كەشتە بالەت كورەرمەندەرى ەديت پيافتىڭ اندەرىنىڭ اۋەنىمەن قويىلعان «Love fear loss» بالەتىن, ا.ۆيۆالدي, س.راحمانينوۆ, ش.گۋنو, ك.سەن-سانس سىندى داڭقتى كومپوزيتورلاردىڭ مۋزىكاسىمەن ريكاردو امارانتەنىڭ «Diversity» سپەكتاكلىنەن ۇزىندىلەر تاماشالادى.
بالەت ارتىستەرى تەاتردا تۇڭعىش رەت سەرگەي راحمانينوۆتىڭ «فورتەپيانو مەن وركەسترگە ارنالعان №2 كونتسەرت» شىعارماسىنا قويىلعان بالەتتى ۇسىندى. ورىستىڭ اتاقتى كومپوزيتورى سەرگەي راحمانينوۆ ءارى پيانيست, ءارى ديريجەر بولعانى بەلگىلى. ونەر زەرتتەۋشىلەرى ونىڭ فورتەپيانوعا ارنالعان اتالمىش تۋىندىسىنىڭ 1900 جىلى ومىرگە كەلگەنىن ايتادى.
ال, «قيالعا بويلاۋ» بالەتىنە كەلەر بولساق, قويۋشى-رەجيسسەر ريكاردو امارانتە ونىڭ قويىلۋىنا س.راحمانينوۆتىڭ «فورتەپيانو مەن وركەسترگە ارنالعان №2 كونتسەرتى» سەبەپكەر بولعانىن ايتادى. – بۇل ەڭ ۇزدىك مۋزىكالىق شىعارمالاردىڭ ءبىرى. ونىڭ دۇنيەگە كەلۋ تاريحى دا مەنى قىزىقتىردى. دەپرەسسياعا تۇسكەن كومپوزيتور شىعارمانى ءوزىنىڭ پسيحوتەراپەۆت-دارىگەرى نيكولاي دالگە العىس رەتىندە شىعارعان. بۇل ماعان قاتتى اسەر ەتتى, – دەدى ريكاردو امارانتە جۋرناليستەرگە بەرگەن سۇحباتىندا.
«قيالعا بويلاۋ» دەگەن اتىنا سايكەس بالەت كەشى كورەرمەندەردى ءتۇرلى سەزىمدەر مەن كوڭىل-كۇيگە جەتەلەدى. ادام بويىنداعى ادەمىلىكتى سەزىنۋ, ءومىردى ءسۇيۋ, تىلسىم دۇنيەنىڭ جۇمباعىنا بويلاۋ سىندى سەزىمدەر بالەت كەشىمەن ۇندەسىپ جاتتى.
بالەت كەشىن تانىمال شىعارماشىلىق يەلەرىنەن قۇرالعان توپ وتكىزدى. قويۋشى-رەجيسسەر ءارى حورەوگراف ريكاردو امارانتە, كوستيۋم سۋرەتشىسى رەنە سالازار. سپەكتاكلدى سيمفونيالىق وركەستر سۇيەمەلدەدى, سوليست قازاقستاننىڭ ەڭبەك سىڭىرگەن قايراتكەرى ءامىر تەبەنيحين, ال, ديريجەرى ارمان ورازعاليەۆ.
ايگۇل سەيىل,
«ەگەمەن قازاقستان»
