ساپار بارىسىندا ا.مامين قۇرىق پورتىنداعى پاروم كەشەنىندە بولىپ, ەكىنشى ىسكە قوسۋ كەشەنىنىڭ قۇرىلىسى بويىنشا كەڭەس وتكىزدى. وعان ماڭعىستاۋ وبلىسىنىڭ اكىمى ەرالى توعجانوۆ قاتىستى.
جيىن بارىسىندا پورتتىڭ 114 نىسانىندا جۇمىستار جۇرگىزىلىپ جاتقاندىعى ايتىلدى. پارومنىڭ اۆتوكولىكتەرگە ارنالعان نىسانى سالىنىپ, تەڭىز جاعالاۋى تابانىن تەرەڭدەتۋ جۇمىستارى اياقتالۋدا. باتىس جانە شىعىس قورشاۋلارىنىڭ قۇرىلىسى بويىنشا جۇمىستار جۇرگىزىلۋدە.
جوبا باسشىلارى پورتتىڭ تۇراقتى جۇمىسىن قامتاماسىز ەتۋ, پيرستەردى ىسكە قوسۋ, اۆتوكولىكتەردى كوتەرىپ, وتكىزەتىن كوپىردىڭ مونتاجداۋ جۇمىستارىنىڭ اياقتالعاندىعىن حابارلادى. ۇلكەن كولەمدى جۇك ءۇشىن قوسىمشا ايلاق سالۋ قۇرىق پورتىنىڭ قۋاتىن 7 ميلليون تونناعا دەيىن ارتتىرادى. قازىرگى ۋاقىتقا دەيىن 166-دان استام كەمە پورتقا كەلىپ توقتادى, 756 مىڭ توننادان استام جۇك ءتۇسىرىلىپ-تيەلگەن. بيىل 1 ملن 300 مىڭ توننا, ال كەلەسى جىلى 15 مىڭ اۆتوكولىك جانە 3 ملن تونناعا دەيىن تيەپ-ءتۇسىرۋ جوسپارلانىپ وتىر.
پرەمەر-ءمينيستردىڭ ءبىرىنشى ورىنباسارى اسقار مامين ماڭعىستاۋ وبلىسىندا ستراتەگيالىق ماڭىزى بار «نۇرلى جول» باعدارلاماسىنىڭ بىرقاتار جوبالارىنىڭ جۇزەگە اسىرىلىپ جاتقاندىعىن ايتتى. ونىڭ ىشىندە, قۇرىق پورتىنداعى پاروم كەشەنىنىڭ قۇرىلىسىن, بەينەۋ – اقجىگىت جانە شەتپە – اقتاۋ اۆتوجولدارىنىڭ قۇرىلىسىن ەرەكشە اتاپ ءوتتى. ا.مامين ەلىمىزدىڭ باسەكەگە قابىلەتتىلىگىن ارتتىرۋدا, ترانزيتتىك جانە ەكسپورتتىق الەۋەتتى ۇلعايتۋدا قۇرىق پاروم كەشەنى قۇرىلىسىنىڭ ماڭىزدىلىعىنا نازار اۋداردى.
قۇرىق پاروم كەشەنىندەگى تەمىر جولدىڭ قۇرامداس بولىگى 2016 جىلى جەلتوقساندا اياقتالدى. الدىمىزدا تۇرعان مىندەت – بيىلعى جىلدىڭ سوڭىنا دەيىن اۆتوكولىكتىڭ قۇرامداس بولىگىن پايدالانۋعا بەرۋ, دەدى پرەمەر-ءمينيستردىڭ ءبىرىنشى ورىنباسارى. ول ەكى جوبانى تولىق قۋاتىندا ىسكە قوسۋ ترانسكاسپي ءدالىزى ارقىلى تاۋارلاردى جىل بويى قابىلداپ, جونەلتۋگە مۇمكىندىك بەرەتىنىن, جوبالاردىڭ ەلىمىزدىڭ ەكونوميكاسى ءۇشىن ماڭىزدى ەكەندىگىن باسا ايتتى.
