ق.توقاەۆ حالىقارالىق مامانداندىرىلعان كورمەگە قاتىسقانى ءۇشىن كيەلى تاققا العىس ايتا كەلىپ, قازاقستان ەكسپو-2017 كورمەسىن ءبىزدىڭ عالامشاردىڭ كەلەشەگى ءۇشىن «تازا ەنەرگەتيكانى» دامىتۋ يدەياسىن ىلگەرىلەتۋگە ارنالعان جاھاندىق الاڭ رەتىندە قاراستىراتىنىن اتاپ ءوتتى. كورمەگە 115 ەل مەن 22 حالىقارالىق ۇيىم قاتىسۋدا, كەلۋشىلەردىڭ سانى, ونىڭ ىشىندە الەمنىڭ باسقا دا ەلدەرىنەن كەلگەندەردى قوسقاندا, ءۇش ميلليوننان اسىپ كەتتى. ء«بىزدىڭ ەلوردامىزدا وسىنداي اۋقىمدى شارانى ۇيىمداستىرۋ تۋرالى باستامانى مەملەكەت باسشىسى نۇرسۇلتان نازارباەۆ كوتەرگەن بولاتىن», دەپ اتاپ ءوتتى سەنات توراعاسى.
ق.توقاەۆ «جاسىل تەحنولوگيالاردى» قولدانۋداعى ۆاتيكاننىڭ جەتىستىكتەرى كوپتەگەن ەلدەرگە لايىقتى ۇلگى ەكەنىن ايتتى. ۆاتيكان پاۆيلونى ەنەرگەتيكا ماسەلەلەرىن ماتەريالدىق تۇرعىدان عانا ەمەس, رۋحاني تۇرعىدا دا ىزدەستىرۋگە شاقىرۋدى پاش ەتەتىنىنە نازار اۋدارىلدى. بۇل جەردە ءبىزدىڭ عالامشاردىڭ كەلەشەگى جولىنداعى ادامنىڭ نەگىزگى ءرولى مەن جاۋاپكەرشىلىگى تۋرالى ءسوز بولىپ وتىر.
پارلامەنت جوعارعى پالاتاسىنىڭ باسشىسى بيىل ديپلوماتيالىق قاتىناستار ورناعانىنا 25 جىل تولعانىن اتاپ وتەتىن قازاقستان مەن ۆاتيكاننىڭ جان-جاقتى ءوزارا ءىس-قيمىل مەن سەنىمدى ۇنقاتىسۋ قالىپتاستىرعانىن ەسكە سالدى.
«قازاقستان ريم پاپاسى كەلگەن ورتالىق ازياداعى بىردەن-ءبىر مەملەكەت بولىپ وتىر. ءبىز ونى ەل ىشىندە عانا ەمەس, حالىقارالىق قوعامداستىقتا دا قازاقستاننىڭ بەيبىتشىل ساياساتىنىڭ ناتيجەسىن ناقتىلايتىن ەرەكشە وقيعا رەتىندە باعالايمىز», دەدى ق.توقاەۆ.
سەنات توراعاسى الەمدىك جانە ءداستۇرلى دىندەر ليدەرلەرى سەزىن جان-جاقتى قولداعانى جانە وعان بەلسەندى قاتىسقانى ءۇشىن ريم-كاتوليك شىركەۋىنە ريزاشىلىق ءبىلدىردى. بۇل فورۋم كورنەكتى ءدىني قايراتكەرلەر مەن ساياساتكەرلەر, حالىقارالىق ۇيىمداردىڭ باسشىلارى قازىرگى زامانداعى اسا ماڭىزدى ماسەلەلەر بويىنشا پىكىر الماساتىن ايگىلى ۇنقاتىسۋ الاڭىنا اينالدى. كەلەسى VI سەزدى 2018 جىلى 10-11 قازاندا استانادا وتكىزۋ جوسپارلاندى. فورۋمنىڭ باستى تاقىرىبى ء«دىني كوشباسشىلار قاۋىپسىز الەم جولىندا» دەپ اتالادى.
سول كۇنى ق. توقاەۆ ەكسپو-2017 كورمەسىندەگى ۆاتيكان سەكتسياسىنىڭ كوميسسارى, ادىلەتتىلىك جانە بەيبىتشىلىك جونىندەگى پاپا كەڭەسىنىڭ توراعاسى كاردينال پيتەر تيوركسونمەن كەزدەستى. جۇزدەسۋشىلەر ەكىجاقتى ىنتىماقتاستىقتىڭ كەلەشەگى مەن دىنارالىق ۇنقاتىسۋدى دامىتۋ جايىن تالقىلادى.
