كونە دە جاڭا نىسان مەكتەپ-مۋزەي بولىپ اشىلىپ وتىر. ەلباسىنىڭ «رۋحاني جاڭعىرۋ» باعدارلاماسى اياسىندا جۇزەگە اسقان شارا ابدىكەرىم بولىستىڭ تۋعانىنا 155 جىل تولۋىمەن جانە ەلىمىزدەگى ەڭ العاشقى ءبىلىم وردالارىنىڭ بىرىنە سانالاتىن مەكتەپتىڭ 110 جىلدىعىمەن تۇسپا-تۇس كەلىپ وتىر.
مەكتەپ-مۋزەيدىڭ اشىلۋىنا ابدىكەرىم ەرەجەپ ۇلىنىڭ تۋعان شوبەرەسى ەركىن ءبايىس تە كەلگەن ەكەن. تۇساۋكەسەر لەنتاسى قيىلماس بۇرىن قويىلعان تەاترلاندىرىلعان كورىنىستە ءبىلىم ورداسىنان تۇلەپ ۇشقان سوتسياليستىك ەڭبەك ەرى بوشاي كىتاپباەۆ, كسرو حالىق مۇعالىمى قۇماش نۇرعاليەۆ, مەملەكەتتىك سىيلىقتىڭ لاۋرەاتتارى, جازۋشى ورالحان بوكەي, الىبەك اسقاروۆ جانە ديداحمەت ءاشىمحان سىندى ەلگە بەلگىلى تۇلعالاردىڭ ەسىمدەرى اتالدى.
مادەني شاڭىراقتىڭ ىشىندە ابدىكەرىم بولىستان باستاپ بەلگىلى تۇلعالار تۋرالى دەرەكتەر قويىلعان. ءبىر بولمە وتكەن عاسىر ۇلگىسىندەگى سىنىپ رەتىندە جابدىقتالىپتى. مۋزەيدىڭ اشىلۋىنا كۋا بولعان اۋىل تۇرعىندارى ايرىقشا قۋانىشتى.
– وقۋشى كۇنىمىز كوز الدىمىزعا كەلدى, – دەيدى جەتپىستىڭ جەتەگىندەگى نۇرلان اقساقال. – تاريحىمىزدى تىرىلتكەن اۋدان ازاماتتارىنا العىسىم شەكسىز. ونىڭ ىشىندە ءوز قارجىسىنا وسى مەكتەپ-مۋزەي ءۇيىن سالىپ بەرگەن ۇلىقبەك تۇماشينوۆكە ريزامىز. مۋزەي ءىشىن جابدىقتاۋعا زور ۇلەسىن قوسىپ جۇرگەن دۇيسەن برالينوۆكە دە مىڭ العىس.
ازامات قاسىم,
«ەگەمەن قازاقستان»
شىعىس قازاقستان وبلىسى
