايدالانۋ جوباسى, سۋمەن جىلىتۋ سالاسىنداعى ازىرلەمەلەر بار. سونىمەن قاتار, نورماتيۆتىك-قۇقىقتىق اكتى سۋ جىلىتقىشتار, توڭازىتقىشتار مەن مۇزداتقىشتار, كىر جۋاتىن ماشينالار ءۇشىن ەلەكتر ەنەرگياسى ونىمدىلىگىنىڭ ەڭ تومەنگى ستاندارتىن ەنگىزۋدە.
قاتار ۋنيۆەرسيتەتى ءىس-شارا بارىسىندا فۋتبول ستاديونىنىڭ جوسپارىن تانىستىرۋدى دا ۇمىتپادى.
ايتا كەتەرلىگى, بۇل ەلدە 2022 جىلى فۋتبولدان الەم چەمپيوناتىن وتكىزۋ جوسپارلانىپ وتىر. قۇرىلىستىڭ ەرەكشەلىگى سالقىنداتۋدىڭ يننوۆاتسيالىق جۇيەسىندە. وندا ارنايى تەحنولوگيا سالقىن جەلدى سيمۋلياتسيالاۋ جانە سالقىنداتقىش ارقاسىندا فۋتبولشىلار مەن كورەرمەندەردىڭ قولايلى تەمپەراتۋرانى ستاديوندا ۇستاپ تۇرۋعا مۇمكىندىك بەرەدى. قاتاردا جازدى كۇنى اۋا رايى ىستىق بولادى. سوندىقتان الەم بىرىنشىلىگى العاش رەت قىس مەزگىلىندە وتكىزىلۋ جوسپارلانىپ وتىر.
قازىرگى ۋاقىتتا قاتار ۋنيۆەرسيتەتىنىڭ عالىمدارى ستاديوندا سالقىنداتقىش جۇيەسىن ورناتۋ بويىنشا قىزمەت ەتىپ جاتىر. جيىن بارىسىندا اتالعان ۋنيۆەرسيتتىڭ پروفەسسورى, دوكتور ساۋد گحاني قۇرىلىسشىلاردىڭ قانداي جاعدايدا جۇمىس ىستەپ جاتقانىن اڭگىمەلەپ بەردى. ۋنيۆەرسيتەت 35-40 گرادۋس ىستىقتا قۇرىلىسشىلاردىڭ كيەتىن كاسكاسى 15 گرادۋسقا دەيىن سالقىندايتىن تەحنولوگيانى اشتى.
ايتا كەتەرلىك تاعى ءبىر جايت, 2022 جىلى وتەتىن الەم چەمپيوناتىنا بۇرىن-سوڭدى بولماعان قارجى جۇمسالۋ جوسپارلانىپ وتىر.
ساۋد كحاني ءسوز سوڭىندا الەم چەمپيوناتىنا قازاقستاننىڭ دا قاتىسقانىن قالايتىنىن ايتتى.
كەزدەسۋ بارىسىندا قازاقستاندىق بيزنەسمەندەر تابيعي رەسۋرستاردى ساقتاۋ سالاسىندا ارىپتەستەردىڭ ۇسىنىستارىنا قىزىعۋشىلىق تانىتتى.
قازاقستان مەن قاتار ءبىر-ءبىرى ءۇشىن ماڭىزدى ەكونوميكالىق سەرىكتەستەر ەكەنىن ايتا كەتكەن ءجون. ماسەلەن, وتكەن جىل ىشىندە ەكى ەلدىڭ اراسىنداعى تاۋار اينالىم 746,5 مىڭ اقش دوللارىن قۇرادى, سولاردىڭ ىشىندە ەكسپورت – 647,6 مىڭ, يمپورت – 98,9 مىڭ اقش دوللارى.
ايتا كەتەيىك, Kahramaa – قاتار حالقىنا ەلەكتر مەن سۋ جەتكىزۋدى قامتاماسىز ەتۋ جانە رەتتەۋ ءۇشىن 2000 جىلى قۇرىلعان كومپانيا. كومپانيانىڭ اكتسيالارىنىڭ 42,74 %-ى مەملەكەتكە تيەسىلى بولسا, قالعان 57,26 %-ى – جەكە مەنشىك.
ال Qatar University – قاتاردا 1972 جىلى اشىلعان ۋنيۆەرسيتەت. مۇندا قازىر 14 000 مىڭ ستۋدەنت ءبىلىم الىپ ءجۇر. رەيتينگ بويىنشا №1 وقۋ ورنى بولىپ ەسەپتەلەدى.
