قازاقستان رەسپۋبليكاسىنىڭ تۇراقتى وكىلدىگىنىڭ باستاماسىمەن جانە قارۋسىزدانۋ جونىندەگى جەنەۆا پلاتفورماسىنىڭ قولداۋىمەن ۇيىمداستىرىلعان شاراعا حالىقارالىق ۇيىمدار مەن ديپلوماتيالىق كورپۋستىڭ باسشىلارى, بۇقارالىق اقپارات قۇرالدارى مەن اكادەميالىق توپ وكىلدەرى قاتىستى.
قازاقستان رەسپۋبليكاسىنىڭ تۇراقتى وكىلى, ەلشى جانار ايتجانوۆا ءوز سوزىندە قاتىسۋشىلارعا قازاقستان جانە پرەزيدەنت نۇرسۇلتان نازارباەۆتىڭ تاراتپاۋ جانە يادرولىق قارۋسىزدانۋ ۇدەرىسىنە قوسقان ۇلەسى تۋرالى بايانداپ بەردى. ونىڭ ايقىن دالەلى رەتىندە الەمدەگى كولەمى بويىنشا ءتورتىنشى يادرولىق ارسەنالدان باس تارتۋ مەن سەمەي يادرولىق پوليگونىن جابۋدى ايتۋعا بولادى.
قازاقستاندىق ديپلومات ەلىمىزدىڭ يادرولىق تاراتپاۋ ماسەلەسىنىڭ كەلەشەگىن ايتا كەلە, 2017 جىلعى 25-29 تامىزدا استانادا عىلىم جانە عالامدىق ماسەلەلەر جونىندەگى پاگۋوش كونفەرەنتسياسى 62-ءشى سەسسياسىنىڭ وتكەنىن اتاپ ءوتتى. قورىتىندى قۇجات رەتىندە استانا دەكلاراتسياسى قابىلدانعانى جەتكىزىلدى.
بىرىككەن ۇلتتار ۇيىمى قارۋسىزدانۋ كونفەرەنتسياسى جانىنداعى اۆستريانىڭ تۇراقتى وكىلى توماس حاينوتسي ءوز سوزىندە يادرولىق قارۋسىزدانۋ ۇدەرىسىمەن تانىستىرىپ ءوتىپ, ءبىرشاما جاعىمدى جەتىستىكتەرگە قول جەتكەن تۇستاردى كەلتىردى. اۆستريالىق ديپلومات قازاقستاننىڭ وسى سالاداعى تاريحي ورنى مەن ماڭىزدى باستامالارىن اتاپ ءوتتى.
شاراعا قاتىسقان يادرولىق سىناقتارعا جان-جاقتى تىيىم سالۋ تۋرالى شارت ۇيىمىنىڭ وكىلى رونان لە براس بۇل ۇدەرىستىڭ قازىرگى احۋالى تۋرالى بايانداما جاساپ, شارتتىڭ كۇشىنە ەنۋى بويىنشا قالىپتاسىپ وتىرعان جاعدايعا قاتىستى ءوز باعاسىن بەردى.
جەنەۆاداعى شاراعا ارنايى شاقىرىلعان قوناق رەتىندە قاتىسقان تانىمال قازاقستاندىق سۋرەتشى, اتوم جوباسىنىڭ قۇرمەتتى ەلشىسى قارىپبەك كۇيىكوۆ ەلىمىزدىڭ يادرولىق قارۋسىزدانۋ ىسىنە قوسقان ۇلەسى جايلى جانە ءوز ءومىرىنىڭ تاريحى مەن يادرولىق قارۋسىز الەم ءۇشىن كۇرەس جايىندا باياندادى.