ەلباسى ماڭعىستاۋ ءوڭىرىن دامىتۋعا ەرەكشە نازار اۋدارىپ وتىر, دەدى ا.مامين. پرەزيدەنتتىڭ تاپسىرماسى بويىنشا وبلىستا جاڭا ونەركاسىپتىك ءوندىرىس اشىلىپ, كولىك جانە تۋريزم سالالارىندا جوبالار جۇزەگە اسىرىلۋدا, سونداي-اق جاڭا جۇمىس ورىندارى قۇرىلۋدا. مۇنىڭ بارلىعى ءوڭىر ەكونوميكاسىنىڭ تۇراقتى دامۋىن قامتاماسىز ەتەدى.
سونىمەن قاتار, پرەمەر-ءمينيستردىڭ ءبىرىنشى ورىنباسارى وبلىسقا جۇمىس ساپارى كەزىندە بەينەۋ – اقجىگىت – تاجەن اۆتوكولىك جولىنا قايتا جوندەۋ جۇمىستارىنىڭ جۇرگىزىلۋ بارىسىمەن تانىستى. جولدى جوندەۋ جۇمىستارى بيىلعى جىلدىڭ شىلدە ايىندا باستالعان. ەكىنشى كاتەگوريالى ماگيسترال 85 شاقىرىمدى قۇرايدى. ول جول بەينەۋدەن باستالىپ, وزبەكستانمەن اراداعى شەكارادان وتەدى.
«نۇرلى جول» باعدارلاماسى بويىنشا سالىنىپ جاتقان نىسانداردى تەكسەرگەننەن كەيىن ا.مامين كوشپەلى جيىن وتكىزدى. وندا مەردىگەر ۇيىمدار باسشىلارىنىڭ ەسەبى تىڭدالدى.
ولاردىڭ ايتۋىنشا, قازىرگى ۋاقىتتا اۆتو جولدى قايتا جوندەۋ جۇمىستارى قارقىندى جۇرگىزىلۋدە. جول بويىندا التى دەمالىس الاڭى مەن سەگىز اۆتوبۋس ايالداماسىن سالۋ قاراستىرىلعان. ۋچاسكەلەردە 300-دەن استام ادام مەن 150-دەن استام تەحنيكا جۇمىس جاساۋدا. جولدى قايتا قالپىنا كەلتىرۋ جۇمىستارىندا قازاقستاندىق وندىرۋشىلەردىڭ ماتەريالدارى پايدالانىلادى.
ا.مامين بەينەۋ – اقجىگىت – تاجەن اۆتوكولىك جولىنىڭ قازاقستاننىڭ ترانزيتتىك-كولىك الەۋەتىن جۇزەگە اسىرۋعا مۇمكىندىك بەرەتىن ينفراقۇرىلىمدىق نىسان رەتىندەگى ماڭىزدىلىعىن ايتتى.
بۇل ءوڭىر ءۇشىن وتە ماڭىزدى جوبا. ول ورتالىق ازيا ەلدەرىنەن اقتاۋ جانە قۇرىق تەڭىز پورتى ارقىلى كاۆكاز, تۇركيا جانە ەۋروپا ەلدەرىنە ترانزيتتىك اۆتوكولىك اعىنىن قالىپتاستىرۋعا ىقپال ەتەدى, دەدى ا.مامين. وسى ورايدا ول اۆتوجولدى ساپالى سالىپ, مەجەلەگەن مەرزىمدە اياقتاۋدى تاپسىردى.
سونداي-اق, ا.مامين يدمب اياسىندا جۇزەگە اسىرىلىپ جاتقان جوبالارمەن تانىستى. ول شىنى-پلاستيك قۇبىرلار, تەمىر-بەتون بۇيىمدارىن, قۇرىق پورتىنىڭ قورعانىس بوگەتىنە تەتروپود وندىرەتىن زاۋىتتاردا جانە كۇشتىك ترانسفورماتورلاردى جوندەۋ كاسىپورىندارىندا بولدى.
