«ە» توبىنداعى بۇل كەزدەسۋ وتپەس بۇرىن, پولشا قۇراماسىن وكشەلەپ كەلە جاتقان دانيا فۋتبولشىلارى سىرت الاڭدا ارمەنيانى 4:1 ەسەبىمەن ويسىراتا ۇتقان بولاتىن. ول ازداي-اق, چەرنوگوريا قۇراماسى دا رۋمىنيا فۋتبولشىلارىنان 1:0 ەسەبىمەن باسىم ءتۇسىپ, توپتاعى جاعدايدى ءتىپتى كۇردەلەندىرىپ جىبەردى. سول سەبەپتى, پولياكتار قازاق فۋتبولشىلارىمەن بولعان كەزدەسۋگە شيرىعىپ شىقتى.
شىنىن ايتقاندا, ادام ناۆالكانىڭ شاكىرتتەرى ءبىزدىڭ ويىنشىلارعا قاراعاندا سەرگەك ءھام شيراق كورىندى. جىلدام دا ءدال پاستارمەن ادىمدى اشتىرماي, دىڭكەلەتۋگە تىرىستى. ماچتىڭ 11-مينۋتىندا گروسيتسكيدىڭ سول قاناتتان اۋەلەتە بەرگەن پاسىن ماكۋشەۆسكي باسپەن ۇرىپ, ايىپ الاڭىنىڭ ورتا تۇسىندا تۇرعان ميليككە باعىتتادى. ال ميليك بولسا ءمۇلت كەتپەدى. ەسەپ – 1:0.
قاقپاسىنا گول سوعىلعاننان كەيىن ءبىزدىڭ فۋتبولشىلاردىڭ نامىسقا تىرىسىپ, العا ۇمتىلعانى راس. سونداي ءساتتىڭ بىرىندە, ياعني ويىننىڭ 48-مينۋتىندا رومان مۇرتازاەۆتىڭ سوققىسىنان كەيىن دوپ قاقپا ىشىنەن تابىلعان. بىراق, ماتچ تورەشىسى اندريس ترەيمانيس بۇل گولدى ەسەپتەۋدەن باس تارتتى. ونىڭ پىكىرىنشە, ءدال سول ساتتە يسلامبەك قۋات الاڭ يەلەرىنىڭ قاقپاشىسىن دەنەسىمەن جاۋىپ, وعان قارسى ويىن ءتارتىبىن بۇزعان ەكەن.
بۇدان كەيىن لاتۆيالىق تورەشىلەر روبەرت لەۆاندوۆسكيدىڭ ستاندارتتى جاعدايدان تەۋىپ قاقپاعا ەنگىزگەن تاپ-تازا گولىن ساناماي تاستادى. وسى جاعداي اشۋىنا تيگەن بولۋ كەرەك, پولياكتار ىلە-شالا تاعى ءبىر شابۋىل ۇيىمداستىرىپ, كاميل گليكتىڭ كومەگىمەن ەسەپتى ەسەلەي ءتۇستى. بۇل گول ويىننىڭ 74-مينۋتىندا سوعىلعان ەدى.
كەزدەسۋدىڭ بىتۋىنە بەس مينۋت ۋاقىت قالعاندا ىلعي شابۋىلدىڭ وتىندە جۇرەتىن لەۆاندوۆسكي ءبىزدىڭ قاقپانىڭ الدىن تاعى دا شاڭ قىلدى. روبەرتتى قۇرىقتاۋ كىمگە وڭاي ءتيسىن, ءبىزدىڭ قورعاۋشىلار امالدىڭ جوقتىعىنان وعان قارسى ءتارتىپ بۇزدى. پەنالتيدى ءساتتى ورىنداعان سۇرمەرگەن بۇل ويىنداعى ناتيجەنىڭ سوڭعى نۇكتەسىن ءوزى قويدى.
وبالى نەشىك, ءبىزدىڭ قۇرامانىڭ ويىنشىلارى بۇل كەزدەسۋدە ايانىپ قالمادى. شاما-شارقى جەتكەنىنشە ايقاسىپ باقتى. بىراق, شابۋىلدىڭ شەشۋشى ساتتەرىندەگى شاراسىزدىق پەن قورعانىستاعى ساسقالاقتاعان سەنىمسىز ويىن كوماندانىڭ جىگەرىن قۇم ەتتى.
ويىننان كەيىن بولعان ءباسپاسوز ءماسليحاتىندا باس باپكەر الەكساندر بوروديۋك بىلاي دەدى: «ەگەر, ەسەپتى تەڭەستىرگەنىمىزدە, ويىن باسقاشا ءوربيتىن ەدى. جالپى, ءبىز پولياكتار سياقتى دوپتى جىلدام يگەرەتىن قارسىلاستارمەن, سونىمەن قاتار 50 مىڭنان استام كورەرمەنى گۋىلدەپ تۇراتىن ستاديوندا ويناپ ۇيرەنۋىمىز كەرەك. پولشا مەن چەرنوگوريادا ءار ءۇش كۇن سايىن تولىق ويناسا دا كۇشىن وپ-وڭاي جيناپ الا قوياتىن ويىنشىلار بار. مىنە, بىزگە جەتپەيتىنى وسى».
كەلەسى ويىندى قازاقستان فۋتبولشىلارى 5 قازان كۇنى رۋمىنيادا سول ەلدىڭ قۇراما كومانداسىمەن وتكىزەدى.
قايرات ءابىلدا,
«ەگەمەن قازاقستان»
