ولار – «اتامەكەن» ۇلتتىق كاسىپكەرلەر پالاتاسى مەن باس پروكۋراتۋرا اراسىنداعى كاسىپكەرلەردىڭ جۇيەلى ماسەلەلەرىن انىقتاپ, بىرلەسە وتىرىپ شەشۋ جونىندەگى كەلىسىم جانە قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل مەن رەسەي فەدەراتسياسى پرەزيدەنتى جانىنداعى كاسىپكەرلەردىڭ قۇقىقتارىن قورعاۋ جونىندەگى ۋاكىلدىڭ كاسىپكەرلەر قۇقىقتارىن قورعاۋ مەن سالاداعى اقپاراتتى ءبولىسۋ جونىندەگى كەلىسىم.
باسقوسۋدى اشىپ, ءسوز سويلەگەن قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل بولات پالىمبەتوۆ رەسەيدىڭ نەگىزگى ەكونوميكالىق سەرىكتەسىمىز ەكەنىن اتاپ ءوتتى. «ىنتىماقتاستىق قالىپتاسقان جىلدار ىشىندە 6000-عا جۋىق بىرلەسكەن كاسىپورىن اشىلدى. رەسەي بيزنەس-ومبۋدسمەنى ينستيتۋتىمەن بىرلەسىپ, اۋقىمدى جۇمىس اتقارىلدى. ماسكەۋدە, اتىراۋدا كەزدەسۋلەر ءوتىپ, كاسىپكەرلەردىڭ زاڭدى قۇقىعى مەن مۇددەسىن قورعاۋداعى تاجىريبە الماسۋ تۇراقتى تۇردە جۇرگىزىلىپ كەلەدى», دەگەن ول شەكاراعا جاقىن ايماقتاردا ەكى ەلدىڭ شاعىن جانە ورتا بيزنەسىن دامىتۋعا بارىنشا مۇمكىندىك بەرۋگە نازار اۋداردى.
جيىندا «اتامەكەن» ۇلتتىق كاسىپكەرلەر پالاتاسى باسقارما توراعاسى ابىلاي مىرزاحمەتوۆ قازىرگى بيزنەستە قۇقىقتىق سالادا الاڭداتاتىن ماسەلەلەردى شەشۋ بارىسىندا تاجىريبە الماسۋ قارقىندى ءجۇرىپ جاتقانىن اڭگىمەلەدى. كەلىسىمشارتتار مەن كەلىسسوزدەر ەاەو اياسىندا عانا ەمەس, قالىپتاسقان دوستىق بايلانىس نەگىزىندە جۇزەگە اسۋدا. «كەز كەلگەن قاۋىمداستىق كاسىپكەرلىك قۇقىعىن قورعاۋ مەن مۇددەنى تانىتۋ ءۇشىن قىزمەت ەتەدى. ءبىزدىڭ زاڭناما باسقىنشىلىق تۇردە ەمەس, دوستىق قالىپتا بولۋى كەرەك. بىزدە زاڭناما مەن ونىڭ قايشىلىقتارىن جاقسى بىلەتىن ينستيتۋتتار جۇمىس ىستەيدى. ءبىزدىڭ ەڭ باستى مىندەتىمىز – كەلىسىم جاساۋ كۇشى, بيزنەس ءۇشىن ەرەجەلەردى وزگەرتۋ. مەملەكەتتىك اپپاراتتىڭ بيزنەستىڭ قاجەتتىلىگىنە قاراي نازار اۋدارۋىندا ايتارلىقتاي ناتيجەگە قول جەتكىزدىك», دەدى ا.مىرزاحمەتوۆ.
«اتامەكەن» ۇكپ باسقارما توراعاسى باس پروكۋراتۋرا مەن مەملەكەتتىك قىزمەت ىستەرى جانە سىبايلاس جەمقورلىققا قارسى اگەنتتىكپەن بىرلەسىپ اتقارىلعان جۇمىستاردى دا اتاپ ءوتتى. ء«بىزدىڭ مىندەتىمىز – شەنەۋنىككە كاسىپكەرلىك قىزمەتكە جاسالاتىن كەدەرگى ءۇشىن قولدانىلاتىن جازا بار ەكەنىن كورسەتۋ. سوندىقتان كەز كەلگەن زاڭ مەن قۇجاتتا كاسىپكەرلەرمەن كەلىسۋ ماڭىزدى», دەدى ول.
رەسەي فەدەراتسياسىنىڭ پرەزيدەنتى جانىنداعى كاسىپكەرلەردىڭ قۇقىقتارىن قورعاۋ جونىندەگى ۋاكىل بوريس تيتوۆ «اتامەكەن» ۇلتتىق كاسىپكەرلەر پالاتاسىنىڭ IV سەزىندە كوتەرىلگەن ماسەلەلەر مەن اتقارىلعان جۇمىستار وسى فورۋمدى وتكىزۋگە نەگىز بولعانىن جەتكىزدى. ونىڭ ايتۋىنشا, كاسىپكەرلەردىڭ زاڭدى مۇددەلەرى مەن قۇقىقتارىن قورعاۋدا قازاقستاننىڭ تاجىريبەسى قىزىعارلىقتاي, سوندىقتان ەكى ەلدىڭ ورتاق مۇددەسى مەن ەكونوميكالىق بايلانىسىندا بۇل شارانىڭ ماڭىزى زور. فورۋمنىڭ باستى ماقساتى – وزگەلەردىڭ قاتەلىگىن زەرتتەپ, تاجىريبە نەگىزىندە وڭتايلى شەشىمدەر تابۋ.
اسحات رايقۇل,
«ەگەمەن قازاقستان»
